South Korean drills, kinondena ng North Korea

ni Eli San Miguel @World News | July 8, 2024

Kinondena ni Kim Yo Jong, ang kapatid ng lider ng North Korean na si Kim Jong Un, ang mga kamakailang military drills ng South Korea malapit sa border bilang isang malinaw na hakbang ng paghahamon, ayon sa ulat ng state media KCNA ngayong Lunes.

Binatikos din niya ang Pangulo ng South Korea na si Yoon Suk Yeol dahil sa pagpapalala ng tensyon sa Korean peninsula upang ilihis ang atensyon mula sa kanyang mga pagkukulang sa domestikong pulitika.

Itinuro ni Kim Yo Jong ang isang online petition na may higit sa 1 milyong lagda na humihiling ng impeachment ni Yoon bilang patunay.

Inihayag ni Kim na kung sakaling hatulan ng North Korea na nilalabag ang kanilang soberanya, agad na isasagawa ng kanilang sandatahang lakas ang kanilang misyon at tungkulin ayon sa kanilang konstitusyon.

Ipinagpatuloy ng militar ng South Korea ang mga live-fire artillery drills malapit sa western maritime border noong bandang huli ng Hunyo, sa unang pagkakataon mula noong 2018. Noong nakaraang buwan, sinabi ng South Korea na ititigil nito ang isang kasunduang militar na nilagdaan noong 2018 na naglalayong magpagaan ng tensyon, bilang protesta sa trash balloon na ipinadala ng North Korea patungo sa South.

U.S., Japan at South Korea, pumalag sa pangha-harass ng China

ni Joy Repol @World News | August 21, 2023

Nagkasundo sina U.S. President Joe Biden at ang mga lider ng South Korea at Japan sa Camp David na palalimin ang kooperasyong militar at pang-ekonomiya gayundin ang pagkondena sa umano’y agresibong pag-uugali ng China sa West Philippine Sea.

Idinaos ng administrasyong Biden ang summit kasama ang mga pinuno ng mga pangunahing kaalyado ng U.S. sa Asya – si South Korean President Yoon Suk Yeol at Japanese Prime Minister Fumio Kishida – sa hangarin na maipakita ang pagkakaisa sa

harap ng lumalaking kapangyarihan ng China at mga nuclear threats mula sa North Korea.

Sumang-ayon din silang magsagawa ng military training exercises taun-taon at magbahagi ng real-time information sa paglulunsad ng missile ng North Korea sa katapusan ng 2023.

Nangako rin ang mga bansa na magdaraos ng mga trilateral summit taun-taon.

Hirit ng Amerika.. P5B investment sa military bases, para sa ekonomiya ng 'Pinas

ni Mylene Alfonso | April 13, 2023

Inaasahang maglalaan ang Estados Unidos ng hindi bababa sa $100 milyon o P5 bilyon para sa pagpapaunlad ng imprastraktura sa siyam na Enhanced Defense Cooperation Agreement (EDCA) sites sa Pilipinas.

Ito ang inihayag ni US Defense Secretary Lloyd Austin matapos ang 2+2 Ministerial meeting ng Pilipinas at US sa unang pagkakataon sa loob ng pitong taon makaraang ianunsyo ang lokasyon ng apat na bagong EDCA sites na bansa.

“We’re proud of the investments we’re making, and by the end of FY ’23 we expect to have allocated more than $100 million in infrastructure investments at the new and existing EDCA sites,” pahayag ni Austin sa isang press conference.

“So those investments will spur job creation and economic growth in local Philippine communities,” wika pa ng opisyal.

Nakatuon din aniya ang Amerika sa mabilis na pagsasapinal ng Philippine-US Bilateral Defense Guidelines na nagtatakda ng vision para sa alliance cooperation sa lahat ng operational domains, space at cyberspace.

Malugod namang tinanggap ni Philippine Foreign Affairs Secretary Enrique Manalo at Department of National Defense Officer-in-Charge Carlito Galvez, Jr., na naroroon din sa media briefing, ang hakbang ng US na suportahan ang bansa sa pamamagitan ng EDCA.