Hinaing ng taumbayan ang dapat pag-usapan, at hindi ang Chacha at Maharlika Fund

ni Nancy Binay @Be Nice Tayo | February 19, 2023

Chacha season na naman.

Hindi sayawan, kundi ang tila kada taon na lang na pagtalakay sa Charter Change o pag-amyenda ng ating Konstitusyon.

Panahon na nga ba para palitan ang Konstitusyon? Para sa akin, hindi pa.

Ngayon pa lamang tayo muling bumabangon mula sa dagok ng pandemya.

Napakaraming kailangang ayusin dahil sa pagkalugmok ng bansa at ng mga kababayan natin, pangunahin na ang record inflation at potential na global recession.

Ang kailangang tutukan ng buong pamahalaan, kasama na ang Kongreso ay ang pagtugon sa hinaing ng mga kababayan nating hirap na hirap dahil sa patuloy na pagtaas ng presyo ng pagkain at iba pang bilihin.

Darating ang panahon na maaaring pag-usapan ang charter change, ngunit huwag na muna ngayon.

☻☻☻

Patuloy din ang diskusyon tungkol sa panukalang Maharlika Investment Fund.

Nitong nakaraang linggo ay tinalakay rin ito sa Senado.

Hindi pa rin ako kumbinsido sa panukalang ito, lalo pa’t tila hindi handa ang pamahalaan sa pag-operationalize nito.

Kahit ang mga basic na requirement sa ganitong gawain, kagaya ng business plan o feasibility study ay hindi naipresenta ng mga naatasang ipagtanggol ito sa hearing ng Senate Committee on Banks, Financial Institutions and Currencies.

Kung nais talagang ituloy ang MIF, kailangang masiguro ng pamahalaan na all bases are covered.

Masyadong malaking pera ang nakasalalay sa pagpapaandar nito, kaya marapat lamang na gawin ang lahat ng kailangan gawin para maprotektahan ang interes ng mga kababayan natin.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin

Unahin ang problema sa presyo ng bilihin, Con-Ass tsaka na

ni Nancy Binay @Be Nice Tayo | February 16, 2023

Umugong muli ang usapin tungkol sa Charter Change matapos maghain sa Senado ng isang resolution na nagnanais amyendahan ang ating 1987 Constitution sa pamamagitan ng constituent assembly (Con-Ass).

Naniniwala ang inyong lingkod na hindi prayoridad ang Con-Ass dahil kung pag-uusapan ang economic provisions ng ating Konstitusyon, marami na tayong naipasang batas pagdating sa economic liberalization at global competitiveness.

Ilan lamang dito ay ang Public Service Act (PSA), Retail Trade Liberalization Act at ang Foreign Investments Act.

Nasasaklaw na ng mga batas na ito ang mga kakulangan sa probisyon sa Konstitusyon at sagot sa mga isyu ng foreign equity limitation sa utilities, power, telecoms, transport at aviation, infrastructure, at iba pang sektor.

Naniniwala tayo na sapat na ang mga batas na ito para tulungan tayong bumangon mula sa epekto ng pandemya at tuluyang sumigla ang ating ekonomiya.

☻☻☻

Masyadong divisive ang charter change at ang mahalagang pagtuunan ng pansin ngayon ang mga isyu na direktang nakakabit sa sikmura tulad ng presyo ng mga pangunahing bilihin at mga problema sa agrikultura.

Tutukan din natin ang health sector at bigyang-pansin ‘yung mga isyu sa marginalized sectors kagaya ng ating mga magsasaka't mamamalakaya.

Mahaba-haba pa ang listahan ng mga problema natin na dapat ayusin at kung priorities lang naman ang pag-uusapan, ang usapin ng Charter Change ay medyo lihis sa kumakalam na sikmura— hindi kasama ang Con-Ass sa ulam ng bawat pamilyang Pilipino.

☻☻☻

Bukod sa Con-Ass, pinag-uusapan din ngayon ang pag-ratipika ng Regional Comprehensive Economic Partnership Agreement (RCEP) na naglalayong mawala ang barriers and restrictions pagdating sa imported at exported na mga produkto.

Bagama't maganda ang intensyon nito, naniniwala tayo na hindi ito dapat madaliin.

Kailangan nating pakinggan ang mga isyung kakaharapin ng mga essential sectors.

Kailangang mahimay talaga ang mga katanungan at mapaghandaan din ng mga ahensya at ibang sektor ang pagpapatupad nito.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin

DENR at PHILSA, joint forces sa paglikha ng Natural Resources at geospatial database

ni Nancy Binay @Be Nice Tayo | February 9, 2023

Kamakailan lang ay inanunsyo ng Department of Environment and Natural Resources (DENR) na magbabakas sila at ang Philippine Space Agency (PhilSA) upang lumikha ng national environment and natural resources geospatial database.

Sakop ng partnership na pinasok ng dalawang ahensya ang progress monitoring para sa National Greening Program (NGP), at pagtatag ng komprehensibong national geospatial database para sa Environment and Natural Resource Accounting (ENRA) program, kasama na ang koleksyon ng impormasyon tungkol sa klima at pagsasagawa ng analysis.

Lilikha ang PhilSA ng mga mapa, systems, at tools sa national level para suriin ang mga kahinaan at epekto ng climate change at mga sakuna. Tutulungan din nito ang DENR sa pag-monitor ng mga NGP area at iba pang gubat sa pamamagitan ng remote sensing, artificial intelligence, at geographic information systems.

Magmumula sa DENR ang mga data na kailangan ng PhilSA.

Natutuwa tayo na gagamit ang pamahalaan ng siyentipikong pamamaraan upang tugunan ang mga isyung kinakaharap natin, lalo na sa pagprotekta sa kalikasan sa harap ng krisis sa klima.

☻☻☻

Tinatalakay din namin sa Senado ang committee report para sa Cultural Mapping bill.

Ang cultural mapping ay tumutukoy sa sistematikong mga gawain at metodolohikal na proseso para sa paggalugad, pagdiskubre, pagdokumenta, pagsuri, pag-interpreta, pagpresenta, at pagbahagi ng impormasyon tungkol sa mga pamanang-lahi ng mga komunidad sa bansa.

Kinikilala ng United Nations Educational, Scientific and Cultural Organization (UNESCO) ang halaga ng cultural mapping sa pagpreserba sa ating mga tangible at intangible cultural assets.

☻☻☻

Layunin ng panukalang-batas na amyendahan ang Republic Act No. 10066 o National Cultural Heritage Act of 2009 at imamandato ang mga lokal na pamahalaan na magsagawa ng cultural heritage mapping ng tangible, intangible, natural, at built heritage sa kanilang mga komunidad.

Kikilalanin din ang karapatan ng ating mga indigenous peoples na magsagawa ng kanilang sariling cultural mapping.

Lilikha rin ng Cultural Mapping, Research, and Planning Division sa ilalim ng National Commission for Culture and the Arts, at ng Joint Congressional Oversight Committee upang matutukan ang implementasyon ng cultural mapping sa buong bansa.

Umaasa tayo na sa tulong ng panukalang-batas na ito ay maging mas matagumpay tayo sa pangangalaga sa pamana ng ating lahi na mahalagang salik ng ating kaakuhan bilang mga Pilipino.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin