1.3 M doses ng Moderna vaccine, dumating na

ni Lolet Abania | November 19, 2021

Natanggap na ng bansa ang 1,306,000 doses ng Moderna COVID-19 vaccine na binili ng gobyerno ngayong Biyernes.

Lumapag ang pinakabagong shipment ng Moderna doses sa Ninoy Aquino International Airport Terminal 1, alas-9:51 ng umaga ngayong araw, ayon sa National Task Force Against COVID-19.

Umabot na sa tinatayang 130 milyon COVID-19 vaccine doses ang natanggap ng bansa simula noong Pebrero 28.

Batay sa datos ng gobyerno hanggang nitong Huwebes, aabot na sa 33 milyong Pilipino ang fully vaccinated kontra-COVID-19. Habang ang mass vaccination program ng pamahalaan ay nagsimula noong Marso 1.

2.1 M ng Moderna vaccine at 660K AstraZeneca vaccine, dumating na

ni Lolet Abania | October 8, 2021

Dumating na ang mahigit sa 2.1 milyon doses ng Moderna vaccine at higit 660,000 doses ng AstraZeneca vaccine kontra-COVID-19 ngayong Biyernes nang umaga.

Lumapag sa Ninoy Aquino International Airport (NAIA) Terminal 1 via China Airlines flight CI 701 ng alas-9:35 ng umaga, ang bagong supply ng COVID-19 vaccine.

Ayon sa National Task Force Against COVID-19 (NTF), ang kabuuang 1,384,280 Moderna doses ay mapupunta sa national government habang ang 747,860 doses ay sa pribadong sektor.

Ang kabuuang 661,100 AstraZeneca doses naman ay nakalaan din sa pribadong sektor.

Sinabi pa ng NTF, hanggang nitong Miyerkules nasa 22.6 milyong Pilipino o 29.37% ng target na populasyon ay fully vaccinated na. Sinalubong naman ang mga naturang COVID-19 vaccine nina NTF chief implementer at vaccine czar Secretary Carlito Galvez Jr., Department of Health (DOH) Secretary Francisco Duque III, Metro Manila Development Authority (MMDA) chairperson Benhur Abalos, at Presidential Adviser for Entrepreneurship Joey Concepcion.

Naroon din sina US Embassy Counselor for Economic Affairs David ‘Chip’ Gamble, A Dose of Hope project lead adviser Josephine Romero, AstraZeneca Philippines president Lotis Ramin, at Zuellig Pharma Corp. chief business officer Janette Jakosalem.

Tiwala naman si Galvez na kayang makamit ng Pilipinas na makapagbakuna ng 50% hanggang 70% ng target na populasyon bago matapos ang 2021.

Side effect na pamamaga ng puso, bihira lang… Moderna vaccine sa edad 12-17, aprub na ng FDA

ni Lolet Abania | September 3, 2021

Inaprubahan na ng gobyerno ng Pilipinas ang amendment ng Emergency Use Authorization (EUA) ng Moderna COVID-19 vaccine para gamitin sa mga kabataan na nasa edad 12 hanggang 17.

“After a thorough evaluation by our vaccine experts and our regulatory experts in FDA, we approved this Friday the use under EUA of the Moderna vaccine for adolescents aged 12 to 17,” ani Director General Eric Domingo ng Food and Drug Administration (FDA) sa Laging Handa public briefing ngayong Biyernes.

Matatandaang noong Agosto 19, naghain ang Moderna ng aplikasyon para sa kanilang EUA amendment sa FDA.

Subalit, nagbabala si Domingo hinggil sa mga rare cases ng tinatawag na myocarditis sanhi ng Moderna vaccine na aniya ay katulad ng ibang mRNA vaccines na ginagamit na ring bakuna laban sa COVID-19.

Gayunman, sinabi ni Domingo na ang mga kaso ng myocarditis ay isa lamang sa bawat milyon at kadalasan na tinatamaan nito ay mga younger males.

“But definitely with the Delta variant affecting a lot of children, our experts saw that the benefit of using the vaccine outweighs the risk,” sabi ni Domingo.

Sa isang interview, ipinaliwanag ni Domingo na ang myocarditis ay inflammation o pamamaga ng heart muscle, kung saan ito ay nalulunasan naman lalo na kung maagang na-detect.

Nilinaw din ni Domingo na ang Moderna doses na nai-deliver sa bansa ay hindi galing sa mga batches na isinailalim sa imbestigasyon sa posibleng kontaminasyon sa Japan.

Sa tanong kung ang mga 12-anyos hanggang 17-anyos ay maaari nang mag-apply para sa pagbabakuna matapos ang pag-apruba ng gobyerno rito, ayon kay Domingo, ang prioritization ng age groups ay magmumula pa rin sa Inter-Agency Task Force for the Management of Emerging Infectious Diseases (IATF-EID) at sa Department of Health (DOH).

Una nang ipinahayag ni DOH Secretary Francisco Duque III ang kanyang suporta para sa vaccination ng mga minors laban sa COVID-19, subalit kinakailangan aniya ng sapat na suplay ng bakuna.

Magugunita na binanggit ni vaccine czar Secretary Carlito Galvez, Jr. noong Agosto 8 na ang pagbabakuna sa mga kabataan na nasa edad 12-17 ay posibleng simulan ng Setyembre o Oktubre depende sa vaccine supply.

Ayon naman sa FDA, kailangang makapagbakuna ang gobyerno ng karagdagang 12 hanggang 14 milyong indibidwal kapag pinayagan na ng pamahalaan ang vaccination kontra-COVID-19 ng mga kabataan na nasa 17-anyos pababa.