Bagong hamon sa edukasyon, agad aksyunan

ni Nancy Binay @Be Nice Tayo | Nov. 21, 2024

Dahil sa sunud-sunod na kalamidad na tumama sa bansa, muli na namang naantala ang edukasyon ng ating kabataan.

Ayon sa Department of Education, nasa 35 school days na ang nawala sa ibang paaralan sa bansa dahil sa bagyo at ibang kalamidad.

Sa Cordillera Administrative Region, 35 school days ang nawala, na siyang pinakamataas na bilang sa buong bansa.

Sinundan ito ng Cagayan Valley, Ilocos, Calabarzon, at Central Luzon na nawalan ng 29 school days dahil sa bagyo at maging man-made hazards gaya ng sunog.

Nasa 239 paaralan ang natukoy na “very high risk” sa “learning losses” dahil sa dalas ng pagtama ng kalamidad sa kanilang lugar. 

Samantala, 4,771 paaralan na may 3,865,903 mag-aaral naman ang itinuturing na “high risk.”

Nasa 377,729 estudyante ang na-displace dahil sa malubhang pagkapinsala ng kanilang mga paaralan.

☻☻☻

Sinusuportahan natin ang pagkilos ni DepEd Sec. Sonny Angara upang sa lalong madaling panahon ay maipagpatuloy ang pag-aaral ng mga bata sa mga lugar na naapektuhan ng kalamidad.

Sa isang memorandum, inatasan ni Sec. Angara ang mga field officer ng ahensya na i-activate ang mga disaster response team at magsumite ng quick assessment sa pinsala sa mga paaralan. Inatasan din sila na ilista ang bilang ng mga eskwelahang apektado ng pagbaha at landslide, maging ang bilang ng estudyante, guro, at school staff na apektado at kung anong kailangan upang makabangon sila sa epekto ng kalamidad.

Dinirekta niya rin ang mga opisyal ng mga paaralan na magsagawa ng, “clean-up or clearing operations, minor repairs to temporary learning spaces, emergency school feeding and temporary water, sanitation and hygiene facilities to enable a safe learning environment and facilitate immediate access to education.”

Sinabi rin ni Angara na kailangang mag-implementa ang mga paaralan ng alternative delivery modes at ang Dynamic Learning Program (DLP) para sa mga mag-aaral na hindi pa makabalik sa eskwela dahil sa pagkapinsala ng mga imprastraktura o pag-alala sa kanilang kaligtasan.

☻☻☻

Patuloy pa rin ang krisis sa edukasyon, at nangangamba tayong lalo pang malulugmok ang sektor dahil sa epekto ng krisis sa klima.

Sa lalong madaling panahon ay kailangang makahanap tayo ng solusyon upang masiguro na patuloy na makakapag-aral ang ating mga estudyante sa harap ng bagong realidad na dala ng mas malalang epekto ng nagbabagong klima.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Usapang 2025 budget ng mga ahensya gobyerno, arangkada na

ni Nancy Binay @Be Nice Tayo | Nov. 17, 2024

Tuluyan na ngang umarangkada sa plenaryo ng Senado ang mga debate para sa budget ng iba’t ibang ahensya ng pamahalaan.

Una nang inaprubahan ang panukalang badyet ng Office of the President at Office of the Vice President.

Samantala, itinanong naman natin sa budget deliberations ng DHSUD, NHA at Pag-IBIG kung naipaunawa ba nang maayos sa mga benepisyaryo ng 4PH condo-housing ng pamahalaan ang magiging responsibilidad nila pagdating sa mga iba pang bayarin tulad ng association dues, common-use areas, security, maintenance, at amilyar.

Magkaiba ang manirahan sa isang condominium at sa isang regular na bahay. Inaalala natin na bagama’t mura’t maganda ang layunin ng programang pabahay ng gobyerno, hindi lubos na naiintindihan ng mga benepisyaryo kung ano ang mga napapaloob sa amortisasyon na aabutin ng 30 taon.

Nais din natin malaman kung nasa mandato ba ng Pag-IBIG ang magkolekta ng association dues o iba pang bayarin sa ngalan ng homeowners.

Mas mainam na pag-aralan pa ng DHSUD ang pag-iisip, gawi’t kilos ng mga resipyente ng 4PH upang mas maayos na mabalangkas ang programa para sa medium-rise housing lalo na sa mga informal settler families.

☻☻☻

Palagi nating tinatanong tuwing budget deliberations ng DND at OCD, at inaalam natin kung gaano ba tayo kahanda kaugnay sa pagresponde kapag may mga kalamidad at sakuna?

‘Di pa man natatapos ang 2024, umabot na sa P150 bilyon ang mga nasirang imprastruktura at mga napinsalang produktong agrikultura dulot ng mga nakaraang 12 bagyo’t mga kalamidad.

Bukod sa preparedness trainings, kailangan din natin ng karagdagang kagamitan at prepositioned supplies upang madali at mabilis tayong makapagresponde.

Gusto nating malaman, in terms of equipment and resources, kung gaano tayo kahanda para sa mga operasyon ng pagsagip sa panahon ng sakuna.

Tuloy pa rin ang pagbusisi natin sa budget ng iba’t ibang ahensya sa susunod na linggo at makakaasa ang lahat na titiyakin natin na ang pondo ng bayan ay magagamit ng tama.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Trauma na nararanasan ng mga binagyo, resolbahan

ni Nancy Binay @Be Nice Tayo | Nov. 14, 2024

Dahil sa sunud-sunod na pananalasa ng bagyo, isang isyu na kailangang pagtuunan ng pansin ng pamahalaan ay ang “typhoon fatigue” na dinaranas ng mga naapektuhan ng bagyo.

Matinding trauma ang naidudulot ng kalamidad sa mga evacuees na paroo’t parito sa kanilang tahanan at evacuation center, lalo na sa mga bata.

Mula nang tumama ang Bagyong Julian noong huling linggo ng September, nagsunud-sunod ang pagpasok ng mga cyclone sa bansa, lalo na sa nakaraang tatlong linggo. Sa Northern Luzon, tumama ang lima sa huling anim na cyclone na pumasok sa bansa.

☻☻☻

Mahalagang tugunan ang malawakang depresyon na dala ng kawalan ng pag-asa at takot na posibleng maranasan ng ating mga kababayan.

Magandang hakbang ang paglagay ng mga prayer room, counseling desk, at maging study area sa mga evacuation center na binanggit ni Civil Defense Administrator Ariel Nepomuceno na ginagawa na.

Kailangan ding magbigay ng follow-up at monitoring services ang mga ahensya gaya ng Department of Health at Department of Social Welfare and Development sa mga nakaranas ng trauma dahil sa bagyo.

☻☻☻

Ngunit bukod sa agarang pagtingin sa mental health ng ating mga kababayan, ang pinakamainam na gawin ng pamahalaan ay ipakita na may ginagawa ito upang mabigyan ng seguridad ang ating mga pamayanan laban sa lumalalang epekto ng nagbabagong klima.

Ito ang bagong realidad natin, kaya’t sa lalong madaling panahon ay kailangang tutukan na natin ang mga dapat gawin upang maging mas handa tayong harapin ang pinakamalaking hamon ng kasalukuyan at hinaharap.

Sa ating mga kababayang nasalanta, huwag tayong mawalan ng pag-asa. Magtutulungan tayo upang malagpasan ang pagsubok na ito.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay