Access sa bakuna, gawing simple at madali

ni Nancy Binay - @Be Nice Tayo | August 21, 2022

Pagkatapos ng mahigit dalawang taon ng pag-iingat, nalulungkot tayong ipaalam na nitong mga nakaraang araw ay nag-positive ang inyong lingkod sa antigen test para sa COVID-19.

Kasalukuyan akong nasa isolation upang maiwasan ang pagkalat ng virus.

Hinihiling ko ang panalangin ninyo para sa aking pamilya at para na rin sa mga kapwa ko Senador na nagkasakit din, para sa aming tuluyang paggaling.

Ngunit asahan ninyong hindi man personal na makadadalo sa mga hearing at session sa Senado, tututukan pa rin natin ang mga responsibilidad, salamat na rin sa teknolohiya.

☻☻☻

Sasamantalahin ko ang pagkakataong ito na himukin ang ating mga kababayan, lalo na sa mga nasa Metro Manila, na patuloy na mag-ingat sa gitna ng banta ng COVID-19.

Kasalukuyan tayong nasa COVID-19 surge at bagama’t ayon sa OCTA Research ay patuloy na bumababa ang positivity rate sa Metro Manila simula noong unang linggo ng August, ibayong pag-iingat pa rin ang kinakailangan. Ito ay dahil kailangan daw na sunud-sunod ang pagbaba ng weekly positivity rate para maging tiyak na naabot na nga ang peak ng surge.

Ayon sa OCTA, mula 17.3 percent noong August 7 ay bumaba sa 16.1 percent sa August 14 ang 7-day positivity rate ng Metro Manila.

☻☻☻

Nakikiusap din tayo na lalo pang paigtingin ang vaccination efforts kontra COVID-19.

Magbabalik-eskwela na tayo sa August 22 at lalong lalaki ang tyansa na mahawaan ng COVID-19 dahil sa dumarami rin ang nakakasalamuha natin.

Mabisa ang bakuna sa pagpapahina ng sintomas na maaaring maranasan at lalo na para maiwasan ang pagkaka-ospital dahil sa virus.

Kung kaya, nananawagan tayo sa pamahalaan na lalo pang paigtingin ang paghikayat sa mga kababayan natin na magpabakuna at lalong padaliin ang access para rito.

Kailangan ring lalo pang palakasin ang pagpapatupad ng mga minimum health and safety protocols upang aktibo nating naaaksyunan ang pagpapababa ng kaso ng impeksyon.

Nawa’y sa lalong madaling panahon ay makaraos tayo sa panibagong pagsubok na ito.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Dapat bigyang-pansin ng gobyerno… Nagmimistulang “waterworld” ang 'Pinas kapag malakas ang ulan, tsk

ni Nancy Binay - @Be Nice Tayo | August 14, 2022

Nitong mga nakaraang araw ay nagmistulang “Waterworld” ang maraming lugar sa Pilipinas na dulot ng habagat o southwest monsoon.

Pinalakas pa ang pag-ulan dahil sa isang low pressure area (LPA), kung kaya’t marami sa ating mga kababayan ang naabala dahil stranded, binaha o kaya’y napilitang maghanda para lumikas.

Napapansin nating tuwing panahon ng tag-ulan ay lalong lumalakas ang mga pag-ulan, kung kaya’t dapat nating itong paghandaan.

Ngunit hindi lang dapat tayo maghanda.

☻☻☻

Dapat din nating kalampagin ang pamahalaan na umaksyon laban sa climate change at himukin ang iba pang bansa na kumilos upang maibsan ang epekto ng lumalalang epekto ng pagbabago ng klima.

Ayon sa mga pag-aaral, isa ang Pilipinas sa mga disaster-prone na bansa sa buong mundo. Nasa 8th place tayo sa 2021 World Risk Index, na may score na 21.39. Noong 2020 naman ay nasa 9th place tayo, na may score na 20.96. Ang WRI ay pagsukat ng “risk of disaster” na bunga ng mga extreme natural events, tulad ng mga bagyo, lindol at pagsabog ng bulkan.

Alam nating lahat na ang Pilipinas ay nasa typhoon belt at bulnerable tayo sa extreme weather events, tulad ng super Bagyong Yolanda. Nasaksihan natin ang direktang epekto nito sa bansa, kung kaya’t kailangan na natin ng agarang aksyon.

Hindi sapat na pinag-uusapan lang ito sa loob ng mga classroom, dapat palawakin na ang diskusyon nito mula sa mga barangay hanggang sa Pangulo ng bansa.

☻☻☻

Kung kaya’t kahanga-hanga ang ginawa ng lungsod ng Makati sa pagdedeklara ng “climate emergency”.

Maaaring maliit na bagay lamang ito para sa ilan, ngunit binubuksan nito ang diskusyon sa pinakamataas na decision-making body ng naturang lungsod.

Isa ito sa mga dapat nating gawin, ang buksan ang mas marami pang pinto upang pag-usapan ang climate change at pataasin ang antas ng awareness, mitigation at adaptation ng lahat.

Ang Senado ay handa naman upang muling aralin ang National Climate Change Action Plan katuwang ang iba’t ibang ahensya ng pamahalaan upang magtakda ng mga prayoridad at aksyon, lalo na sa mga rehiyon at LGU na lubhang bulnerable.

Hindi dapat nating makalimutan ang epekto ng Yolanda sa ating mga kababayan at sa bansa. Marami pang mangyayaring katulad na sitwasyon kung tayo ay hindi aaksyon agad.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Ano ba talaga ang pelikulang 'Maid in Malacañang'?

ni Nancy Binay - @Be Nice Tayo | August 12, 2022

Nitong nakaraang linggo ay "trending" sa social media ang kontrobersyal na eksena sa pelikulang Maid in Malacañang.

Kabilang tayo sa mga umalma sa eksenang ito na inilalarawan ang karakter ni dating Pangulong Cory Aquino na naglalaro ng mahjong kasama ang Carmelite Sisters sa Cebu.

Nakababahala ang ganitong pagsingit ng mga hindi tiyak na pangyayari dahil ayon sa mga lumikha ng Maid in Malacañang, base raw sa historical account ang pelikula.

Kung tunay ngang ganito, sana ay nagsentro na lang sila sa first-hand accounts ng mga tao na naroon noong mga panahon na 'yun o hindi kaya'y nag-self-policing na lang sila sa mga eksenang mahirap mapatotohanan kung tunay ngang nangyari o hindi.

Malinaw ang malisya sa pagsingit ng eksenang ito. Malinaw rin na pagbaluktot ito sa katotohanan.

☻☻☻

Ano ba talaga ang pelikulang Maid in Malacañang?

Naratibo ba ito ng isang panig ng kasaysayan o fictional work lamang? Dahil kung wala namang dokumento ang direktor at manunulat para patunayan ang katotohan ng inilalarawan nila, ang disente at nararapat na gawin ay tanggalin ang mga eksenang hindi totoo o hindi mapatutunayan.

Hindi maaaring magtatago tayo sa talukbong ng pagkamalikhain at sabihing sining ang isang gawa, para manirang-puri o hindi kaya’y maminsala ng reputasyon—ang mga lumilikha ng sining ay may moral na tungkulin na itaguyod ang katotohanan sa kanilang nililikha.

Hindi puwede iyong itutumbas natin ang 'daw' sa katotohanan—'ganito raw' sinabi, 'ganyan daw’ nangyari.

☻☻☻

At sa usapin ng paghilom ng bansa—paano tayo magkakaisa kung hinahayaan nating umiral ang malisya at pagbaluktot sa katotohanan?

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay