MMDA naglabas na ng guidelines sa mga magsasagawa ng motorcade at caravan sa NCR

ni Jasmin Joy Evangelista | December 13, 2021

Naglabas na ng guidelines ang Metropolitan Manila Development Authority (MMDA) sa mga partido at organisasyong magsasagawa ng motorcades at caravans sa NCR.

Narito ang mga rules batay sa pahayag na inilabas ng ahensiya nitong Sabado:

* Ang MMDA ang magre-regulate, evaluate, at mag-i-issue ng permits sa mga motorcades/caravans na gaganapin sa NCR. Ang LGU naman na nakasasakop sa paggaganapan nito ay siyang naka-in charge sa mga aktibidad nito.

* Papayagan lamang ang mga motorcades/caravans tuwing weekend at holiday mula 5:00 a.m. hanggang 10:00 a.m.

* Ang mga organizers ay kailangang mag-apply ng Roadway Private Utilization Permit (RPUP) sa MMDA o concerned LGU. Kailangang nakalagay sa aplikasyon ang pangalan ng event, organisasyon, date, time, ruta, estimated na bilang ng mga sasakyang makikiisa, program of activities, at iba pang kaugnay na detalye.

* Kailangang sumunod ng organizers sa mga guidelines hinggil sa pandemya.

Matatandaang nagdulot ng mabigat na trapiko ang isinagawang caravan nina Bongbong Marcos at Sara Duterte noong nakaraang linggo at kasunod nito ay humingi ng paumanhin ang kanilang kampo sa mga naapektuhan nito.

Muling pagpapatupad ng number coding, oobserbahan pa ng Metro Manila mayors

ni Jasmin Joy Evangelista | December 1, 2021

Oobserbahan muna ng Metro Manila Mayors ang muling pagpapatupad ng number coding tuwing rush hour sa hapon na magsisimula ngayong araw, Disyembre 1.

“If it won’t work, we will make it in the mornings. And if it will not work again, we will make it whole day,” ani MMDA chairman Benhur Abalos.

Tungkol naman sa kung paano matutukoy ng traffic enforcers ang mga TNVS sa private motorists, sinabi ng MMDA chairman na nakikipag-ugnayan na sila sa Grab Philippines upang magkabit ng stickers sa sasakyan ng mga partner-drivers nito.

Sinabi rin ni Abalos na exempted sa coding policy ang mga emergency.

“If it’s not an emergency, just follow the rules. Everyone should really follow... Our policy is not so stringent, it’s only three hours a day,” paliwanag niya.

Base sa pag-aaral ng MMDA, kapag naipatupad na ang number coding ay mababawasan ng 2,700 na sasakyan ang bumabiyahe sa EDSA.

Sa rush hour ng hapon... Balik-number coding sa NCR, start na — MMDA

ni Lolet Abania | November 29, 2021

Napagkasunduan na ng karamihan sa mga mayors ng National Capital Region (NCR) na ibalik ang number coding scheme kung saan isasagawa ito tuwing rush hour ng hapon.

Sinabi ni Metropolitan Manila Development Authority (MMDA) chairman Benhur Abalos na batay sa report ang number coding scheme ay ipatutupad Lunes hanggang Biyernes mula alas-5:00 ng hapon hanggang alas-8:00 ng hapon at para lamang ito sa mga pribadong sasakyan.

Ang mga public utility vehicles (PUVs) naman ay exempted sa scheme dahil sa nananatili pa rin silang nag-o-operate sa limitadong kapasidad ng mga pasahero sa ilalim ng Alert Level 2.

Nakasaad naman sa report na ang aktuwal na implementasyon ng number coding scheme ay magsisimula dalawang araw matapos na ang resolution ay mailathala sa Official Gazette sa Martes.