Ermat, ‘di matanggap ang pagsampal sa kanya ng anak

ni Sister Isabel del Mundo - @Mga kuwento ng buhay at pag-ibig | June 07, 2023

Dear Sister Isabel,

Mayroon akong anak na mabait, magalang at masunurin, ngunit nitong nagdaang mga araw ay naging bugnutin at wala nang respeto sa akin.

25-anyos na siya at may dyowa. Madalas ay pinapapunta niya ang dyowa niya sa bahay at do’n niya na rin pinapatulog. Pinagsabihan ko siya na hindi tama ang kanyang ginagawa dahil hindi pa naman sila kasal. Nagalit ito sa akin at bigla na lamang akong sinampal. Napaluha ako, hindi ko akalaing magagawa niya akong saktan.

Tulungan niyo ako, Sister Isabel. Hindi ko na kaya ang ginagawa ng anak ko sa akin. Ano kaya ang marapat kong gawin?

Nagpapasalamat,

Nanay Donita ng Pangasinan

Sa iyo, Nanay Donita,

Hindi katanggap-tanggap ang ginagawa ng iyong anak sa iyo. Iparehab mo na ‘yan. Malamang ay gumagamit na iyan ng ipinagbabawal na gamot kaya nagawa niyang saktan ang sarili niyang ina. Kumilos ka na agad bago lumala ang lahat. Humingi ka ng tulong sa DSWD o sa mga kinauukulan. Hindi ‘yan kayang gawin ng matinong anak. Lumapit ka rin sa dalubhasang Psychologists o Psychotherapist. Humingi ka ng tulong sa kanila. Gawin mo na agad ang payo ko upang ‘di na humantong sa mas malala pang sitwasyon ang kalagayan mo.

Sumasaiyo,

Sister Isabel del Mundo

Dudang may relasyon ang mister at ina

ni Sister Isabel del Mundo @Mga Kuwento ng Buhay at Pag-ibig | March 1, 2023

Dear Sister Isabel,

Magandang araw sa inyo r’yan.

Gusto kong humingi ng payo sa inyo tungkol sa nanay ko na kasama namin ng mister ko sa bahay. Napansin kong may lihim siyang pagtingin sa mister ko at kinakabahan ako, lalo na kapag sila lang ang naiiwan sa bahay tuwing may seminar ako sa ibang lugar.

Minsan ay nahuli ko ang malalagkit nilang tinginan sa isa't isa at ramdam ko na may kakaibang namamagitan sa kanila na para bang may nangyayari na sa kanilang dalawa tuwing wala ako.

Ano ang dapat kong gawin kung totoo ang hinala ko? Umaasa ako na mabibigyan n’yo ako ng kaukulang payo.

Nagpapasalamat,

Sherly ng Batangas

Sa iyo, Sherly,

Nakakalungkot naman ang problemang dinulog mo sa akin dahil mismong nanay mo ang naging kaagaw mo sa atensyon ng iyong asawa.

Makabubuting siguraduhin mong tama ang hinala mo at hulihin sila sa akto na kunwari ay a-attend ka ng seminar sa malayong lugar. Kung totoo ang hinala mo at nahuli sila sa akto, makipaghiwalay ka na sa asawa mo dahil hindi siya karapat-dapat mahalin.

Tungkol naman sa nanay mo, huwag ka nang kumibo, umalis ka na lang ng tuluyan sa bahay na ‘yan, na siyang naging pugad ng kataksilan ng iyong asawa at ina. Lumayo ka na sa kanila, tutal may trabaho ka naman, mamuhay ka na lang nang malayo sa kanila.

Ang Diyos ay makatarungan at bahalang magparusa sa kanila. Makikita mo na susuwertehin ka sa buhay, samantalang katakot-takot na kamalasan naman ang sasapitin ng mga nagtaksil sa iyo. May awa ang Diyos at tiyak na makakatagpo ka rin ng lalaking magmamahal nang tapat habambuhay. Liligaya ka rin sa pag-ibig kung hihilingin mo sa Diyos.

Sumasaiyo,

Sister Isabel del Mundo

72-anyos na may foreigner bf, takot magpakasal dahil tututulan ng mga anak

ni Sister Isabel del Mundo @Mga Kuwento ng Buhay at Pag-ibig | January 23, 2023

Dear Sister Isabel,

Biyuda ko at 72-anyos na. Hindi ko alam ang gagawin ko dahil hindi ko inaasahan na seryoso pala sa akin ang ka-chat kong Muslim na foreigner at kaedad ko. Darating siya next month, papakasalan niya raw ako at bibilhin niya ang house and lot sa subdivision namin.

Hindi ko alam ang gagawin dahil tiyak na hindi papayag ang mga anak ko kahit pa sabihing may sarili na silang pamilya. Sa edad kong ito, siguradong tututol sila.

Matagal din kaming hindi magkakasundo ng mga anak ko noon dahil nag-OFW ako nang mawala ang ama nila at bihira akong umuwi. Wala kaming bonding, kaya malayo ang loob nila sa akin. Hindi namin maramdaman ang pagmamahal na inaasam ng bawat isa, at kamakailan lang kami nakapag-adjust at nadama ang tunay na pagmamahalan ng isang pamilya. At ngayon, mag-aasawa ako ng foreigner at hindi pa namin kapareho ng relihiyon, gayung hindi maganda ang pagkakakilala nila sa mga Muslim, lalo na sa parteng pag-aasawa ng higit sa isa. Siya nga pala, hanggang apat ay puwede silang mag-asawa, at pangatlo ako kung sakali.

Ano ang dapat kong gawin? Buo na ang plano namin ng magiging asawa ko. Titira kami sa bahay na plano niyang bilhin at malapit lang din sa bahay na tinitirahan namin ng aking mga anak at apo.

Turuan n’yo ako ng tamang diskarte para masabi ko nang maayos sa mga anak ko ang balak kong pag-aasawa.

Nagpapasalamat,

Noemi ng Taguig City

Sa iyo, Noemi,

Ang pag-aasawa ay wala sa edad dahil hindi tumatanda ang puso. Hindi natin hawak ang destiny natin pagdating sa pag-ibig dahil Diyos lamang ang nakakaalam kung sino ang magiging kabiyak ng ating puso, na sa takdang panahon ay darating kahit hindi natin hanapin. Marahil ay may misyon kayong gagampanan ng magiging asawa mo na itinakda ng panahon na kayong dalawa ang gaganap according to God’s master plan.

Ipinapayo ko na sumige ka kung inaakala mong kaya mo pa ang buhay may-asawa sa isang kaedad mo. Ayaw mo ba niyan? Bibilhan ka niya ng bagong house and lot d’yan mismo sa subdivision na malapit sa inyo ng mga anak at apo mo. Napakasuwerte mo dahil para ka nang tumama sa lotto.

Sa palagay ko naman ay hindi tututol ang mga anak mo, lalo pa’t bibilhan ka ng house and lot ng boyfriend mong foreigner d’yan sa lugar n’yo. May sarili na silang pamilya at sa palagay ko ay maligaya sila sa pamilya at matutuwa sila kung ikaw din ay liligaya sa natagpuan mong pag-ibig dahil ay makakasama ka na habambuhay.

Gayundin, hindi na sila mag-aalala kung hindi ka nila maaasikaso sa sandaling kailangan mo sila. Huwag ka nang magpatumpik-tumpik pa, sabihin mo sa iyong mga anak ang plano mong pagpapakasal. Hangad ko ang iyong kaligayahan at magandang buhay sa hinaharap.

Sumasaiyo,

Sister Isabel del Mundo