Ex-Pres. Erap, ex-Sen. Loi, kinilala sa Senado

ni Nancy Binay @Be Nice Tayo | Feb. 9, 2025

Noong nakaraang linggo naipasa sa Senado ang isang resolusyon na nagpaparangal kina dating Pangulong Joseph Ejercito Estrada at dating Senadora Luisa “Loi” Ejercito.

Inihain ang Senate Resolution No. 1295 at Senate Resolution No. 1296 bilang pagkilala sa kanilang makabuluhang kontribusyon sa serbisyo-publiko at pambansang kaunlaran.

Naging senador si dating Pangulong Erap noong 1987. Samantala, si dating Sen. Loi naman ay naging senador noong 2001.

☻☻☻

Unang tumatak sa aking gunita si Joseph “Erap” Ejercito Estrada bilang tunay na lingkod-bayan dahil sa pakikipagkapit-bisig niya bilang miyembro ng Magnificent 12, bagama’t matagal na siya sa serbisyo-publiko na long-time mayor ng San Juan mula pa noong 1969.

Para sa akin, nadestila ang imahe ni Erap bilang bayani ng masa dahil sa pagiging miyembro niya ng Magnificent 12.

Bukod dito, minahal ng masa si Erap dahil nakita’t nadama nila hindi lamang ang pagnanais na makatulong, kundi maging sa mga konkretong programang kanilang mapapakinabangan.

Kaya rin siguro naging matimbang ang mga salita ni Erap noong kinukumbinsi akong sumabak sa halalan noong 2013. Mula sa kanyang halimbawa, nakapaghugot ako ng lakas ng loob na sa huli’t huli, mas mahalaga ang pagnanais na maglingkod, kasama ang pagsusumikap na mabayaran ang tiwalang ipagkakaloob ng taumbayan, kaysa anumang pinagmulan.

☻☻☻

Samantala, mula sa mga payo para sa mga praktikal na gawain sa Senado, marami ring naibahagi sa akin si Tita Loi tungkol sa buhay na hanggang ngayon ay pinakaiingatan ko.

Dahil sa mga payo ni Doktora Loi, nabigyan ako ng lakas ng loob na maaari akong magtagumpay sa larangang pinasok ko, basta’t tutularan ko ang ipinamalas niyang pagpapakumbaba at pagpupursigi.

Bitbit ang pagpapakumbabang ito, bagama’t anim na taon lamang siya sa Senado, ay naisiksik niya ang mahabang obra ng mahahalagang panukala na naisabatas dahil sa kanyang aktibong partisipasyon.

Kabilang na rito ang: Anti-Trafficking in Persons Act, ang Anti-Violence Against Women and their Children Act; National Health Insurance Program; Tobacco Regulation Act; Film Development Council Act; Comprehensive Dangerous Drugs Act; at Philippine Clean Water Act. Iba’t ibang mga batas na nagsusulong ng interes ng sambayanan, lalo na ng mga sektor na matagal na niyang ipinaglalaban, ang mga mahihirap, pamilya, kababaihan, at kabataan.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Usapang eleksyon, simula na

ni Nancy Binay @Be Nice Tayo | Feb. 6, 2025

Batay sa Social Weather Stations, usaping pang-ekonomiya ang pangunahing alalahanin ng mga Pilipino ngayong parating na halalan.

Sa isang survey na isinagawa ng SWS mula January 17 hanggang 20, lumalabas na 94 percent daw ng Pilipino ang susuporta sa mga kandidatong gagawing prayoridad ang paglikha ng trabaho at pagpapalago ng agrikultura para masiguro ang seguridad sa pagkain.

Samantala, 93 percent naman ng respondents ang sumagot na susuportahan ang mga kandidatong magsusulong ng kalusugan.

☻☻☻

Pinahahalagahan din ng mga botante ang mga isyu ng edukasyon at karapatan ng manggagawa, kasama ang mga OFW, na nagtamo ng 92 percent.

Nasa 87 percent naman ang nagpahalaga sa climate change at pangangailangan na tugunan ito, kasama ang disaster preparedness. 87 percent din ang nagsabi na kailangang tutukan ang kahirapan at kagutuman.

Nasa 85 percent ang nagpahiwatig ng suporta para sa pagtugon sa tumataas na presyo ng bilihin, at 83 percent naman ay para sa national security.

☻☻☻

Tunay na mahalaga ang mga isyung ito na kinakailangang masinsing tugunan ng pamahalaan.

Umaasa tayo na ang lahat ng kandidato ay maglalatag ng plataporma sa kung paano nila sosolusyonan ang mga problemang ito.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Mga ina at sanggol, may dagdag benepisyo para sa kalusugan at nutrisyon

ni Nancy Binay @Be Nice Tayo | Jan. 26, 2025

Ngayong buwan ay inilabas na ng Department of Social Welfare and Development (DSWD) ang bagong guidelines para sa implementasyon ng First 1,000 Days (F1KD) ng conditional cash grant ng Pantawid Pamilyang Pilipino Program (4Ps).

Ang bagong guidelines ay nakasaad sa Memorandum Circular (MC) No. 1 series of 2025 na nilagdaan ni Secretary Rex Gatchalian nitong January 6.

Layon ng 4Ps F1KD cash grant na mabigyang pansin ang essential health at nutrition expenses ng ina at anak nito sa unang 1,000 araw ng pagdadalantao o pagbubuntis.

Upang matiyak ang kapakanan ng ina at sanggol na benepisyaryo ng programang ito, nagbigay ang DSWD ng kondisyon na kailangang sundin batay sa Republic Act No. 11148 o Kalusugan at Nutrisyon ng Mag-Nanay Act at existing protocols na ipinapatupad ng Department of Health (DOH).

Kabilang sa mga kondisyon ay ang pre-natal services sa mga DOH-accredited health facilities, tracking pregnancy at receiving ante-natal care services, panganganak sa isang DOH accredited health facility, pagdalo sa post-natal visits, pagsama sa mga counseling sessions, at pag-inom ng mga micronutrient supplements kabilang ang bakuna.

☻☻☻

Bilang co-author ng Republic Act 11148 o ang “Kalusugan at Nutrisyon ng Mag-Nanay Act” ay natutuwa tayo sa programang ito ng DSWD.

Nakasaad kasi sa programa na magkakaroon ng dagdag na monthly health grants na nagkakahalaga ng Php350 para sa buntis na 4Ps beneficiaries at may anak na nasa edad mula 0 hanggang 2 years old.

Sa tulong nito, mabibigyan na ng prayoridad ang kalusugan ng mga pre-pregnant, pregnant at lactating na mga ina, mga sanggol at mga bata.

Bukod dito, malaking tulong din ang programang ito sa laban kontra stunting at malnutrition.

Ang 4Ps F1KD ay inaasahang ipapatupad ngayong Enero.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay