Takot mabuking na may iba nang pamilya

ni Sister Isabel del Mundo - @Mga kuwento ng buhay at pag-ibig | April 05, 2021

Dear Sister Isabel,

Matagal nang gumugulo sa aking isipan ang sitwasyong napasukan ko. Hindi alam ng asawa ko na may kinakasama ako sa Visayas at may isa akong anak sa kanya. Nadedestino ako sa malalayong lugar, kaya nagawa kong matukso sa iba. Mabait ang asawa ko at may tatlo kaming anak na puro babae, tapos na sila ng pag-aaral at nasa mabuti nang kalagayan.

Ang pangalawang babae sa buhay ko ay bata pa at may isa kaming anak na 2-anyos. Palagay ko ay nakakahalata na ang misis ko dahil madalang na akong umuwi sa kanya.

Ano ang mabuti kong magagawa, ipagtapat ang lihim ko o hayaan nang siya mismo ang makatuklas nito? Baka magkagulo kung malalaman ng misis ko ang lahat ng ito. Umaasa akong mabibigyan n’yo ng karapat-dapat na payo ang problemang idinudulog ko sa inyo.

Gumagalang,

Rod ng Cebu

Sa iyo, Rod,

Makabubuting sa bibig mo na mismo manggaling ang lahat. Ihanda mo ang iyong sarili sa anumang maaaring maganap kapag ipinagtapat mo na ito sa misis mo. Humingi ka ng tawad at magpakumbaba. Sa umpisa ay talagang masakit kapag nalaman ng misis mo ang iyong sikreto, subalit tulad ng sabi mo, mabait ang asawa mo, kaya sa palagay ko ay mauunawaan niya ang lahat. Makabubuting sabihin mo na rin sa kabit mo na may sarili kang pamilya at mas priority mo sila. Mangako ka na tuloy pa rin ang sustento mo sa kanila, lalo na sa anak n’yo. Bata pa ang kabit mo, kaya marami pa siyang makikilala na papalit sa iyo. Harapin mo nang mahinahon ang mga susunod na mangyayari. Gayundin, manalangin ka nang taimtim sa Diyos na gabayan ka sa napasukan mong sitwasyon dahil natitiyak kong mailalagay mo sa ayos ang lahat at sana ay matuto ka na sa iyong pagkakamali at huwag mo na itong ulitin pa.

Alalahaning sinumang lumalagay sa tamang landas ng buhay ang siyang pagpapalain. Subalit ang mga gumagawa ng labag sa kalooban ng Diyos ay magkakamit ng kaparusahang walang hanggan.

Nawa’y nabigyan ko ng kaliwanagan ang iyong isipan. Hanggang dito na lang, pagpalain ka nawa ng Dakilang Lumikha.

Matapat na sumasaiyo,

Sister Isabel del Mundo

Dapat gawin ng misis na nahuling may kabit ang asawa

ni Sister Isabel del Mundo - @Mga kuwento ng buhay at pag-ibig | March 31, 2021

Dear Sister Isabel,

Nagpapasalamat ako dahil nagkaroon kayo ng column dito sa BULGAR tungkol sa buhay at pag-ibig. Matagal nang may gumugulo sa isip ko, subalit wala akong mapagsabihan.

Ang problema ko ay tungkol sa asawa kong nagloloko sa kasalukuyan. Masaya at panatag ang pagsasama namin mula nang kami ay ikinasal, limang taon na ang nakalilipas. Pero kamakailan ay napansin ko na matabang na ang pagtingin niya sa akin at hindi tulad noon na punumpuno ng sigla at palagi siyang nakangiti ‘pag dumarating sa bahay.

Minsan ay sinubukan ko siyang sundan at nagulat ako sa aking natuklasan na may kabit siya at ibinahay na niya. Inaway ko siya at nagalit ako nang todo. Kinompronta ko siya at hiningan ng paliwanag, subalit hindi niya ako pinansin at kusa siyang umalis.

Ngayon, paminsan-minsan na lang siya umuwi sa bahay at doon na siya natutulog sa babae niya. May tatlo kaming anak na musmos pa at wala silang kamalay-malay sa pambababae ng ama nila. Ano ang dapat kong gawin?

Gumagalang,

Josie ng Dagupan City

Sa iyo, Josie,

Ang buhay may asawa ay sadyang ganyan. Darating at darating ang panahon na magkakatabangan ang pagtingin ng bawat isa hanggang sa tuluyan nang maghiwalay gaya ng nangyari sa buhay mo. Huwag kang mabahala dahil karaniwan na sa lalaki ang nangangaliwa, subalit pansamantala lamang ‘yun. Babalik at babalik siya sa tunay niyang pamilya at mare-realize ang kanyang pagkakamali.

Umupo ka sandali at tanungin mo ang iyong sarili, “Saan ba ako nagkamali?” “Ano ba ang dapat kong baguhin sa ugali ko?” “May pinagbago na ba ang katawan ko?”

Kapag natagpuan mo na ang mga kasagutan, taimtim kang magdasal. Hilingin mo sa Diyos na bumalik sa piling mo ang iyong asawa. Hindi natutulog ang Diyos dahil makikita mo na isang araw, katabi mo na ang asawa mo, nagsisisi sa kanyang nagawa at nangangakong hindi na muli siyang matutukso sa iba.

Sa pagkakataong ‘yan, sikapin mong maging mas malambing at maunawain. Igalang mo ang iyong asawa at bigyan ng pagkakataon na muli niyang ipadama sa iyo ang dating tamis ng pag-ibig. Gayundin, ipadama mo sa kanya ang pagrespeto. Hayaan mong madama niya na siya ang boss ng tahanan at hindi sunud-sunuran lang. Panatilihin mo rin ang pagiging maaalalahanin sa lahat ng kanyang pangangailangan. Sa ganyang paraan, tiyak na babalik ang init ng kanyang pag-ibig at hindi na kailanman matutukso sa ibang babae.

Matapat na sumasaiyo,

Sister Isabel del Mundo

Todo-silbi sa mister pero nambabae pa rin, suko na pero worried sa mga anak

ni Isabel del Mundo - @ Mga kuwento ng buhay at pag-ibig| March 24, 2021

Dear Sister,

Hi, kumusta kayo? Sana ay nasa mabuti kayong kalagayan. Itatanong ko kung bakit ganito ang buhay ko, marami akong pasanin, lalo na sa asawa kong nambabae sa kabila ng buhos-buhos kong pagsisilbi sa kanya at pagsasakrispisyo sa aming mga anak? Minsan, naiisip kong umalis, pero paano ang mga anak ko? Sana’y mapayuhan n’yo ako.

Gumagalang,

Mrs. Gomez ng Samar Leyte

Sa iyo, Mrs. Gomez,

Base sa iyong pahayag, nakikita at nararamdaman kong nagkukulang ka sa pagdarasal. Wala kang panahon upang mag-ukol ng kahit kaunting sandali sa Panginoon kaya dumaranas ka ng maraming pagsubok sa buhay kung saan sa sandaling malagpasan mo, makakamit mo ang walang hanggang pagpapala.

Maganda ang ilalaan ng Diyos sa iyo kung hindi ka mawawalan ng pag-asa at patuloy na mananalig nang walang alinlangan sa kapangyarihan Niya dahil malalampasan mo ang mga pagsubok sa buhay. Alalahanin mo na hindi lamang tao ang hingi nang hingi ng pabor sa Diyos kung dumaranas ng matinding hirap. Ang Diyos man ay uhaw din sa ating pagmamahal at pagbibigay-puri sa Kanya sa pamamagitan ng pagdarasal, pagsisimba at pagtulong sa kapwa sa abot ng ating makakaya.

Kaya ngayon din, ‘wag mo nang ipagpaliban pa ang pagsisimba o pagdarasal sa harap ng iyong altar. Humingi ka ng patawad sa Diyos sa hindi pag-uukol ng kahit kaunting panahon sa Kanya. Gayundin, sikapin mong magdasal bago matulog kasama ng iyong mga anak at asawa. Alalahaning ang pamilyang sama-samang nagdarasal ay pagpapalain habambuhay. Paparating na ang suwerte sa taong ito, kaya panatilihin mo ang mabuting gawa.

Palagi mong isipin na sinumang nasa panig ng kabutihan, siya ang magwawagi sa anumang dagok ng buhay. Iwasang maging pabagu-bago ang isipan at kung ano ang unang naiisip, ‘yun ang dapat ipatupad.

Tungkol naman sa asawa mong nambababae, huminto ka sandali at magnilay-nilay, baka naman napabayaan mo na ang iyong katawan? Baka naman pagdating ng gabi na kayo’y magkatabi, hindi ka na kapana-panabik halikan o yakapin man lang? ‘Wag mong sabihin na pagod ka maghapon at gusto nang mamahinga o matulog agad. Sa buhay mag-asawa, hindi dapat mawala ang lambingan kahit saglit o simpleng yakap o halik man lang. Ayusin mo ang iyong sarili, maglaan ng pahinga bago dumating asawa mo mula sa trabaho. Panatilihing mabango ang sarili, magsuot ng damit na kaakit-akit sa pagtulog nang sa gayun ay ma-enjoy n’yo ang magdamag at palaging maging sabik na umuwi ang mister mo at hindi na humanap pa ng iba, gayundin upang matigil na ang pambababae at sa halip, ituon na lamang ang kanyang panahon sa inyong pamilya. Nawa’y makatulong ang munti kong payo sa iyo. God bless you more and more!

Matapat na sumasaiyo,

Isabel del Mundo