Pista ng Nazareno at ang pananampalataya ng mga Pinoy

ni Nancy Binay @Be Nice Tayo | Jan. 12, 2025

Ayon kay Quiapo Church spokesman Fr. Robert Arellano, umabot sa walong milyong deboto ang nakiisa sa pista ng Itim na Nazareno.

Dagdag pa niya, aabot naman sa apat na milyon ang sumama sa naganap na prusisyon noong Huwebes.

Nagsimula ang Traslacion alas-4:40 ng madaling araw ng Enero 9 at natapos ito ng ala-1:26 ng madaling-araw kinabukasan.

Bagama’t maraming naging hamon sa prusisyon gaya ng pagdagsa ng mga deboto at ang pagpatid ng lubid na ginagamit para itulak ang imahen, ligtas na nakabalik ang Poong Nazareno sa Quiapo.

☻☻☻

Sa unang tingin, aakalain mong walang kaayusan ang prusisyon ng Nazareno.

Ngunit kapag iyong tiningnan ito nang maigi, mapapansin mo na sa dinami-dami ng taong nagbabalyahan, bibihira ang malubhang nasasaktan.

Lalong kapansin-pansin na kapag may nahimatay, maayos siyang nadadala sa tabi ng kalsada malapit sa mga mediko.

Ayon sa Manila Police District, pawang mga “minor incident” lang ang kanilang naitala at walang seryosong nasaktan sa mga nakiisa sa prusisyon ngayong taon.

Ayon naman sa Philippine Red Cross (PRC), natulungan nila ang 412 katao “for minor injuries” at 30 indibidwal naman ang tinulungan nilang maipadala sa ospital.

☻☻☻

Paalala naman ng simbahan na huwag kalimutan ang diwa ng debosyon sa Poong Nazareno.

Patuloy sana itong magsilbing paalala sa pagkakatawang tao ng bugtong na anak ng Diyos upang personal na maranasan at maunawaan ang buhay sa daigdig.

Bukod dito, patuloy sana nating alalahanin kung bakit nakayapak ang lahat ng mga deboto sa prusisyon.

Simbolo kasi ito na lahat ay pantay-pantay sa pananampalataya sa Panginoon.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Turismo, umaarangkada

ni Nancy Binay @Be Nice Tayo | Jan. 9, 2025

Good news para sa sektor ng turismo, sapagkat mukhang tuluy-tuloy ang pagbangon natin mula sa dagok ng pandemya.

Ayon sa Department of Tourism (DOT), nagtamo ng all-time high na P760.5 billion ang tourism revenue ng bansa nitong 2024.

Nalagpasan nito ang tinatayang P600.01 billion na revenue noong 2019 ng 26.5 percent.

☻☻☻

Sa kabilang banda, hindi natin naabot ang target na 7.7 million tourist arrivals dahil nasa 5,949,350 foreign visitors ang dumating sa Pilipinas noong 2024.

Mas mataas ito ng 9.15 percent sa 5.45 million foreign tourist arrivals na naitala noong 2023.

Mga taga-South Korea ang top visitor natin -- 1,574,152 ang dumalaw na bumubuo ng 26.46 percent ng total market share.

Ang United States naman ay pumapangalawa, na may 1,076,663 tourist arrivals.

Lumabas din umano ang Japan bilang standout market dahil sa 22.84 percent na pagtaas sa tourist arrivals, na umabot sa 444,528 visitors mula 361,862 noong 2023.

☻☻☻

Magandang simula sa taon ang balitang ito ng DOT. 

Umaasa tayo na ngayong 2025 ay lalo pa nating mahigitan ang mga numero noong 2024.

Pasasalamat at pagpupugay sa ating mga stakeholders sa tourism sector sa masigasig ninyong pagkilos upang itampok ang ating bansa.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Buhos ng mga pasahero pabalik ng Kamaynilaan, paghandaan

ni Nancy Binay @Be Nice Tayo | Jan. 5, 2025

Inaasahan natin ang pagdagsa ng libu-libong pasahero na galing sa mga probinsya at pabalik ng Metro Manila.

Sa pagtatapos ng holiday season, libu-libong pasahero ang nagsimula nang dumagsa sa bus terminals at daungan.

Ayon sa PITX, umabot sa 160,000 hanggang 170,000 ang dumagsang pasahero sa kanilang terminal gabi ng Martes, Enero 2.

Batay naman sa Philippine Ports Authority (PPA), 3.5 milyong pasahero na ang kanilang naitala simula Disyembre 15.

Samantala, nakapagtala ang Philippine Coast Guard (PCG) ng 59,594 na pasaherong bumiyahe sa mga pantalan pauwi sa kani-kanilang mga probinsya noong nagdaang Pasko.

Bukod dito nasa 55,208 na mga pasahero ang bumiyahe pabalik sa Metro Manila nitong holiday season.

☻☻☻

Bagama’t marami na ang nakabalik sa Metro Manila pagkatapos ng Bagong Taon, inaasahan pa rin ang pagbuhos ng bilang ng mga pasahero ngayong weekend.

Ayon sa PPA Batangas nasa 200,000 pasahero ang naitala nilang umalis sa pantalan mula Disyembre 20 hanggang 31.

Sa kabila nito, 32,000 pasahero lamang ang bumalik sa Batangas Port mula Enero 1 hanggang 2. Dahil dito, inaasahan nila na mas maraming pasahero ang bibiyahe hanggang sa Lunes.

Pahayag naman ng Ninoy Aquino International Airport (NAIA) inaasahan nila na nasa 620,000 pasahero ang daragsa sa paliparan mula Biyernes hanggang Linggo.

Muli, ibayong pag-iingat sa lahat at tiyaking ligtas ang kanilang pagbiyahe lalo na sa mga susunod na araw.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay