ROTC, dahilan kaya may karahasan, pang-aabuso, at hazing

ni Nancy Binay @Be Nice Tayo | March 12, 2023

Noong Martes ay nagsagawa ng hearing ang Senate Committee on Justice and Human Rights para imbestigahan ang pagkamatay ni John Matthew Salilig na pinaniniwalaang dahil sa hazing rites ng isang fraternity.

Nakakalungkot dahil sa kabila ng pagkakaroon ng pinahigpit na RA 10053 o ang Anti-Hazing Act of 2018 ay nananatili pa rin ang pananakit ng ilang mga grupo.

Wala na ba talaga tayong takot o konsensya para ipagpatuloy ang pananakit sa ating kapwa?

Walang lugar sa isang sibilisadong lipunan ang kultura ng karahasan at dapat panagutin ang mga taong sangkot sa insidenteng ito.

☻☻☻

Hindi rin natin maintindihan kung bakit ginagamit ng ilang mga mambabatas ang insidenteng ito para isulong ang pagkakaroon ng mandatory ROTC sa bansa.

Ayon sa kanila, kailangan ang ROTC para maturuan ang mga kabataan na respetuhin ang batas, galangin ang bansa at ang kapwa.

Sa kasalukuyan, anim na panukalang-batas ang inihain sa Senado para muling ibalik ang mandatory ROTC sa mga college students sa bansa.

☻☻☻

Tila nakalimutan na ng iba na ang dahilan na kaya nasuspinde ang ROTC program ay dahil sa katiwalian, pang-aabuso at hazing.

Siguro, dapat munang ipaliwanag ng mga nagsusulong nito kung bakit ang ROTC na kanilang sinasabing may ‘tradition of discipline’ ay may mahabang listahan ng hazing cases.

Bukod dito, nais ko ring idiin na hindi hawak ng ROTC ang prangkisa ng pagdidisiplina o pagmamahal sa bayan.

Iba’t iba ang hugis ng patriyotikong pagmamahal, at lahat tayo ay may sari-sariling paraan ng hindi mapanakit na pagdidisiplina.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Hustisya sa sunud-sunod na pagpatay sa mga halal na opisyal

ni Nancy Binay @Be Nice Tayo | March 9, 2023

Mariin nating kinukondena ang pagpatay kay Negros Oriental Gov. Roel Degamo at 8 iba pang indibidwal nitong nakaraang Sabado, Marso 4.

Napatay si Gov. Degamo nang sugurin siya sa kanyang bahay ng mga armadong lalaki na may suot na pixelized uniforms habang nagpapamigay siya ng ayuda sa mga benepisyaryo ng Pantawid Pamilyang Pilipino Program (4Ps).

☻☻☻

Nababahala tayo, sapagkat pang-apat na ang nangyari kay Gov. Degamo sa mga kamakailang kaso ng pananambang sa loob lamang ng 15 araw, mula Pebrero 17 hanggang Marso 4.

Bukod kay Gov. Degamo, naging biktima rin si Lanao del Sur Gov. Mamintal Adiong, Jr. Habang nakaligtas siya at nagtamo ng ibang sugat, apat sa kanyang security detail ang sa kasamaang-palad ay namatay.

Si Aparri, Cagayan Vice Mayor Rommel Alameda at 5 pa niyang kasama ay napatay habang bumabiyahe sa Bagabag, Nueva Vizcaya. Si Datu Montawal, Maguindanao Mayor Ohto Montawal naman ay nasugatan sa hiwalay pang ambush attempt.

☻☻☻

Kaugnay ng sunud-sunod na krimeng ito, kasama tayo sa mga naghain ng Senate Resolution No. 517 na kumukondena rito.

Sa pamamagitan ng resolusyong ito, hinihimok din namin ang mga awtoridad na gawin ang lahat ng makakaya upang mabigyan ng hustisya ang mga biktima ng mga karumal-dumal na krimeng ito.

Kasama rin sa panawagan natin ang patuloy na pagtaguyod ng batas upang maprotektahan ang kapakanan ng sambayanang Pilipino.

☻☻☻

Nitong Martes, Marso 7, sinimulan na natin ang pagdinig ng Committee on Tourism, kasama ang Committee on Sustainable Development Goals, Innovation, and Futures Thinking tungkol sa mga nauulat na kaso ng paglapastangan sa Masungi Georeserve.

Gaya ng nasabi ko sa hearing, hindi pagtuturuan ang habol natin sa imbestigasyon.

Ang nais natin ay malaman kung ano ba talaga ang problema at kung bakit ito nananatili dahil saka lamang natin maiisipan ng solusyon kung nakikita natin ang buong larawan.

Asahan n’yo na magiging masigasig tayo sa pag-abot ng layunin na ito para mapanatili natin ang Masungi at iba pa nating protected areas.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal. Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Lakas ng kababaihan ipagdiwang!

ni Nancy Binay @Be Nice Tayo | March 5, 2023

Tuwing Marso, ipinagdiriwang natin ang buwan ng kababaihan at sa darating na ika-8 ng Marso naman ay ating ipagdiriwang ang Pandaigdigang Araw ng Kababaihan.

Sa buwan na ito, ating kinikilala at binibigyang-parangal ang mga naiambag at naitulong ng mga babae sa pag-angat ng ating lipunan.

Magandang pagkakataon din ito para bigyang-pansin ang mga isyung patuloy na kinahaharap ng mga kababaihan at ituloy ang laban para sa pantay na karapatan ng bawat isa.

☻☻☻

Sinimulang ipagdiwang ang Pandaigdigang Araw ng Kababaihan noong Marso 8, 1910 bilang pagkilala sa pakikibaka para sa karapatan ng babae.

Taong 1977 naman nang ipagtibay ng United Nations General Assembly ang isang resolusyon tungkol sa pagdiriwang ng International Women’s Day tuwing sasapit ang ika-8 ng Marso ng bawat taon.

☻☻☻

Hitik ang ating kasaysayan sa mga babaeng malaki ang naiambag sa ating bansa.

Sina Gabriela Silang, Teresa Magbanua, Trinidad Tecson, Gregoria de Jesus, at Melchora Aquino ay ilan lamang sa mga magiting na bayaning nakipaglaban para sa ating kalayaan.

Sa kasalukuyan naman, halos lahat ng sektor ng ating lipunan ay may mga babaeng kayang tapatan o higitan ang kakayahan ng mga kalalakihan.

Hindi nga ba, ang una at kaisa-isang gintong medalya ng ating bansa sa Olympics ay mula kay Hidilyn Diaz?

☻☻☻

Kaisa tayo sa pagkilala sa lakas ng kababaihan at sa pagsulong ng pagkakapantay-pantay.

Patuloy nating bigyang-pugay at pagpapahalaga ang mga kababaihan.

Happy Women’s Month sa lahat!

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay