Mas maayos na serbisyo ng Cebu Pacific, tuluy-tuloy na sana

ni Nancy Binay @Be Nice Tayo | July 16, 2023

Ikinagalak natin ang naging desisyon ng Cebu Pacific na alisin ang expiration date ng kanilang travel fund.

Bukod dito, pinalawig din ng naturang airline ang validity ng kanilang travel voucher ng hanggang 18 buwan mula sa August 1.

Bukod sa travel fund at travel vouchers, nagkaroon na rin ng klarong guidelines ang Cebu Pacific sa pagbibigay ng compensation sa mga pasahero kapag nagkakaroon ng problema sa kanilang flights.

Ayon sa Cebu Pacific, ang mga pasahero na nakaranas ng pagkaantala sa flight operations ay maaaring maka-avail ng two-way travel vouchers para sa mga biyaheng nakansela sa loob ng 72 oras samantalang one-way travel vouchers para sa mga flight na na-delay ng apat hanggang anim na oras.

Nagpapasalamat po tayo sa Cebu Pacific dahil pinapatunayan nito na nakikinig sila sa mga panawagan ng mga pasahero na napag-usapan natin sa naging pagdinig ng Senate Committee on tourism kamakailan.

☻☻☻

Ngayong nabigyang linaw na ang mga isyung ito, ang kailangan namang bigyang pansin ng Cebu Pacific ay ang kanilang mga hotline at customer service.

Lumabas kasi sa ating pagdinig na tila pahirapan makakuha ng sagot ang mga pasahero kapag sinusubukan nilang makipag-ugnayan sa customer service.

Bukod sa hirap ng pakikipag-usap sa mga chatbot, minsan, hindi rin daw nasasagot nang maayos ng mga tao on the ground ang katanungan ng mga pasahero.

☻☻☻

Sa mga hakbang na ito mula sa Cebu Pacific, umaasa po tayo na mas magiging maayos ang lagay ng ating mga pasahero sa paliparan.

Naniniwala din tayo na isa na itong tamang hakbang tungo sa pagbabalik ng tiwala at kumpiyansa ng publiko at sa pagresolba ng mga aberyang nararanasan sa ating mga airline passenger.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

P3M bagong logo ng PAGCOR, pinalagan

ni Nancy Binay @Be Nice Tayo | July 13, 2023

“’Kala ko bagong logo ng Petron.” “The design is very kopong-kopong.” “3 million ang logo.” “Mukhang demonyo.”

Pinutakti ng batikos ang bagong logo ng Philippine Amusement and Gaming Corporation na inilunsad noong Martes kasabay ng 40th anniversary nito.

Ayon kay PAGCOR Chairman and CEO Alejandro Tengco, sumisimbolo raw ang bagong logo ng pagbabago at progreso.

“The logo likewise reflects a beacon which symbolizes guidance, leadership, and direction. It represents a guiding light that helps people find their way,” dagdag pa niya.

☻☻☻

Ayon sa mga litrato ng Notice of Award sa isang Mr. Francisco D. Doplon na may-ari ng PRINTPLUS GRAPHIC SERVICES na lumantad sa social media, umaabot sa P3,035,714.28 ang bayad para sa bagong logo na ito.

Ang puna ng marami, hindi sulit ang bayad kumpara sa naging kalidad ng output.

☻☻☻

Kailangan na ba ng regulasyon para sa pagpapalit ng mga official logo o seal ng mga ahensya at ibang institusyon ng pamahalaan?

Pagkatapos ng gulo tungkol sa “Love the Philippines” brand ay sumunod naman ang PAGCOR sa kontrobersiya.

Hindi basta-bastang usapin ang branding ng isang ahensya, at hindi maaaring balewalain ang kasaysayan na nakalakip sa mga original na logo at seal ng mga ito.

☻☻☻

Paano na lamang kung gawa ng National Artist o iba pang batikang artist ang logo na papalitan?

Kagaya halimbawa ng mga makasaysayang Coat of Arms at Seal of the President of the Philippines na nilikha ni Galo Ocampo?

Nanganganib na mapalitan ang mga ito ng mga disenyong hindi papantay sa original kung malayang babaguhin kung nais ng ahensya.

☻☻☻

Hindi naman masama ang pagbabago. Ngunit kung hindi naman kailangan, bakit pa ito babaguhin?

Puwede pa ba humingi ng refund?

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang halaga ang kalusugan, at huwag kalilimutang magdasal. Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Huwag na ipilit ang LOVE, ibalik ang FUN sa Pilipinas

ni Nancy Binay @Be Nice Tayo | July 9, 2023

Malaking katanungan ngayon ay kung dapat pa bang ipagpatuloy ng Department of Tourism ang paggamit sa bago nitong slogan na “Love the Philippines”.

Dahil sa issue na paggamit ng stock video ng ibang bansa sa paggawa ng marketing video ng DOT, ginawa nang katatawanan ng marami ang slogan na ito.

Trending sa social media ang mga meme at lampoons na tampok ang bagong slogan.

☻☻☻

Hindi naman lingid sa ating kaalaman na napakasensitibong market ang turismo.

Anumang negatibong media at obserbasyon ng tao ay maaaring mag-impluwensiya sa desisyon ng mga turista.

Dahil nga sa nangyari, headline na tayo sa buong mundo. Naging laughing stock na ang slogan, at masyado nang tinamaan ang campaign.

Nakakalungkot dahil sa unang tapak pa lamang, imbes na umarangkada ay umatras tayo.

☻☻☻

Pinag-aaralan pa ng inyong lingkod kung kailangan bang maghain ng resolusyon sa Senado para imbestigahan ang nangyaring kapalpakan na ito.

Ngunit sa ating palagay, kung meron pang ilalabas na TVC ang DOT, huwag na nilang isugal dahil inaabangan na ng netizens ang susunod na ‘Love’ iterations para gawan ng spoof.

Bakit hindi na lang natin ibalik sa isang tried-and-tested campaign at gumawa na lang ng tactical marketing plan para maisalba ang ating imahe.

Huwag nang ipilit. Hindi masama ang magkamali. Tanggapin na lang natin na hindi meant to be ang LOVE. Move on na tayo at ibalik na lang ang FUN in the Philippines.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal. Malalagpasan din natin ito.

Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay