326,400 doses ng Moderna vaccines, para sa NCR at lugar na mataas ang COVID

ni Lolet Abania | August 8, 2021

Mahigit sa 300,000 doses ng Moderna COVID-19 vaccine na gawa ng United States ang dumating sa Manila ngayong Linggo nang hapon.

Ang naturang shipment ay lumapag sa Ninoy Aquino Terminal Airport 3, ayon sa PTV 4. Sa isang press conference matapos salubungin ni vaccine czar Carlito Galvez, Jr. ang 326,400 Moderna COVID-19 vaccines, sinabi nitong ang mga doses ay binili ng pribadong sektor.

Makakatanggap ang Metro Manila ng 90,000 doses habang ang natitirang iba pa ay dadalhin sa mga lugar na may mataas na kaso ng COVID-19. “It will be deployed in NCR [National Capital Region] and other surge areas,” ani Galvez.

Dagdag niya, hanggang nitong Agosto 8, umabot na sa 11.2 milyong Pinoy ang fully vaccinated, kung saan nakapagtala ng 15.88% ng target eligible population at nasa 10.13% naman ng kabuuang populasyon ng bansa.

Ang target eligible population ay nangangahulugan ng mga edad 18 at pataas. Sinabi pa ni Galvez, sa ngayon ang Metro Manila ay nakatanggap na ng 2 milyong Moderna doses.

Nitong Agosto, matatanggap naman ng Metro Manila ang doses ng Sinopharm vaccines. Ang Pfizer vaccines ay maide-deliver sa Agosto 11, habang 2 milyong Sinovac doses ang darating sa Agosto 12.

Mga nabakunahan ng Pfizer at Moderna, namaga ang puso

ni Ronalyn Seminiano Reonico | June 11, 2021

Nakaranas ng heart inflammation o pamamaga ng puso ang ilang kabataang lalaki na nakatanggap na ng ikalawang dose ng mRNA COVID-19 shots mula sa Pfizer/BioNTech at Moderna base sa datos ng dalawang vaccine safety monitoring systems, ayon sa US Centers for Disease Control and Prevention (CDC) noong Huwebes.

Iniimbestigahan na ng CDC at iba pang health regulators ang kaso ng heart inflammation matapos iulat ng Health Ministry ng Israel na may nakitang koneksiyon sa pamamaga ng puso sa mga nabakunahan ng Pfizer COVID-19 vaccine.

Ayon sa ahensiya, pinag-aaralan pa ang nasabing kondisyon ngunit hindi pa umano masasabing may kaugnayan ang bakuna sa naiulat na myocarditis o pamamaga ng puso.

Ayon sa CDC, karamihan sa natanggap na ulat ng US Vaccine Adverse Event Reporting System (VAERS) na nakaranas ng heart inflammation ay mga kabataang lalaki na tumanggap ng second dose ng Pfizer o Moderna COVID-19 vaccines.

Nakapagtala umano ng 283 kaso ng heart inflammation ang VAERS sa mga edad 16 hanggang 24 matapos mabakunahan ang mga ito ng second dose.

Ayon naman sa Pfizer, susuportahan nila ang gagawing assessment ng CDC kaugnay ng heart inflammation cases.

Saad din ng kumpanya, "It is important to understand that a careful assessment of the reports is ongoing and it has not been concluded that the mRNA COVID-19 vaccines cause myocarditis or pericarditis.”

Ayon naman sa Moderna, nakikipag-ugnayan na rin sila sa public health at regulatory authorities upang pag-aralan at suriin ang naturang issue.

Nakatakda namang magsagawa ng pagpupulong ang CDC at Advisory Committee on Immunization Practices sa susunod na linggo hinggil sa insidente.

300 K Moderna vaccine, darating sa June 21

ni Mary Gutierrez Almirañez | May 24, 2021

Inaasahang darating sa ika-21 ng Hunyo ang 300,000 doses ng Moderna COVID-19 vaccines, batay sa kumpirmasyon ni Philippine Ambassador to the United States Jose Manuel Romualdez ngayong araw, May 24.

Aniya, "June 21 is the target date of delivery for the first batch of Moderna vaccines. It will be 300,000 doses as a start. We will be getting more by July, August and September."

Matatandaang mahigit 20 million doses ng Moderna ang binili ng ‘Pinas sa America, kasama rito ang 7 million na binili ng private sectors. Ito ay nagtataglay ng 94% efficacy rate at puwede sa 18-anyos pataas.

Sa ngayon ay 8,279,050 doses ng COVID-19 vaccines na ang kabuuang bilang ng mga nai-deliver sa bansa, kabilang ang mga brand na Sinovac, AstraZeneca, Sputnik V at Pfizer.