Pagkakalat sa mga campaign rallies, iwasan – MMDA

ni Lolet Abania | February 14, 2022

Nanawagan ang Metropolitan Manila Development Authority (MMDA) sa mga supporters ng mga kandidato para sa 2022 elections na iwasan ang pagkakalat o pagtatapon ng mga basura habang nakikilahok sa mga campaign rallies.

“Ini-encourage natin ‘yung mga supporters ng atin pong mga kandidato na iwasan po ‘yung pagkakalat,” sabi ni MMDA officer-in-charge General Manager Romando Artes sa isang radio interview ngayong Lunes.

Ayon kay Artes, ang mga personnel mula sa Metro Parkways Clearing Group (MPCG) at Sidewalk Clearing Operations Group (SCOG) ng MMDA ay sinusundang linisin ang mga naiiwang mga basura sa mga katulad na aktibidad.

Una nang ipinaalala ni Department of Environment and Natural Resources (DENR) Secretary Roy Cimatu sa mga kandidato na dapat na maging environmentally conscious sa pagsisimula pa lamang ng campaign period noong Pebrero 8.

Pinaalalahanan din ni Cimatu ang mga kandidato na aniya, paghiwalayin nang maayos ang kanilang campaign materials at i-dispose ito nang tama.

Matatandaang ang DENR at mga concerned government agencies ay lumagda sa isang joint memorandum circular na hihimok sa mga political parties, party-list groups, at bawat kandidato na ipatupad ang Solid Waste Management Act of 2000 para sa pagkakaroon ng “Basura-Free Elections.”

Noong campaign period para sa 2019 elections, nakakolekta ang MMDA ng 29 truckloads o 200.37 tons ng discarded election-related materials mula Marso 1 hanggang May 16.

Para maging campaign manager ni Marcos… MMDA Chairman Abalos, nag-resign

ni Jasmin Joy Evangelista | February 7, 2022

Nag-resign na bilang MMDA chair si Benhur Abalos upang magtrabaho bilang campaign manager ni presidential aspirant Ferdinand "Bongbong" Marcos Jr.

"I would like to announce that I am resigning as MMDA chairman," ani Abalos sa isang press conference.

Si Abalos, na nag-serve bilang campaign manager ni Marcos noong 2016, ay sinabing ipinasa ang kanyang resignation letter kay Pangulong Duterte.

"Kaibigan ko po si BBM. Napakabait na tao. Lahat po tayo may kanya-kanyang pananaw sa lahat ng bagay...Maging sa presidente, ok lang yan. It's just an exercise. But at the end of every electoral exercise, we must unite as a country and as a people. Ako po ay BBM dahil naniniwala ako sa kanya, mabait po siya," aniya sa mga reporter.

"This will be my last press conference," sabi pa ni Abalos kung saan nagbigay na rin umano siya ng instructions sa MMDA general manager hinggil sa continuing programs para masugpo ang COVID-19.

Sa Martes, Pebrero 8, ang opisyal na simula ng campaign period para sa mga kakandidato sa 2022 elections.

Kahit Alert Level 2 na... 4 LGUs sa NCR, tuloy ang restriksyon sa mga ‘di bakunado – MMDA

ni Lolet Abania | February 1, 2022

Walang tinatawag na automatic lifting ng mga restriksyon, sa apat na local government units (LGUs) sa National Capital Region (NCR), hinggil sa mga hindi bakunadong indibidwal kahit pa ang Metro Manila ay ibinaba na sa Alert Level 2, ayon sa Metropolitan Manila Development Authority (MMDA).

Sa isang press conference ngayong Martes, sinabi ni MMDA Chairperson Benhur Abalos na ang mga ordinances ng Parañaque, Pasay, Quezon City, at Pateros ay walang automatic lifting clause para sa kanilang restriksyon laban sa mga unvaccinated individuals.

“Four LGUs don’t have automatic lifting clause but three LGUs will be issuing a new executive order. These are Parañaque, Pasay, and Quezon City,” sabi ni Abalos.

“Only Pateros will be left as they will still discuss the issue tomorrow,” dagdag ng opisyal.

Una nang napagkasunduan ng Metro Manila Council (MMC), na binubuo ng 17 mayors sa rehiyon, na higpitan ang galaw ng mga unvaccinated individuals sa NCR sa ilalim ng Alert Level 3. Ang mga naturang LGUs ay nag-isyu rin ng kani-kanilang mga ordinansa hinggil dito.

Sa bagong executive order, pinanatili ng Pasay City government na ang mga hindi bakunadong indibidwal ay papayagan lamang lumabas para sa essential purposes kahit pa nasa ilalim na ng Alert Level 2.

Para kay Abalos, ang lokal na pamahalaan ng Pasay City ay may awtoridad na panatilihin ang restriksyon laban sa mga unvaccinated individuals.

Nauna nang isinailalim ng Inter-Agency Task Force (IATF) ang NCR at pito pang lalawigan na ibalik ito sa Alert Level 2 mula Pebrero 1 hanggang 15.