P1K multa — MMDA.. Rider sa bike lane, huhulihin na

ni Mai Ancheta @News | August 21, 2023

Huhulihin at pagmumultahin ang mga motorsiklong dadaan sa bike lanes sa EDSA simula ngayong Lunes, August 21, 2023.

Ito ang inanunsyo ng Metro Manila Development Authority (MMDA) sa kanilang social media page.

Ayon sa MMDA, napakaraming motorsiklo ang gumagamit sa bicycle lane sa EDSA kaya hindi na halos magamit ng mga nagbibisikleta ang linyang nakalaan para sa kanila.

Ang mga mahuhuling motorsiklo ay pagmumultahin ng MMDA ng P1,000 dahil sa hindi pagsunod sa traffic sign.

Paliwanag ng MMDA, ang bike lane ay hindi fast lane para sa mga motorsiklo kaya dapat na hindi ito daanan ng mga nakamotor.

Naunang inihayag ng Department of Transportation (DOTr) na plano nilang magdagdag ng 470 kilometers na bike lanes at iba pang pedestrian infrastructures sa buong bansa para mapagaan ang biyahe ng mga mamamayang gumagamit ng bisikleta sa kanilang paglalakbay.

'Di lang rider — MMDA.. Vendor, bawal sumilong sa flyover, P1K multa

ni Madel Moratillo @News | August 5, 2023

Bawal ding sumilong sa flyover ang mga vendor kapag umuulan.

Paliwanag ni Metropolitan Manila Development Authority Director for Traffic Enforcement Group Victor Nuñez, bawal naman talagang magtinda ang mga street vendor kung wala silang permit.

Kaya nga aniya hinuhuli ang mga illegal vendor dahil bawal ang illegal vending sa kahit saang pampublikong lugar.

Matatandaang una nang sinabi ni MMDA Chairman Romando Artes na bawal sumilong sa ilalim ng flyover ang mga motorsiklo dahil sa panganib nito hindi lang sa rider kundi maging sa iba pang motorista. Lalo na aniya kapag nag-zero visibility dahil sa lakas ng

ulan.

Pinapayagan lang aniya ang mga ito na tumigil saglit para magsuot ng kapote pero dapat umalis din agad.

Ayon sa MMDA, ang mga lalabag dito ay pagmumultahin ng P1,000.

Walang number coding — MMDA

ni BRT @News | July 24, 2023

Inanunsyo ng Metropolitan Manila Development Authority (MMDA) na suspendido ang number coding ngayong araw, Hulyo 24.

Kasabay ito ng ikalawang State of the Nation Address (SONA) ni Pangulong Ferdinand Marcos, Jr.

“Suspendido ang pagpapatupad ng expanded number coding scheme sa Lunes, Hulyo 24, 2023,” ayon sa abiso ng MMDA.

“Planuhin ang inyong biyahe, sumunod sa batas-trapiko, at mag-ingat sa pagmamaneho,” saad pa.

Ngayong araw din ang nakatakdang transport strike ng Manibela para iprotesta ang modernization program sa pampublikong sasakyan.