Future demand ng kuryente, dapat paghandaan

ni Nancy Binay - @Be Nice Tayo | December 11, 2022

Nitong nakalipas na dalawang linggo ay nakaranas ang Luzon at Visayas grids ng pagnipis o kakulangan ng supply ng kuryente.

Ilang araw din isinailalim ng mga awtoridad sa yellow at red alert status ang ating grid system. Bagama’t wala namang naiulat na brownouts, ito ay cause of concern pa rin.

Nangangahulugang hindi sapat ang supply ng kuryente na napo-produce ng mga power plant upang punuan ang demand ng mga konsyumer. Maaaring humantong sa brownout kung hindi ito maaagapan.

Ayon sa mga kinauukulan, ilang power plants ang nagkaroon ng forced outage o hindi makapag-produce ng kuryente o kaya’y tumatakbo sa limited capacity.

☻☻☻

Hindi na bago sa atin ang pagsasailalim sa mga alert level ang ating grid system, lalo na kung ang sanhi ay ang unscheduled shutdown ng mga power plant.

Ngunit ang matagal na nating tanong ay ano’ng ginagawa ng mga awtoridad upang bigyang-solusyon ang isyu ng manipis o kulang na supply ng kuryente?

Mayroon bang bagong power plant na bubuksan sa mga susunod na taon upang makadaragdag sa supply ng kuryente ng bansa?

At ano’ng timetable nito pagdating sa pagproseso ng mga kinakailangang permit upang makagsimula na ng commercial operations?

☻☻☻

Nauna na nating iminungkahi na bawasan ang red tape sa pagpapatayo at pag-operate ng mga bagong power plant sa bansa.

Taon ang inaabot bago makakuha ng permits para sa construction, taon para sa mismong construction at taon pa rin para makakuha ng permits para sa commercial operations.

Hindi lamang pampalit ito sa mga tumatanda na nating power plants, na nangangailangan na ng mas madalas na maintenance periods.

Ito rin ay pagsabay sa inaasahang pagtaas ng demand ng kuryente, lalo na at unti-unti nang bumabalik ang “normal” na daloy ang ating ekonomiya, lalo na sa manufacturing at commercial sectors.

Ito rin ay paghahanda sa palaging mataas na demand ng kuryente sa ating dry o “summer” season. At dahil sa epekto ng climate change, hindi na lamang ito nararanasan tuwing Marso hanggang Mayo.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Pag-aralang maigi kung paano isasagawa ang Sovereign Wealth Fund

ni Nancy Binay - @Be Nice Tayo | December 9, 2022

Tinatalakay ngayon sa House of Representatives ang paglikha ng P275-billion sovereign wealth fund, na mabubuo mula sa iba't ibang pondo na mula sa Land Bank of the Philippines, Development Bank of the Philippines at national budget.

Dagdag pa rito, na siyang pinagmumulan ng pagtutol mula sa iba't ibang sektor ay ang paglikom ng pondo mula sa Government Service Insurance System (P125 bilyon) at Social Security System (P50 bilyon).

☻☻☻

Kailangang pag-aralan muna natin nang maigi kung paano ba isasagawa ang sovereign wealth fund.

Kailangan natin ng mas maraming komprehensibo at malinaw na talakayan tungkol dito, lalo na sa usapin ng pagkuha ng pondo mula GSIS at SSS dahil pera natin lahat 'yan. Retirement fund ng sambayanan 'yan, eh.

Bilang myembro ng SSS at GSIS, tulad ng karamihan sa mga manggagawa’t empleyado sa bansa ay inaasahan nating magagamit natin ang contribution sa panahon na magreretiro na tayo.

Mahalagang malaman kung ano ang magiging epekto ng wealth fund sa perang ipinundar natin nang matagal, na isinantabi para makapamuhay pa rin tayo kahit wala nang trabaho.

☻☻☻

Ano ba ang opinyon ng academe, ng mga expert at ng mga kababayan nating maapektuhan nito?

Mahalagang magkaroon ng direktang konsultasyon sa lahat ng stakeholder para sa ganitong panukala na may malawakang epekto sa lipunan.

Sana'y hindi tayo magpadalus-dalos sa usaping ito.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

National Museum of the Philippines, may bagong branch sa Dumaguete City, Negros Oriental

ni Nancy Binay - @Be Nice Tayo | December 4, 2022

Kilala ang Dumaguete City sa lalawigan ng Negros Oriental bilang travel hub,

dahil sa naggagandahang beach resorts, diving spots at natural parks na nakapaligid dito. Isa rin itong sikat na jump-off point sa pamoso at karatig isla ng Siquijor.

Ngunit pihadong hindi na lamang darayuhin ang lungsod dahil sa malalapit na atraksyon at popular nitong panghimagas na silvanas at sans rival.

Binuksan kasi noong nakaraang linggo ang pinakabagong regional branch ng National Museum of the Philippines sa lungsod na ito.

☻☻☻

Ang National Museum Dumaguete ay nakalagak sa dating Presidencia o City Hall ng lungsod, na ni-renovate at ni-restore gamit ang original na plano ng kilalang arkitekto na si Juan Arellano. Kabilang ang Metropolitan Theater, Legislative Building (na ngayo’y National Museum of Fine Arts) at Manila Central Post Office Building sa mga kilalang obra ni Arellano.

Itinayo ang Dumaguete Presidencia noong 1937 at isang halimbawa ng pre-war building. Idineklara itong Important Cultural Property (ICP) noong 2019 dahil na rin sa “cultural, artistic and historical significance” nito. Kasama sa pagbubukas ng museo ang unveiling ng marker na nagdedeklara sa Presidencia bilang ICP.

Makikita sa dalawang palapag ng museo ang mayamang natural history at culture ng Dumaguete, Negros Oriental, Siquijor, at Central Visayas. Sa unang palapag ay may mga exhibit tungkol sa terrestrial at marine biodiversity ng Negros Island, pati na geology at mineral resources nito. Sa ikalawang palapag naman ay itinatanghal ang architectural at cultural wealth ng rehiyon, sa pamamagitan ng artifacts, relics at scale models ng built heritage.

☻☻☻

Bilang permanent alternate sa Board of Trustees ng National Museum, binabati natin ang pamunuan at staff ng NM sa pangunguna ni Director-General Jeremy Barns; at sina Dumaguete Mayor Felipe Remollo at iba pang opisyal ng lungsod para sa proyektong ito.

Isang magandang halimbawa ang proyekto ng pakikipagtulungan ng national at local governments upang palawakin pa ang appreciation o pagpapahalaga at pag-unawa sa mga lokal na kultura, kasaysayan at tradisyon.

Sinusuportahan natin, bilang chairperson ng Senate Committee on Tourism at vice-chairperson naman ng Senate Committee on Culture and Arts, ang mga proyektong ganito.

Isang paraan ito upang lalo pang paunlarin ang ating industriya ng turismo at lalo pang mapangalagaan ang mga lokal na kalinangan o kultura at karunungan.

Tumutulong din ito upang mapreserba ang mga lumang istruktura, relics, at artifacts; at ilapit ito sa mga tao, pati na ang mga importanteng kaganapan, kaalaman at kasaysayan, hindi lamang ng lokal na pamayanan, kundi nating lahat bilang mga Pinoy.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay