Kesa raw pagmultahin, dahil pandemya... Magtatapon ng basura sa mga kanal, paglilinisin na lang

ni Lolet Abania | July 1, 2021

Plano ng mga mayor ng National Capital Region (NCR) na i-review at pag-isahin na lamang ang magiging parusa sa sinumang may kaugnayan sa maling pagtatapon ng basura na nagpapabara sa mga kanal, estero at iba pang waterways.

Sa Laging Handa public briefing ngayong Huwebes, sinabi ni Metropolitan Manila Development Authority (MMDA) Chairperson Benhur Abalos na napag-isa na ng mga mayors ang iba’t ibang ordinances hinggil sa tamang pagtatapon ng basura sa nasabing rehiyon, subalit wala pang nabuong parusa para rito.

“Ngayon po ay na-harmonize namin ang kani-kanyang ordinansa… Dapat ma-review ang parusa rito sa pagtatapon. Likewise, i-harmonize,” ani Abalos.

Ayon kay Abalos, kailangang sumailalim sa community service ang mga lalabag at kinokonsidera na itong parusa sa halip na pagmultahin dahil sa pandemya na labis na nakaapekto sa maraming Pilipino sa pinansiyal na aspeto.

Nitong Lunes, nag-install ang MMDA ng isang trash trap sa isa sa mga tributaries ng Estero de Tripa de Gallina malapit sa Tramo Bridge sa Pasay City.

Paliwanag ng MMDA, ang trash trap ay makatutulong para hindi ma-damage ang mga pumping stations dulot ng mga basura na napupunta rito.

Sinabi ni Abalos na umabot sa dalawang truckloads ng basura ang nakolekta sa lugar nang araw na iyon.

Herd immunity sa NCR sa Nobyembre – Galvez

ni Lolet Abania | May 4, 2021

Inaasahan nang makakamit ng pamahalaan ang target na herd immunity sa National Capital Region (NCR) at kalapit na lalawigan sa Nobyembre, ayon sa vaccine czar na si Secretary Carlito Galvez, Jr..

“We can have herd immunity in NCR and six provinces around NCR by November. We’re looking at 180 days,” ani Galvez sa Palace press briefing ngayong Martes, kung saan katuwang dito ang mga supply chain experts ng gobyerno para sa mass vaccination program.

Inisyu ni Galvez ang statement isang araw matapos nitong ilabas ang listahan ng mga lugar na prayoridad na makatanggap ng doses ng COVID-19 vaccines dahil sa kaunting supply nito.

Kabilang sa mga lugar na dapat i-prioritize sa pagbabakuna kontra-COVID-19 ang NCR, Calabarzon at Central Luzon.

“If we can achieve herd immunity by vaccinating up to 70 percent of the residents in these areas, there is a big chance that our economy will recover and we can prevent a surge in cases,” sabi naman ni Galvez sa briefing kay Pangulong Rodrigo Duterte kagabi.

Ayon kay Galvez, kinakailangan ng gobyernong magkaroon ng 15 milyong doses ng COVID-19 vaccines kada buwan para mabakunahan ang 70 porsiyento ng populasyon at makamit ang pinapangarap na herd immunity ng bansa bago magtapos ang taon.

Sinabi pa ni Galvez, kailangan ng 25,000 hanggang 50,000 vaccinators para makatulong sa pag-administer ng gamot kontra-COVID-19.

Aniya, dapat ding maglagay ng 5,000 vaccination sites para makapagbakuna ng COVID-19 vaccines sa 100 kababayan kada araw sa bawat site.

Sa ngayon, umabot na sa 3,745,120 mula sa kabuuang 4,040,600 (92.68%) vaccine doses ng COVID-19 sa maraming vaccination sites sa bansa ang naipamahagi.

Ayon sa datos ng gobyerno, mahigit sa 1.6 milyong Pinoy na ang naturukan ng COVID-19 vaccines, kung saan nagsimula ang immunization campaign noong Marso.

300 K balik-trabaho sa extended MECQ — DTI

ni Mary Gutierrez Almirañez | April 30, 2021

Tatlong-daang libong trabaho ang naghihintay sa mga empleyadong nawalan ng hanapbuhay sa muling pagbubukas ng ilang establisimyento sa extended modified enhanced community quarantine (MECQ) sa National Capital Region (NCR) at mga kalapit nitong lalawigan, batay kay Department of Trade (DTI) Secretary Ramon Lopez ngayong araw, Abril 30.

Kabilang ang mga resto, barbershop, salon at spa sa magbabalik-operasyon, kung saan may 10% dine-in capacity para sa mga restaurant at 30% capacity naman sa mga beauty salon, barbershop at spa.

Ayon pa kay Lopez, "Kahit papaano, makakadagdag ng trabaho... para maibalik man lang ‘yung trabaho nu’ng marami nating nagugutom na kababayan."

Ngayong araw din ay na-finalize na ng Inter-Agency Task Force (IATF) for the Management of Emerging Infectious Diseases ang mga lugar na isasailalim sa MECQ simula May 1 hanggang May 14, kabilang ang mga sumusunod:

• Abra

• Ifugao

• Santiago City, Quirino

• Metro Manila

• Bulacan

• Cavite

• Laguna

• Rizal

Samantala, iniakyat naman sa mas maluwag na quarantine classifications o general community quarantine (GCQ) hanggang sa katapusan ng Mayo ang mga sumusunod pang lugar:

• Apayao

• Baguio City

• Benguet

• Kalinga

• Mountain Province

• Cagayan

• Isabela

• Nueva Vizcaya

• Batangas

• Quezon

• Puerto Princesa City

• Tacloban City

• Iligan City

• Davao City

• Lanao del Sur

Sa ngayon ay umakyat na sa 1,028,738 ang kabuuang bilang ng COVID-19, kung saan 69,354 ang active cases, mula sa 8,276 na nagpositibo kahapon.

Nananatili namang Quezon City ang may pinakamataas na kaso sa buong NCR.