OFW na mister, dapat nang hiwalayan dahil wa’ ‘wenta ang pagsasama kung pareho nang may iba

ni Sister Isabel del Mundo - @Mga kuwento ng buhay at pag-ibig | April 26, 2021

Dear Sister Isabel,

Bagong kasal kami ng asawa ko at masayang namumuhay kahit kami ay mahirap lang. Mataas ang pangarap namin kaya napagkasunduan naming isa sa amin ang mag-abroad upang makaahon sa hirap at matupad ang aming mga pangarap. Sabay kaming nag-apply sa abroad at kung sino ang maunang matanggap, siya ang unang aalis.

Mabilis ang mga pangyayari, tinawagan agad ang asawa ko sa ina-apply-an niya at hindi nagtagal, tuluyan na siyang umalis upang magtrabaho sa abroad. Sa umpisa ay walang tigil ang aming communication, subalit dumating sa punto na bihira na siyang mag-video call o mag-chat at napag-alaman ko na mayroon na pala siyang kinakasama sa abroad at labis akong nasaktan, pero tiniis ko na lang ang sakit na nadama ko hanggang sa tuluyan na siyang hindi nakipag-usap sa akin.

Naputol na ang aming communication hanggang isang araw ay dumating bigla ang kanyang ina sa bahay namin at gustong papirmahan ang divorce paper na ipinadala ng asawa kong nasa abroad. Hindi ko pinirmahan kahit ako ay mayroon na ring iba. Nagmamahalan kami at namumuhay nang maligaya sa kasalukuyan.

Ano sa palagay n’yo, pipirmahan ko na ba divorce paper namin? Hihintayin ko ang inyong kasagutan.

Gumagalang,

Julie ng Batangas

Sa iyo, Julie,

Sa totoo lang, napakadaling pagpasyahan ang problema mo. Ngayong may kani-kanya na kayong mahal ng asawa mo, marapat lamang na ibigay mo na ang kalayaan niya upang ikaw ay mapanatag na rin. Tulad ng sabi mo, maligaya ka naman sa piling ng bago mong mahal, habang ang asawa mo naman ay nakatagpo na rin ng katapat niya, makabubuting pirmahan mo na ang divorce paper n’yo nang sa gayun ay makapagpakasal na rin kayo ng dyowa mo. Pakawalan n’yo na ang isa’t isa upang pareho kayong lumigaya.

Huwag kang manghinayang sa nakasanayang dapat siyang mapasaiyo dahil ikaw ang legal na asawa. Pabayaan mo na ‘yun dahil materyal na bagay lang ‘yun na madali ring maglalaho at mawawala. At sabi mo nga, mahirap lang kayo kaya siya nag-abroad. Samakatuwid, wala ka namang malaking kabuhayan na dapat panghinayangan. Ang mahalaga ay ang kapanatagan ng isipan at kaligayahan sa buhay na mahirap makamtan kung ganyang ayaw mo pa siyang bigyan ng kalayaan. Pirmahan mo na ang divorce paper n’yo at magpakasal na kayo ng karelasyon mo

ngayon.

Natitiyak kong kapwa kayo liligaya kung gagawin mo ‘yan, kaya ano pa ang hinihintay mo? Huwag ka nang magpatumpik-tumpik pa at pirmahan mo na sa lalong madaling panahon ang divorce paper n’yo. Hangad ko ang kaligayahan n’yo sa piling ng napili n’yong mahalin sa buhay.

Matapat na sumasaiyo,

Sister Isabel del Mundo

Asawang nasa ‘Pinas, balak nang iwan para sa BF na foreigner

ni Sister Isabel del Mundo - @Mga kuwento ng buhay at pag-ibig | April 22, 2021

Dear Sister Isabel,

Nagtatrabaho ako ngayon sa Dubai at may boyfriend akong foreigner dito, pero hindi niya alam na may asawa na ako sa Pilipinas. Gayunman, hindi kami kasal ng asawa ko, pero napamahal na sa akin ang dyowa kong foreigner.

Hindi alam ng asawa ko na may karelasyon ako rito at balak kong huwag nang bumalik sa Pilipinas. Sasama na ako sa BF kong foreigner at maninirahan na sa kanilang bansa dahil wala naman kaming anak ng asawa ko sa Pilipinas. Nawala na nang tuluyan ang pagmamahal ko sa kanya dahil nabaling na ito sa boyfriend ko ngayon.

Masaya ako sa piling niya, ano ang dapat kong gawin? Umaasa akong mabibigyan n’yo ng kaukulang payo ang problemang gumugulo ngayon sa isip ko.

Gumagalang,

Marilou

Sa iyo, Marilou,

‘Yan ang mahirap kapag ang mag-asawa ay nagkalayo o nagtrabaho sa abroad ang isa dahil kadalasan ay kumakaliwa ang isa. Kung hindi ka naman kasal sa asawa mo at pakiramdam mo ay wala ka nang pagmamahal sa kanya, tapatin mo na siya. Sabihin mo ang katotohanan na may karelasyon ka na r’yan sa Dubai. Gayundin, humingi ka ng tawad at ihanda ang iyong sarili sa maaaring kahinatnan ng pagsasabi sa kanya ng katotohanan.

Sa totoo lang ay matutuklasan niya rin ang lihim mo, kaya marapat lamang na sabihin mo sa kanya na hangga’t maaga at buti na lang, wala kayong anak na masasaktan at magdurusa sa mga pangyayari. Sa umpisa ay siguradong makakaramdam siya ng sakit sa kanyang kalooban, subalit paglipas ng mga araw, natitiyak ko na matatanggap niya rin ang mga pangyayari at makaka-move on unti-unti. Ipagdasal mo na lang na sana ay makahanap din siya ng babaeng karapat-dapat sa kanya.

Sa kabilang dako, nawa’y maging maligaya ka sa ipinalit mo sa kanya at sana rin ay huwag ka nang umibig pa sa ibang lalaki. Sa pakiramdam ko ay madali kang mapaibig ng mga lalaki, kaya umiwas ka sa kanila at mamuhay nang maayos sa piling ng karelasyon mo ngayon. Hangad ko ang kaligayahan mo at maayos na pamumuhay sa piling ng dyowa mong foreigner.

Matapat na sumasaiyo,

Sister Isabel del Mundo

Ginawang sex slave ng kuya, na-inlab kaya walang palag kahit bawal

ni Sister Isabel del Mundo - @Mga kuwento ng buhay at pag-ibig | April 19, 2021

Dear Sister Isabel,

Hindi ko na alam ang gagawin ko sa aking problema. Lingid sa kaalaman ng aming mga magulang, may ugnayan kami ng kapatid kong panganay. Ginagalaw niya ako at ginagamit sa gabi kapag tulog na ang lahat. Noong una, tinatakot niya ako para hindi magsumbong sa aming mga magulang, pero nitong huli ay parang nasanay na rin ako at hinahanap-hanap ko ang pagniniig namin. Ingat na ingat kaming malaman ng aming mga magulang na may nangyayari sa aming dalawa at umiinom ako ng gamot para hindi mabuntis. Ano ang dapat kong gawin? Parang napamahal na sa akin ang kuya ko. Sana ay mapayuhan n’yo ako para gumaan ang kalooban ko at hindi palaging balisa at kakaba-kaba. Hihintayin ko ang inyong payo.

Gumagalang,

Aida ng Palawan

Sa iyo, Aida,

Sumaiyo nawa ang kapayapaan.

Napakabigat ng napasukan mong sitwasyon at isang napakalaking kasalanan sa mata ng lipunan, lalo na sa mga mata ng Diyos.

Itigil mo na ang kahibangan mo. Gumising ka at huwag maging bulag sa nangyayari sa buhay mo. Ngayon din ay umiwas ka na sa kuya mo at ipaliwanag mo ang hindi magandang kahahantungan ng relasyon n’yo. Ipaunawa mo na kayo ay magkapatid at hindi mag-asawa. Idilat n’yo ang inyong mga mata sa katotohanan. Gayundin, makabubuting lumayo o magtrabaho ka sa ibayong-dagat o malayong lugar kung saan hindi alam ng kuya mo.

Kumbaga, tuluyan ka nang umiwas sa kanya dahil maling-mali ang ginagawa n’yo. Isa pa, matinding parusa ang kapalit niyan na habambuhay n’yong pagdurusahan. Ang magiging anak n’yo ay siguradong hindi magiging normal sa dahilang iisang dugo ang nananalantay sa inyo bilang magkapatid na iisang magulang ang pinagmulan.

Samantala, ang sabi mo ay umiinom ka ng gamot para hindi mabuntis. Naku, lalong masama ‘yan sa iyong kalusugan dahil may side effect ito na posibleng pagdusahan mo habambuhay.

Alam na alam n’yo na mali ang ginagawa n’yo. Ikaw na ang umiwas at lumayo ka. Putulin mo na ang relasyon n’yo ng kuya mo at matakot ka sa parusang kapalit nito. Sa totoo lang, matindi magparusa ang tadhana sa mga maling gawa, kaya gumising ka na. Huwag mo nang hayaang gamitin ka ng kuya mo. Umiwas ka na upang huwag na muling magkasala.

Matapat na sumasaiyo,

Sister Isabel del Mundo