Sa 6 na vax sites.. Pagbabakuna sa edad 5-11, start na sa Peb. 4 — Palasyo

ni Lolet Abania | January 31, 2022

Inanunsiyo ng Malacañang na ang pagbabakuna kontra-COVID-19 sa mga kabataang edad 5 hanggang 11 ay isasagawa sa anim na vaccination sites sa Biyernes, Pebrero 4.

Ayon kay acting Presidential Spokesperson Karlo Nograles, ang pagbabakuna sa naturang age group ay sabay-sabay na gagawin sa sumusunod na vax sites:

• The Philippine Heart Center

• Philippine Children’s Medical Center

• National Children’s Hospital

• Manila Zoo

• SM North Edsa (Skydome)

• Fil Oil Gym in San Juan City

“Mahalaga po ito sa ating paghahanda sa muling pagbabalik ng face-to-face classes, pisikal na balik eskwela,” ani Nograles sa Palace briefing ngayong Lunes. Sinabi ng opisyal na ang Pfizer vaccines para sa nasabing grupo ng menor-de-edad ay inaasahang darating ngayong linggo.

Una nang sinabi ng Department of Health (DOH) na may kabuuang 168,355 kabataan edad 5 hanggang 11 ang nagparehistro na para sa pagbabakuna kontra-COVID-19 sa kanilang mga local government units (LGUs).

Binanggit din ni National Task Force Against COVID-19 medical adviser Dr. Ted Herbosa na tinatayang 780,000 doses ng COVID-19 vaccine para sa mga minors ang darating sa Enero 31.

Samantala, ayon kay Nograles nasa tinatayang 7.5 milyon o 59% ng mga adolescents, edad 12 hanggang 17 ang fully vaccinated na laban sa COVID-19 hanggang nitong Enero 28.

“Tinitiyak natin na ligtas at epektibo ang mga bakunang gagamitin sa mga bata. Walang dapat ipangamba ang mga magulang. The doses for minors have been reformulated so that these are appropriate for them,” giit ni Nograles.

“Ibig sabihin, mas mababa po ang doses na ituturok sa kanila. Kaya’t kung available na ito sa inyong mga lugar, dalhin niyo na po ang inyong mga anak sa vaccination sites,” sabi pa ni Nograles.

6.2 M minors na edad 12-17, fully vaccinated na kontra-COVID-19

ni Lolet Abania | January 26, 2022

Mahigit sa 6.2 milyong kabataan na nasa edad 12 hanggang 17 ang fully vaccinated na kontra-COVID-19, ayon sa isang health expert ngayong Miyerkules.

Sinabi ni Dr. Mary Ann Bunyi ng Department of Health-Technical Advisory Group, ito ay nasa 58.7% na ng target population na 10.7 milyong menor-de-edad na 12 hanggang 17-anyos.

Gayundin, ayon kay Bunyi nasa 7.6 milyon o 71.21% ang nakatanggap naman ng isang dose ng bakuna. Base aniya, sa report ng Food and Drug Administration (FDA), nasa 3.11% lamang ng naturang age group ang nai-report na nakaranas ng adverse events.

Sa naranasang adverse events, 94% dito ay kinokonsiderang non-serious habang nasa 5% naman ang itinuturing na serious o malubha. Ang pinakakaraniwang reaksyon na nai-report ay pagkahilo, masakit sa bahagi ng injection site, pyrexia, masakit ang ulo, at pagtaas ng blood pressure.

Mayroon ding dalawang kaso ng myocarditis at isang kaso ng pericarditis. “These patients have all recovered from these conditions,” ani Bunyi.

Gayunman, ayon kay Bunyi ang naging sanhi ng sakit ay patuloy nilang iniimbestigahan. Hinimok naman ng health expert, ang mga magulang na pabakunahan na rin kontra-COVID-19 ang kanilang mga anak na nasa edad 5 hanggang 11.

“Ang mga bakunang binibigay ng ating pamahalaan ay nagdaan ng masusing pag-aaral.

So, hindi naman magbibigay ang pamahalaan ng isang bakuna na hindi ligtas at mabisa para sa mga batang ito,” giit ni Bunyi sa DOH Kapihan.

“So kung ang hinahangad nila ay protektahan ang kanilang anak laban sa sakit na ito at maiwasan na magkaroon sila ng malalang sakit then maiging mabakunahan sila,” dagdag pa niya.

Edad 0-4 na pagbabakuna kontra-COVID, puwede sa Abril, Mayo — DOH

ni Lolet Abania | January 20, 2022

Inihayag ng Department of Health (DOH) ngayong Huwebes na ang pagbabakuna laban sa COVID-19 para sa edad 0 hanggang 4 ay maaaring magsimula sa Abril o Mayo ngayong taon.

Sa Laging Handa public briefing, sinabi ni DOH Undersecretary Myrna Cabotaje, kinokonsidera ng gobyerno na sa ganitong panahon ito gawin at kapag mayroon nang pag-aaral at rekomendasyon ng pagbabakuna sa grupo ng mga pinakabatang edad.

“Titingnan natin, baka by second quarter, mga April or May, kung mayroon nang bakuna na puwede sa 0-4 at may mga pag-aaral na at recommendation na,” sabi ni Cabotaje.

Una nang sinabi ni vaccine czar Secretary Carlito Galvez Jr. na target ng gobyerno na makapagbakuna laban sa COVID-19 ng tinatayang 11.11 milyong kabataang edad 0 hanggang 4-anyos bago matapos ang Hunyo.

Ayon kay Galvez, nagsasagawa na sila ng contingencies upang matiyak ang suplay ng mga doses para sa 0-4 years old dahil ang COVID-19 vaccine brands na may formulation para sa mga bata ay limitado lamang, kung saan aniya, maaaring magdulot ng kakulangan nito sa unang quarter ng taon.

Ito na lamang ang natitirang age group na hindi pa nasisimulan ang COVID-19 vaccination rollout sa bansa. Ayon kay Cabotaje, hanggang nitong Miyerkules, tinatayang nasa 66.4 milyong Pilipino na ang fully vaccinated kontra-COVID-19.