Kaso ng mpox, kailangang tutukan

ni Nancy Binay @Be Nice Tayo | August 25, 2024

Nong nakaraang linggo naitala ang unang kaso ng mpox virus ngayong taon sa bansa.

Ayon sa DOH, umabot na sa 10 ang kabuuang kaso ng mpox sa ‘Pinas, kasama ang mga nakalipas na taon -- na ang pinakahuli ay noong December 2023.

Matatandaang idineklara ng World Health Organization ang pagkalat ng mpox bilang Public Health Emergency of International Concern.

Siniguro naman ng DOH na lahat ng mga dating kaso sa bansa ay na-isolate, natutukan, at gumaling na.

☻☻☻

Ang mpox ay sakit na dulot ng monkey pox virus, na isang viral zoonotic infection, o sakit na maaaring maipasa sa tao mula sa hayop.

Una itong naitala sa mga unggoy noong 1958 at nagkaroon ng unang pagpasa ng virus sa tao noong 1970.

Bagama’t mababa ang panganib na mahawa ang mga bata sa mpox, ayon sa Centers for Disease Control and Prevention (CDC) ng Estados Unidos, hinihimok natin ang lahat na mag-ingat sa sakit na ito.

Naghain din ang inyong lingkod ng resolusyon sa Senado para pag-usapan at pag-aralan ang mga dapat gawin ng pamahalaan para maiwasan ang pagkalat nito.

Sa resolusyong ito, nais nating malaman kung ano ang mga hakbang na gagawin ng DOH para mapanatiling ligtas ang ating mga kababayan.

Nais din nating malaman kung sapat ang kanilang action at response plans para matulungan silang mapunan ang mga kakulangan kung meron man.

Mahalaga na hindi na natin pahintulutan na dumami ang kaso ng sakit na ito para masiguro ang kaligtasan ng lahat.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Kasaysayan, may malaking papel sa ating buhay

ni Nancy Binay @Be Nice Tayo | August 22, 2024

Ang Agosto ay Buwan ng Kasaysayan, na itinakda sa pamamagitan ng Proclamation No. 339, s. 2012. 

Ang napiling tema para sa komemorasyon ng Buwan ng Kasaysayan ngayong taon ay “Salaysay ng Bayan, Saysay ng Bansa (Stories of the People, Essence of the Nation).”

Mahalagang maging pamilyar tayo sa ating kasaysayan upang matuto tayo sa mga aral nito.

Sa mas praktikal na pagtingin, mahalaga para sa pamahalaan na pag-aralan ang kasaysayan upang hindi maulit ang mga maling desisyon at polisiya, o kaya ay para mapabuti pa ang mga napagtagumpayan na.

☻☻☻

Hinihikayat natin ang ating mga kababayan na makilahok sa iba’t ibang aktibidad na isinalang ng National Historical Commission of the Philippines para pukawin ang ating interes sa mga kuwentong nagbibigay saysay sa ating karanasang pambayan.

Magandang activity din para sa buong pamilya na dumalaw sa mga museo at iba pang makasaysayang lugar sa ating mga bayan-bayan upang mas makilala rin natin ang ating sariling mga komunidad.

May malaking papel ang ating kasaysayan sa buhay natin mismo. Masaya at interesante ring galugarin ang kasaysayan ng ating mga pamilya, halimbawa sa pagtanong kung paano ba ang naging buhay ng ating mga ninuno sa panahon ng digmaan at iba pang sakuna, halimbawa.

Madalas, nadidiskubre natin na may kagitingan at kabayanihang nagawa ang ating mga ninuno, na hindi man alam ng buong mundo ay nakatulong pa rin sa pagpapaganda o pagpapagaan ng buhay ng kanilang kapwa.

Madidiskubre natin na tunay na nasa dugo natin ang pagiging bayani.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Basehan ng NEDA sa pagiging food poor, 'di katanggap-tanggap

ni Nancy Binay @Be Nice Tayo | August 18, 2024

Kailangan pag-aralan muli ng National Economic and Development Authority (NEDA) ang basehan sa halaga ng pagkain bawat araw para maituring na “food poor” ang isang tao.

Sa isang pagdinig kasi namin sa Senado, sinabi ni NEDA Chief Arsenio Balisacan na hanggang nitong 2023, nakabatay ang buwanang food threshold para sa pamilyang may limang miyembro sa halagang P9,581 o P64 per person per day.

Maraming umalma sa pahayag na ito at sinabing hindi sasapat ang P64 para makamit ang nutritional o dietary requirements ng tao sa isang araw.

Sa halagang 64 pesos kada araw, papatak na lampas 21 pesos per meal lang ang kailangan ng mga mamamayan para hindi matawag na food poor.

Hindi katanggap-tanggap na sabihing 64 pesos ay sapat na at hindi na matatawag na food poor ang ating mga kababayan.

Ang presyo ng isang Nutribun, na alam nating ‘yung isang tinapay na ‘yun kumbaga lahat ng sustansiya nandu’n na, 40 pesos na siya ngayon.

So ‘di pa rin pasok sa 21 pesos ang isang pirasong Nutribun na nandoon lahat ng nutritional requirements ng ating pamahalaan.

Nagsalita na ang Nutrition Council at sila na mismo ang nagsabi na hindi sapat itong 64 pesos a day para masabi ka na hindi ka food poor.

Ilang budget hearing na rin natin na-raise ang punto na ito, na baka dapat taasan na ng NEDA ‘yang threshold nila dahil hindi nga makatotohanan itong 64 pesos.

Kasi ang gusto nating mangyari ay malaman ang tunay na kalagayan ng ating mga kababayan para ‘yung budget ay magawan natin ng programa na talagang magbibigay solusyon sa problema ng mga mamamayan lalo na pagdating sa pagkain.

Ang nakakalungkot, nang ni-raise natin itong issue na ito sa budget deliberation noong nakaraang taon, ‘yun din ang sinabi sa atin na titingnan, pag-aaralan.

Siguro naman ngayon talagang pag-aaralan at babaguhin na nila ang numero na ‘yan.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay