'Pinas, pasok sa Top 10 Friendliest na bansa sa buong mundo

ni Nancy Binay - @Be Nice Tayo | October 9, 2022

Malaking boost sa industriya ng turismo ang muling pagkakahirang ng Pilipinas bilang isa sa mga top destinations sa buong mundo at Asya.

Humakot ng pagkilala ang bansa at ang mga destinasyon at resort natin, sa Readers’ Choice Awards 2022 ng international travel magazine na Conde Nast.

Hinirang ng mga mambabasa nito bilang pang-10 ang Pilipinas sa mga friendliest na bansa sa buong mundo.

Nasa ika-30 puwesto naman ang Pilipinas sa mga bansang best to travel to sa buong mundo sa nasabing magazine.

☻☻☻

Nasa 1st at 8th place naman ang Boracay at Palawan sa mga Best Islands in Asia, ayon sa Conde Nast.

Hinirang naman na 27th Best Resort in the World ang Shangri-La Boracay, samantalang nasa 40th ang El Nido Resorts - Pangulasian Island.

Pagdating sa top resorts sa Asya, nasa 5th place ang Shangri-La Boracay, 8th ang El Nido Resorts - Pangulasian Island, at 20th place naman ang Shangri-La Mactan Resort and Spa sa Cebu.

Pagbati at pagpupugay sa ating lahat! Nawa’y ipagpatuloy at paghusayan pa natin ang kalidad ng serbisyo at pagpreserba sa ating tourist destinations upang manatili sa listahan at umangat pa.

☻☻☻

Ngunit ipinapakita lamang ng listahan ng Conde Nast na malaki pa ang kailangang i-improve ng Pilipinas pagdating sa turismo, lalo na kung ihahambing sa mga kasapi ng ASEAN.

Kung titingnan ang Best Countries to Travel To list ng magazine, nasa ikatlo at ikaapat na puwesto ang Thailand at Singapore, samantalang nasa ika-27th place naman ang Malaysia.

Bagama't unti-unti nang lumalago ulit ang bilang ng mga turista sa ating bansa, malayo pa rin ito sa mga bilang na naitala bago ang pandemya.

Noong 2019 ay nakapagtala tayo ng 8.26 milyong turista, na bumagsak naman noong kasagsagan ng pandemya. Ngayon ay medyo nakakabawi na tayo, dahil mayroon na tayong 1.6 million arrivals so far.

☻☻☻

Sa pagkakaorganisa ng Senate Committee on Tourism, na kung saan ang inyong lingkod ang Chairperson, tutulong tayo sa pagbabalangkas ng polisiya na makatutulong sa industriya.

Kailangan po nating mag-adjust sa panibagong hamon ng panahon kung nais nating muling bumangon ang industriya ng turismo sa ating bansa.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Katarungan sa pamamaslang kay Percy Lapid

ni Nancy Binay - @Be Nice Tayo | October 6, 2022

Noong Lunes ng gabi, pinaslang ang beteranong mamamahayag na si Percival Mabasa, na mas kilala bilang Percy Lapid, malapit sa kanyang tirahan sa Las Piñas City.

Kilala si Ginoong Lapid dahil sa programa niyang “Lapid Fire,” kung saan buong-tapang niyang tinatalakay ang mga katiwalian at kontrobersya sa pamahalaan.

Kinukondena natin ang pagpaslang kay Percy Lapid.

Nakikiramay din tayo sa kanyang pamilya at kasama sa nanawagan ng katarungan.

☻☻☻

Isa tayong demokrasya na ginagarantiya ang malayang pagpapahayag.

Nababahala tayo dahil ang pagpaslang sa ating mga journalist ay maaaring magkaroon ng “chilling effect” sa pagpapahayag ng taliwas na opinyong, lalo pa sa panahon ngayon na lumalala ang pangre-redtag at pananakot sa mga taong may ibang pananaw sa mayorya.

Kung ang mga mamamahayag ay naparurusahan, paano na ang ordinaryong mamamayan?

☻☻☻

Nananawagan tayo sa ating mga awtoridad na sa lalong madaling panahon ay matukoy kung sino ang responsable sa pagpaslang kay Percy Lapid at sa iba pa niyang kapwa-mamamahayag na biktima ng dahas.

Umaasa tayong hindi mauuwi sa wala ang imbestigasyon ng pulisya sa mga kaso ng pagpaslang hindi lang ng mga mamamahayag, kundi pati ng mga aktibista atbp.

Kung tatandaan, nitong 2021 nanatili ang Pilipinas na “7th worst country” pagdating sa pagresolba sa pagpaslang ng mamamahayag, ayon sa Global Impunity Index ng Committee to Protect Journalists.

Kailangang masiguro ang kaligtasan hindi lamang ng iilan, kundi ng lahat ng Pilipino.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Pabagu-bagong tourism slogan, may epekto sa turismo ng bansa

ni Nancy Binay - @Be Nice Tayo | October 2, 2022

Binabati natin ang mga kalihim at may katungkulan sa pamahalaan na kinumpirma ng Commission on Appointments (CA) ang pagkakatalaga sa kanilang mga posisyon.

Isa na si Department of Tourism (DOT) Secretary Christina Frasco na ating ipinaaabot ang mainit na pagbati sa kanyang kumpirmasyon ng CA nitong nakaraang linggo.

Tulad ng ating nasabi noon, bilang Chairperson ng Senate Committee on Tourism ay nasasabik tayong magtrabaho kasama ang buong DOT family upang muling palakasin ang industriya ng turismo sa ating bansa.

Congratulations at padayon Sec. Frasco, at sa iba pang nakapasa sa CA!

☻☻☻

Noong humarap si Sec. Frasco sa confirmation hearing ng CA ay nag-suggest tayi na i-reconsider ang planong bisitahin ang tourism slogan at palitan ito.

Ayon sa kalihim, pinag-aaralan ngayon kung paano magkakaroon ng ebolusyon ang tourism slogan ng ating bansa.

☻☻☻

Posible kasing maging rason ng pagkalito ng ating potential market abroad ang pabagu-bagong tourism slogan ng bansa.

Matatandaang ilang beses na tayong nagpalit ng slogan, mula sa “Fiesta Island Philippines” noong 1989, “Wow Philippines” noong 2002, na naging “Pilipinas Kay Ganda” noong 2010, “It’s More Fun in the Philippines” (2012), “Experience the Philippines” (2016), hanggang sa kasalukuyang “It’s More Fun in the Philippines / More Fun Awaits”.

Ikumpara natin ito sa mga slogan ng ibang karatig bansa tulad ng India (“Incredible India”, 2002) at Malaysia (“Malaysia, Truly Asia”, 1999) na patuloy na ginagamit hanggang sa ngayon.

Dagdag pa rito ay ang kaakibat na gastusin upang palitan lahat ng marketing materials na gagamitin, bunsod ng pagbabago ng slogan. Partikular na rito ang gagastusin, lalo na sa ad placements abroad, na babayaran ng dolyar o iba pang foreign currency.

☻☻☻

Ayon naman sa kalihim, dadaan pa sa konsultasyon sa mga tourism stakeholders ang plano.

Ang atin pakiusap ay pag-aralang mabuti ng DOT, kasama ang mga ad at marketing agency ay ang paggawa ng pangmatagalang slogan na mananatiling relevant pa rin kahit na dumaan ang mahabang panahon.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay