Habal-habal, join sa pilot study ng motorcycle taxi

ni Jeff Tumbado | May 25, 2023

Hihikayatin ng Motorcycle Taxi Technical Working Group (MC Taxi-TWG) ang mga "habal-habal" operator, partikular na sa mga probinsya, na sumali sa pilot study na isinasagawa para sa MC Taxi.

Ito ay dahil sakaling maging ganap na batas ang panukala para gawing legal ang motorcycle taxi sa bansa, mas mababantayan at maaaring makatanggap ng mga benepisyo mula sa programa ang mga kalahok nito.

“Once they are part of the program, they will be regulated and will be trained in the aspects of proper operations, particularly in improving their driving skills through more advanced driver training once they become part of the program. That way, they can operate safely and securely, which will ultimately benefit the riding public,” pahayag ni Atty. Paul Austria, Secretariat ng MC Taxi-TWG.

Ang plano na ito ng TWG ay alinsunod sa panukala ni Sen. Raffy Tulfo sa gitna ng pagdinig ng Senate Committee on Public Services na pinangunahan ni Senador Grace Poe.

Sa kabilang banda, sinabi ni MC-TWG Chairperson Atty. Teofilo Guadiz III, na siya ring Chairperson ng Land Transportation Franchising and Regulatory Board (LTFRB), na titingnan din ng TWG kung kinakailangan pang palawakin ang lugar kung saan isinasagawa ang pilot study para sa mga MC Taxi.

Pag-aaralan din ng TWG ang posibilidad na magdagdag ng kalahok sa naturang pilot study at ng bilang ng mga rider na nakalaan para sa tatlong Transport Network Companies (TNCs) na kasama sa pag-aaral.

Kabilang sa mga TNC na lumahok sa pilot study ang Angkas, JoyRide at Move It.

Istayl kolorum, 'di gumagamit ng app para mas mataas ang singil.. Angkas at Joyride drivers, buking

ni Mylene Alfonso | May 15, 2023

Patuloy na dumarami ang reklamong natatanggap ng motorcycle taxi na Angkas dahil sa umano'y overcharging ng mga rider sa mga commuter na naghahabol ng oras sa kanilang mga pupuntahan.

Nabatid na hindi na nasusunod ang fare matrix na ipinalabas ng Land Transportation Franchising and Regulatory Board (LTFRB) na siyang guidelines para sa pagbibigay ng tamang pasahe sa mga nagnanais na sumakay sa motorcycle taxi.

Nakapaloob sa fare matrix na ipinalabas noong Enero 27, 2020 ng LTFRB na sa Metro Manila, P50 para sa unang 2km; P10 hanggang 7km; P15 sa mga susunod pang kilometro habang sa Metro Cebu/ Cagayan De Oro, P20 sa unang 2km; P16 hanggang 8km at P20 sa mga susunod pang kilometro.

Ayon sa mga reklamo ng commuter na ibinahagi sa social media, ang mistulang naging kolorum at habal-habal ang mga motorcycle taxi na binigyan ng prangkisa dahil sumusunod sa guidelines ng LTFRB.

Partikular na reklamong tinukoy ang hindi na paggamit ng apps kung saan, kinokontrata na lamang ng mga rider ang kanilang pasahero lalo na sa gabi na kung saan ay 5 hanggang 10 beses ang taas ng singil.

“Grabe ang modus ng mga Angka at Joyrider drivers. Mag-aabang sila sa mga exit ng mall/establishment. Nakabukas 'yung app nila kaya nakikita nila kung sino nagbu-book pero hindi nila ina-accept. Instead, lalapit sila as habal tapos aalukin nila ng mas mahal na pamasahe kaysa sa app,” isa lang ito sa reklamong ipinost sa social media.

Gayundin, nanawagan sa social media ang Angkas, Habal, Joyride riders and passengers group na kung saan ay humihingi sila ng proteksiyon sa pamunuan ng motorcycle taxi na i-orient ang ibang riders na maging marespeto dahil sa hindi na nasusunod ang fare matrix ng LTFRB kung kaya’t hindi na nila alam kung ano ang latest Angkas rate.

Rehistro ng bagong motor, 3 taon na — LTO

ni V. Reyes | April 24, 2023

Iniutos ni Land Transportation Office (LTO) Chief Jay Art Tugade ang pagpapatupad ng tatlong taong bisa o validity ng rehistro ng lahat ng mga bagong motorsiklo sa bansa.

Batay sa kasalukuyang panuntunan na alinsunod sa Republic Act 4136 at Republic Act 11032, ang mga motorsiklong may makina o engine displacement na 201cc pataas lamang ang mayroong tatlong taong bisa ng initial registration sa Land Transportation Office (LTO).

Gayunman, kasunod ng ginawang pag-aaral ng ahensya ay nagdesisyon si Tugade na gawin na ring tatlong-taong bisa ang rehistro kahit sa mga motorsiklong may makina na 200cc pababa.

"It is hereby directed that initial registration of brand new motorcycles with engine displacement of 200cc and below shall be valid for three (3) years," saad ng Memorandum Circular No. JMT-2023-2395.

"It is understood that the MVUC to be collected during the initial registration shall likewise be adjusted to cover the corresponding registration validity period," ayon pa sa Memorandum.

Bahagi pa rin ito ng mga hakbang ng LTO na layong maging mabilis ang mga proseso at mapagaan ang mga transaksyon ng publiko sa ahensya.

"Hindi natin nakikita na magkakaroon ng problema sa roadworthiness ng mga motorsiklong may tatlong taong rehistro dahil ang mga ito naman ay bagong sasakyan," pahayag ni LTO Chief Tugade.

"Naniniwala kami sa LTO na ang hakbang na ito ay makakatulong sa maraming drayber na nagpaparehistro ng bagong motor para magamit sa kanilang hanapbuhay o trabaho," dagdag pa ng opisyal.

Kung pagbabatayan ang mga nakalipas na datos ng LTO, tinatayang dalawang milyon na bagong magpaparehistro ng motorsiklo na 200cc pababa ang makikinabang sa bagong polisiya na ito ngayong taon.

Alinsunod na rin sa umiiral nang panuntunan para sa pagrehistro ng iba pang mga sasakyan, matapos ang tatlong taong bisa ng initial registration ay magiging kada taon na rin ang pagpaparehistro ng mga motorsiklong may makinang 200cc pababa.

Epektibo ang memorandum sa Mayo 15 ng kasalukuyang taon.