Target sa rush hour... Balik-number coding, inihirit – MMDA

ni Lolet Abania | November 22, 2021

Nakatakdang irekomenda ngayong linggo ng Metropolitan Manila Development Authority (MMDA) sa Metro Manila mayors ang muling pagbabalik ng number-coding scheme sa hapon na rush hour.

Sa isang press briefing ngayong Lunes, sinabi ni MMDA chairman Benhur Abalos ang rekomendasyon ay nagmula sa Technical Traffic Division ng ahensiya.

“This week I’m going to present to the mayors the study of our Technical Traffic Division recommending na gawin muna nating hapon [ang number-coding], subukan natin,” ani Abalos.

Ayon kay Abalos, ang tinatawag na afternoon rush hour ay nagsisimula ng alas-5:00 ng hapon hanggang alas-8:00 ng gabi.

“Once they (mayors) approve it, ‘yun na ‘yun. It’s the Metro Manila Council,” sabi ni Abalos.

Kapag muling ipinatupad ang scheme, aniya ay inisyal na para sa mga private vehicles lamang, habang hindi kasali rito ang mga medical frontliners.

“Exempted ang public transport, kasi importante ang public transport,” saad ni Abalos, at ipinuntong ang mahabang pila ng mga pasahero na karamihan ay mga empleyado na bibiyahe ng papasok sa kanilang mga trabaho at pauwi kapag inabot na ng rush hours.

Sa ngayon, ang mga public utility vehicles (PUVs) ay pinapayagang magsakay ng 70% passenger capacity dahil pa rin sa COVID-19 pandemic.

Paliwanag ni Abalos na kahit ang bilang ng mga sasakyan sa lansangan ay humahabol na gaya sa pre-pandemic level, ang public transport system sa gitna ng pandemya ay hindi pa rin normal.

“Once sabihin namin na whole day you can’t use your car, they will have to queue,” wika ni Abalos. “We really have to balance things out.”

Utos sa NCR mayors... ‘Di pa bakunadong bata, ‘wag payagan sa malls – P-Du30

ni Lolet Abania | November 16, 2021

Nakatakdang magpulong ang isang technical working group (TWG) na binubuo ng mga health officials sa Metro Manila ngayong Martes ng hapon upang talakayin ang age restrictions para sa mga menor-de-edad na papasok sa mga malls, ayon sa Metropolitan Manila Development Authority (MMDA).

Sa isang interview kay MMDA chairman Benhur Abalos ngayong Martes, sinabi nitong posibleng sa Miyerkules ay ipiprisinta ng TWG ang kanilang rekomendasyon sa mga mayors para sa kanilang pag-apruba hinggil dito.

“Kung matapos kami mamaya, baka bukas magpulong na ang mga mayor,” sabi ni Abalos.

“The earlier, the better for everyone,” dagdag pa niya.

Ayon kay Abalos, ginawa ang pulong matapos mai-report na isang 2-taong-gulang na batang lalaki ang nagpositibo sa test sa COVID-19 tatlong araw matapos na dalhin siya ng mga magulang sa mall.

Nauna nang nagbigay ng direktiba si Pangulong Rodrigo Duterte, sa kanyang Talk to the People nitong Lunes ng gabi, sa mga local government units (LGU) na gumawa ng isang ordinansa hinggil sa pagre-restrict sa mga kabataan na nasa edad 11 at pababa na pumunta sa mga malls.

Gayundin, sinabi ng Pangulo na agad na aksiyunan ng mga LGUs ang pagpapatupad ng travel restrictions sa mga bata na hindi pa bakunado.

“On this note, I am calling all LGUs to consider passing ordinances for age restriction against minors who can be allowed in going to mall. We cannot allow those below 12 years old or those unvaccinated to be exposed to the risk of COVID-19 in public places,” sabi ni P-Duterte.

Umapela rin ang Punong Ehekutibo sa mga magulang na higpitan ang kanilang mga anak sa paglabas ng bahay dahil ang mga unvaccinated na mga bata ayon sa Pangulo, “no defense mechanism against the virus.”

“Alam ko kayong mga magulang, gustung-gusto ninyo ipasyal ang anak ninyo after staying at home due to lockdown pero kung isipin ninyo, kung maliliit pa ang anak ninyo at ‘di pa bakunado, do not expose them to the virus,” sabi pa ng Pangulo.

Ayon naman kay Abalos, susubukan ng mga Metro Manila mayors na makabuo ng isang uniform ordinance na lamang.

“’Yun ang usapan naming mga mayor dahil very porous ang mga border namin,” saad ni Abalos.

“’Yung magulang, ‘yung parental responsibility niya ipasok niya. Bilang mga magulang dapat manggaling na rin sa atin ,” apela pa ni Abalos.

NCR mayors, hihilingin sa IATF na ‘wag nang gawing mandatory ang pagsusuot ng face shields – Abalos

ni Jasmin Joy Evangelista | November 8, 2021

Inanunsiyo ni MMDA Chair Benhur Abalos na hihilingin ng Metro Manila Council sa IATF na huwag nang gawing mandatory ang pagsuot ng face shield maliban na lamang sa mga critical areas.

Aniya, voluntary na lamang ito at "matter of personal choice” at mandatory na lamang kung nasa ospital, health centers, at public transportation.

“Napag-usapan namin sa face shield. Number 1, ito 'yung isasagot ko sa IATF na tanggalin na po ang face shields, hindi na gawing mandatory except for critical places,” ani Abalos sa isang panayam.

Ayon pa rito, susuportahan nila ang suhestiyon ni Interior and Local Government Secretary Eduardo Año tungkol sa non-mondatory wearing ng face shields.

Samantala, sa Maynila ay hindi na mandatory ang pagsusuot ng face shields matapos lagdaan ni Mayor Isko Moreno ang executive order hinggil dito.

Batay sa kautusan, ang pagsusuot ng face shields ay mananatili lamang mandatory sa hospital settings, medical clinics, at iba pang medical facilities.

“…The wearing of face shield in the City of Manila is non-mandatory except in hospital setting, medical clinics, and other medical facilities, which shall remain to be mandatory,” ani Moreno.