Mga bata at senior citizens, puwede nang isakay sa public transport – MMDA chief

ni Lolet Abania | November 7, 2021

Pinayagan na ang mga bata at mga matatanda na sumakay sa mga pampublikong transportasyon kasabay ng pagsasailalim sa Metro Manila sa Alert Level 2, ayon sa Metropolitan Manila Development Authority (MMDA) ngayong Linggo.

Sa pahayag ni MMDA Chairman Benhur Abalos, wala nang age restrictions para sa interzonal at intrazonal travel sa ilalim regulasyon ng Inter-Agency Task Force Against COVID-19.

“Ang sabi sa’kin ni (DOTr) Usec. Steve Pastor, nagkaroon lamang ng miscommunication sa IACT (Inter-Agency Council for Traffic), pero puwede raw ang mga matatanda at bata sa public transportation,” paliwanag ni Abalos sa isang sa interview ngayong Linggo.

“Klaro po ito, public transports: puwede ang bata, puwede ang matanda,” sabi pa ni Abalos.

Ayon sa Department of Transportation (DOTr), ang kapasidad ng mga pasahero para sa mga piling public utility vehicles (PUVs) at rail lines na nag-o-operate sa Metro Manila at karatig-probinsiya ay itinaas na sa 70% noon pang Nobyembre 4.

Pinayagan na rin ang bata sa mga malls sa Metro Manila simula naman nang isailalim ito sa Alert Level 2 nitong Biyernes.

Una na ring sinabi ng Department of Health (DOH) na dahil ibinaba na ang alert level status inalis na rin ang paglimita sa mga nais na puntahang establisimyento gaya ng mga malls na base sa edad at vaccination status.

Ayon naman kay Department of Tourism (DOT) Secretary Bernadette Romulo-Puyat, ang staycation sa ilalim ng Alert Level 2 ay pinapayagan na rin para sa lahat ng edad.

Gayunman, paalala nina Puyat at Abalos sa publiko na patuloy na sundin ang itinakda ng gobyernong minimum health standards tulad ng pagsusuot ng face masks.

Pagbubukas ng mga malls sa NCR, extended — MMDA

ni Lolet Abania | November 1, 2021

Sumang-ayon na ang mga mall operators na palawigin ang kanilang operating hours sa gitna ng pagbibigay-daan para sa panahon ng kapaskuhan.

Sa isang radio interview ngayong Lunes kay Metropolitan Manila Development Authority (MMDA) chairperson Benhur Abalos, sinabi nitong iminungkahi niya ang extension ng mall hours dahil sa ang bilang ng mga sasakyan sa EDSA ay dumarami na aniya, posibleng magdulot ng mas matinding trapiko.

“Pumayag naman ang mga malls [mall operators],” ani Abalos.

Ayon kay Abalos, nag-aalala lamang ang mga mall operators hinggil sa ipinatutupad na curfew at ang limitadong kapasidad na pinapayagang magsakay ng mga pasahero sa mga public utility vehicles (PUVs).

Paliwanag naman ng MMDA chief, mayroon nang resulta mula sa botohang ginawa ng mga Metro Manila mayors hinggil sa curfew at isang resolution ang kanilang nabuo habang ipapalabas nila ito isa o dalawang araw mula ngayon.

Para sa limited capacity sa pampublikong transportasyon, sinabi ni Abalos na ang Inter-Agency Task Force (IATF) for the Management of Emerging Infectious Diseases ay pinalawig na ito ng hanggang 70%.

Matatandaang hiniling ni Abalos sa mga mall operators na i-extend ang kanilang operating hours para mabawasan ang trapiko at makatulong sa pag-angat ng ekonomiya ng bansa.

Bukod dito, iminungkahi rin ni Abalos sa kanila na mag-iskedyul ng mga sales tuwing weekends at holidays lamang, subalit huwag itong gawin kapag weekdays.

Pinaigsi naman ang curfew sa Metro Manila na mula alas-12:00 ng hatinggabi hanggang alas-4:00 ng madaling-araw simula noong Oktubre 13.

Gayundin, inanunsiyo ng Malacañang na ang NCR at 10 iba pang lugar ay isinailalim sa Alert Level 3 mula sa Nobyembre 1 hanggang 14.

Marami ring mga establisimyento ang pinayagang mag-operate ng 30% indoor venue capacity na para lamang sa mga fully vaccinated individuals at 50% outdoor venue capacity, subalit dapat ay fully vaccinated na ang kanilang mga empleyado.

Mula Okt. 29-Nob. 2... Kalsada sa EDSA at España Blvd., isasaayos — MMDA

ni Lolet Abania | October 29, 2021

Nag-abiso ang Metropolitan Manila Development Authority (MMDA) sa mga motorista ngayong Biyernes na humanap muna ng mga alternatibo ruta dahil sa nakatakdang pagsasagawa ng Department of Public Works and Highways (DPWH) ng reblocking at repairs sa ilang bahagi ng EDSA at España Boulevard.

Sa kanilang social media pages, ayon sa MMDA, ang road reblocking at repairs ay magsisimula ng alas-11:00 ng gabi ng Biyernes, Oktubre 29, hanggang alas-5:00 ng madaling-araw ng Martes, Nobyembre 2.

Ang mga lugar na isasaayos ay ang mga sumusunod:

• España Boulevard

• C.P Garcia Francisco Street hanggang Aguinaldo Street (2nd lane mula sa sidewalk) • EDSA Quezon City after Annapolis Street hanggang bago ang Boni Serrano flyover Northbound (3rd lane mula sa sidewalk)

• EDSA Tramo flyover, Pasay City