‘Pagkain ng mga Pinoy’, top priority ng gobyerno

ni Nancy Binay - @Be Nice Tayo | June 22, 2022

Kamakailan, inihayag ni President-elect Ferdinand “Bongbong” Marcos, Jr. na pansamantala niyang pamumunuan ang agriculture portfolio ng pamahalaan.

Pabor tayo sa desisyong ito ng pangulo lalo pa’t dumaranas tayo ng patuloy na food insecurity dahil sa iba’t ibang salik tulad ng digmaan sa Ukraine, pandemya, sunud-sunod na bagyo at African swine fever.

Kung pangulo mismo ang namumuno sa sektor ng agrikultura, masisigurong hindi lang nakatuon sa isang departamento, kundi buong pamahalaan ang masusuri at kikilos para tugunan ang lumalalang problema ng sektor.

Maganda rin ang mensaheng ipinamamalas nito sa ating mga kababayan dahil ipinahihiwatig na top priority ang pagsigurong may makakain ang pamilyang Pilipino.

Umaasa tayong magtatagumpay ang pamahalaan sa layuning maisaayos ang produksyon ng ating mga magsasaka’t mangingisda nang matustusan ang pangangailangan sa pagkain.

☻☻☻

Usap-usapan din ang pag-review sa implementasyon ng K-to-12 program.

Napapanahon ang review upang masukat natin kung epektibo ba ang edukasyong natatanggap ng ating mga mag-aaral.

Matatandaang ayon sa isang ulat ng World Bank, mahigit 80% ng estudyanteng Pilipino ay kapos sa minimum proficiency levels o ang antas ng dapat alam nila bases sa edad o grade level.

Ayon naman sa National Economic Development Authority, nasa P11 trillion ang productivity loss sa susunod na 40 taon dahil sa isang taong walang face-to-face schooling dahil sa pandemya.

Ito ang ilan sa mga hamon na hinaharap natin sa sektor ng edukasyon, kung kaya kailangan ng komprehensibo at strategic na pagtugon sa krisis. Ang pag-review sa K-to-12 ay simulaing nararapat na gawin upang matukoy natin ang susunod na hakbang.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Maligayang araw ng mga tinaguriang ‘Haligi ng Tahanan’

ni Nancy Binay - @Be Nice Tayo | June 19, 2022

Happy Father’s Day!

Ang ating mainit na pagbati sa lahat ng ama, tatay, itay, father, daddy, dad, pudra, ‘tay-‘nay (tatay na, nanay pa) o ano pa mang tawag natin sa ating mga haligi ng tahanan ngayong araw nila.

Kinikilala natin ang kanilang mga ambag upang maging kapaki-pakinabang na bahagi tayo ng lipunan — mula sa pag-aaruga at paggabay, maging ang kanilang mga sakripisyo at pagpupunyagi.

Partikular nating binibigyang-pugay ang mga ama ng tahanan ng pamilyang Binay: ang aking amang si dating Vice-President Jojo Binay, ang aking kapatid na si Junjun, ang mga asawa ng aking mga kapatid, at ang aking asawang si Pete.

Ang aking ama ang isa sa aking mga unang guro, samantalang ang asawa kong si Pete ang aking katuwang at sandigan sa pagpapalaki ng aming apat na anak.

Hindi rin matatawaran ang pagganap ng aking kapatid na si Erwin bilang ‘Tay-Nay’ sa kanyang apat na anak, at ang mahusay na pagpapalaki ng aking mga bayaw sa aking mga pamangkin.

Muli, isang maligaya at makabuluhang araw sa ating mga ama! Nawa’y patuloy silang maging malusog at matibay na sandigan ng ating mga pamilya at lipunan.

☻☻☻

Nais din natin bigyang-pugay ang ating bayaning si Jose Rizal sa kanyang ika-161 na kaarawan sa araw na ito.

Manatili sanang nag-aalab sa ating mga puso ang mga aral na ibinahagi niya, lalo na ang pagmamahal sa ating pamilya at bayan.

Maging gabay rin sana natin ito, lalo na sa laban kontra inhustisya at kawalang damdamin sa mga araw-araw na pinagdaraanan ng ating mga kababayan.

Gamitin din natin ito para sa pagpapabuti ng ating kapwa Filipino at mabigyan sila ng mas magandang Pilipinas, na malaya mula sa kawalang hustisya, kahirapan, at misedukasyon.

Mabuhay si Gat Jose Rizal!

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Ayuda sa mahihirap nating kababayan, larga!

ni Nancy Binay - @Be Nice Tayo | June 16, 2022

Sisimulan ng Department of Social Welfare and Development ang pagbibigay ng ayuda sa mga naghihirap na pamilya sa katapusan ng buwan ng Hunyo.

Ayon kay DSWD spokesperson Irene Dumlao, bago matapos ang buwan ay ibibigay ang financial aid na P500 sa tinatayang 12.4 million households sa buong bansa.

Dagdag pa niya, kasama sa mga makatatanggap ay mga 4Ps beneficiaries, social pension beneficiaries at iyong mga tumanggap ng unconditional cash transfer mula 2018 hanggang 2020.

Matatanggap ang nasabing ayuda sa loob ng anim na buwan at maaari itong ma-claim sa pamamagitan ng cash cards. Mahahanap naman ng mga beneficiary na walang cash card ang kanilang pangalan sa listahang ilalabas ng pamahalaan na naglalahad ng alternatibong paraan para makuha nila ang ayuda.

Ang naturang ayuda ay ipamimigay alinsunod sa direktiba ni Pangulong Rodrigo Duterte na mag-roll-out ng P500 monthly subsidy upang matulungan ang mahihirap na pamilya sa gitna ng epekto sa mga bilihin ng patuloy na pagtaas ng presyo ng langis.

Umaasa tayong sisiguruhin ng DSWD na malinis ang listahan ng mga benepisaryo at maiiwasan ang mga double entry, maging ang pagbilang sa mga taong hindi naman kuwalipikadong tumanggap ng ayuda.

Nawa’y sa lalong madaling panahon ay maipaabot natin sa ating mga kababayan ang tulong.

☻☻☻

Ibayong pag-iingat ang kailangan sa kabila ng pagtaas muli ng kaso ng COVID-19 sa bansa.

Nitong Linggo ay nagtala ang bansa ng 308 bagong kaso ng COVID-19, na siyang pinakamataas na bilang sa loob ng dalawang buwan.

Ayon sa Department of Health, bagama’t tumataas ang bilang ng kaso, hindi pa naman ito nagresulta sa mas mataas na hospitalization at intensive care unit utilization rates.

Patuloy nating obserbahan ang mga health protocols upang maiwasan ang pagkalat ng virus.

Hinihikayat din natin ang mga eligible na magpaturok ng booster shot para sa dagdag-proteksyon.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay