Senado, iimbestigahan ang planong bagong BuCoR headquarters sa Masungi Georeserve

ni Nancy Binay @Be Nice Tayo | March 2, 2023

Noong mga nakaraang araw ay naging laman ng balita ang paglahad ng Bureau of Corrections na plano nilang gawing headquarters ang Masungi Georeserve sa Rizal.

Base raw sa Proclamation No. 1158 na inilabas noong Setyembre 8, 2006, nakalaan ang 270 hectares na tinatawag na ‘Lot 10’ para sa pagtayo ng New Bilibid Prison.

Dagdag pa ni BuCor acting Director General Gregorio Catapang, kasama sa planong headquarters ang pag-develop ng residential area para sa kanilang personnel, at pag-implementa ng land use development plan para sa ‘basic institutional food requirements.’

☻☻☻

Marami ang nagulat sa balitang ito, na lumabas pagkatapos magsagawa ng ocular inspection ang BuCor sa Masungi.

Ilang araw matapos ang ocular inspection, sinabi ng DG Catapang na magpapatuloy ang proyekto kung magbibigay ng katiyakan ang mga eksperto, partikular ang mga urban planning experts ng University of the Philippines, na mananatiling protektado ang Masungi Georeserve.

Nagbabala ang Masungi Georeserve Foundation na may negatibong epekto sa kalikasan at maging sa sektor ng turismo ang plano ng BuCor.

☻☻☻

Dahil sa mga nangyari, inihain natin ang Senate Resolution No. 495 na nagpapatawag ng imbestigasyon sa plano ng BuCor.

Ang Masungi ay simbolo ng sustainable development at nangunguna sa mga pagsisikap na konserbahin at palaguhin ang kalikasan, lalo na sa harap ng krisis sa klima.

Dahil dito, kailangang protektahan natin ang Masungi.

Naiintindihan natin ang pangangailangan ng BuCor sa mga pasilidad na plano nitong itayo.

Ngunit kailangan ding timbangin natin kung ano ang magiging epekto sa kalikasan kung matutuloy ang pagpapatayo sa bagong BuCor headquarters.

Hindi natin dapat kalimutan na pagdating sa kalikasan, kahit ang pinakamaliit na aksyon ay may epekto sa kabuuan.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

EDSA People Power, ‘wag kalimutan

ni Nancy Binay @Be Nice Tayo | February 26, 2023

Kahapon ipinagdiwang natin ang ika-37 anibersaryo ng EDSA People Power Revolution.

Malapit sa aking puso ang People Power dahil human rights lawyer ang aking ama noong panahong ‘yun at naranasan niyang makulong dahil sa kanyang adbokasiya.

Nakalulungkot lang dahil sa kasalukuyan, tila marami ang hindi na nakikita ang halaga nito sa ating lipunan.

☻☻☻

Dapat nating ipaintindi, lalo na sa mga kabataan na walang kulay ang EDSA. Hindi ito pula, puti, asul, o dilaw.

Hindi rin ito maaaring ariin ng iilan dahil ang tunay na diwa nito ay makikita sa ating pagkakaisa at pagbabayanihan.

Higit sa lahat, mahalagang alalahanin ang EDSA dahil tagumpay ito ng karaniwang tao.

Ipinakita nito ang lakas at potensyal ng mga Pilipino na iwaksi ang pagkakaiba para makamit ang isang layunin.

Hanggang ngayon, nananatili itong buhay sa bawat adbokasiya na ating ipinaglalaban at sa ating patuloy na paghangad ng panlipunang hustisya at pagkakapantay-pantay.

☻☻☻

Noong nakaraang Linggo, pinarangalan natin sa Senado si Mr. Romeo “John” Arcilla dahil sa kanyang pagkapanalo ng Volpi Cup for Best Actor sa 78th Annual Venice International Film Festival sa Italy para sa pelikulang “On the Job: The Missing 8”.

Kilala sa kanyang pagganap bilang Heneral Antonio Luna, muli siyang nagbigay-inspirasyon at karangalan sa ating bansa.

Nakatataba ng puso na isang Pinoy ang muling kinilala at kasama na sa mga nagawaran ng prestisyosong parangal na ito.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin

Mahalagang papel ng cultural mapping

ni Nancy Binay @Be Nice Tayo | February 23, 2023

Noong nakaraang mga linggo, ibinahagi natin sa espasyong ito ang tungkol sa Senate Bill No. 1841 na nilalayong maprotektahan ang mga ‘cultural assets’ ng ating bansa sa pamamagitan ng pagsasagawa ng cultural mapping.

Ang SBN 1841 ay nakalap mula sa iba’t ibang panukalang-batas, kasama na ang aking SBN 117, pagkatapos ng pagtalakay ng Committee on Culture and Arts at Committee on Local Government.

Sakop ng cultural mapping ang mga sistematikong gawain at metodolohikal na proseso para sa paggalugad, pagdiskubre, pagdokumenta, pagsuri, pag-interpreta, pagpresenta, at pagbahagi ng impormasyon tungkol sa mga pamanang-lahi ng mga komunidad sa bansa. Mahalaga ang papel ng ating mga komunidad sa grassroots approach na ito.

☻☻☻

Napakarami nating yamang kultural at natural sa bansa.

Sa kasalukuyan, mayroon tayong anim na lugar na kinikilala ng UNESCO bilang World Heritage Sites: ang mga Baroque churches sa Miag-ao, Iloilo; Paoay, Ilocos Norte; Santa Maria, Ilocos Sur, at San Agustin sa Manila; rice terraces ng Batad, Bangaan, Mayoyao, Hungduan, at Nagacadan sa Cordillera; ang lungsod ng Vigan; Tubbataha Reefs Natural Park sa Sulu Sea; Puerto Princesa Subterranean River National Park; at Mount Hamiguitan Range Wildlife Sanctuary sa Davao Oriental.

Marami pang lugar ang maaaring mapabilang na World Heritage Site, halimbawa ng Mount Pulag, Mayon Volcano, Tabon Cave, Apo Reef, Coron, at Sibuyan Island.

☻☻☻

Subalit, masalimuot ang proseso para rito.

Kaya natin ipinaglalaban na maisabatas ang SBN 1841 ay upang makapagtatag tayo ng maayos na sistema mula sa mga komunidad hanggang sa pambansang pamahalaan.

Ngunit hindi lang natin ito ginagawa para makilala sa buong mundo.

Gaya ng nabanggit ko sa aking co-sponsorship speech para sa panukalang ito, ‘Ang bayang nakakalimot ay bayang naliligaw.’

Kailangan nating gawin ito upang masiguro na ang mga yaman ng nakaraan ay hindi magsisilbing alaala na lamang, kundi mga kayamanang matatamasa ng mga henerasyon sa kasalukuyan at kinabukasan.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal. Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin