Babae, todo-sisi sa pagpatol sa mga pamilyadong lalaki

ni Sis. Isabel del Mundo @Mga Kuwento ng Buhay at Pag-ibig | June 9, 2024

Dear Sister Isabel,

Hindi ko alam kung paano ko uumpisahan ang kuwento na gusto kong ibahagi sa inyo, dahil naguguluhan ako sa sitwasyon ko ngayon. 

Ang hirap pa lang magpakabanal no? Dati akong makasalanan ngunit dahil gusto kong magbago at mabawasan kahit kaunti ang mga nagawa kong kasalanan noon, pilit kong binabago ang mga bagay na nakasanayan ko noon. 

Marami ako naging boyfriend at kahit pamilyadong tao ay pinapatulan ko. Okey lang din sa akin ang maging isang kabit. Pero ngayon, pinagsisisihan ko na ‘yun. 

Narito ako ngayon sa probinsya para magbagong buhay, ngunit nag-uumpisa pa lang ako ay nakunsumi na agad ako sa kapitbahay namin, palibhasa hindi sila mga nakapagtapos ng pag-aaral kaya wala na para sa kanila ang mang-apak ng ibang tao.  

Palagi silang nakaharang sa gate namin, kahit na alam naman nilang doon kami dadaan. Sila pa ang galit at nakasimangot kapag dumadaan ako para lumabas. 

Sinisikap ko namang magtimpi, pero dumating na nga sa puntong nakapagsalita ako, at hindi nila nagustuhan ang mga sinabi ko. 

Mula noon, hindi na sila humarang sa gate namin upang doon mismo maglagay ng silya at magtsismisan. Hindi ko alam kung matutuwa ako o hindi sa nangyari. Nagi-guilty din ako dahil hindi ko sila nakasundo. 

Ano ba ang gagawin ko para mawala ang guilt na nararamdaman ko ngayon? 

Nagpapasalamat,

Leonora ng Pasig City

---

Sa iyo, Leonora,

Napakahirap talagang magpakabanal, ngunit kung talagang gusto mong magpakabanal ang una mong dapat matutunan ay ang kasabihan na, “Kapag binato ka ng bato, batuhin mo ng tinapay,” ibig sabihin, mag-isip ka ng bagay na ikagagaan ng loob ng kapitbahay mo para sila mismo ang mahiya at makaramdam na mali ang ginagawa nila. 

Kapag may handaan sa inyo, bigyan mo sila ng handa o kaya naman kapag nagluto ka ng masarap na ulam, ipatikim mo rin sa kanila, puwede mo rin silang bigyan ng ukay-ukay mong damit na halos bago pa. 

Ang mga ganyang tao ay walang pinag-aralan, at karamihan sa kanila ay mababaw lang ang kaligayahan. Tiyak na matutuwa sila kapag ginawa mo ‘yang mga pinapagawa ko sa iyo. 

Sa palagay ko, sila na ang kusang mahihiya, hindi na tatambay at haharang sa gate n’yo.

‘Yan ang ibig sabihin na kapag binato ka ng bato, batuhin mo rin ng tinapay. 

Hanggang dito na lang, sumaiyo nawa ang kapayapaan at tuluy-tuloy mong tahakin ang matuwid na landas ng buhay na gusto mong mangyari sa iyo.

Sumasaiyo,

Sister Isabel del Mundo

Ex-OFW, nanghihinayang sa pag-uwi

ni Sister Isabel del Mundo - @Mga kuwento ng buhay at pag-ibig | Ika-24 Araw ng Abril, 2024

Dear Sister Isabel,

Isa akong ex-ofw, at sa tinagal-tagal ko sa abroad, wala man lang akong naipundar kahit maliit na bahay. Nabigo ako sa aking pangarap.

Ang laki ng pinapadala ko sa misis ko, pero kulang pa rin daw ‘yun, kaya naisipan kong umuwi na lang at mag-isip ng negosyo para sa pamilya ko. Pero mas mahirap pala, anuman negosyong subukan ko, kulang pa rin ang kita.

Sister Isabel, balak ko sana muling mag-abroad. Ano ang maipapayo n’yo sa akin? Dapat ko bang ituloy ang pangingibang-bansa? Hihintayin ko ang payo n’yo.

Nagpapasalamat,

Gilbert ng Dagupan

Sa Iyo, Gilbert,

Ikaw na rin ang nagsabi na matagal kang nagtrabaho sa abroad, ngunit wala ring nangyaring pag-asenso sa buhay mo. Kahit na maliit na bahay ay wala kang naipundar.

Nasa diskarte lang iyan. Kapag natutunan mo ang tamang diskarte, tuluy-tuloy ang pasok ng pera sa iyo. Umattend ka ng mga business seminar, may programa ang gobyerno ngayon para riyan at nagbibigay din sila ng puhunan kung ayaw mo namang mangibang-bansa. Pag-aralan mo ang negosyong gusto mong pasukin.

May awa ang Diyos. Mata-target mo rin ang negosyong para sa iyo. Ugaliin mong magdasal, humingi ng tulong sa Diyos. Magtulungan kayo ng misis mo, dahil ang mag-asawang nagtutulungan, pinagpapala habambuhay. Huwag ka mawalan ng pag-asa. Habang may buhay, may pag-asa. Maaabot mo rin ang mga pangarap mo basta haluan mo lang ito ng sikap at tiyaga.

Sumasaiyo,

Sister Isabel del Mundo

Huli na nang malaman… Bebot, nagpakasal sa lalaking pamilyado

ni Sister Isabel del Mundo - @Mga kuwento ng buhay at pag-ibig | Ika-1 Araw ng Abril, 2024

Dear Sister Isabel,

Ang problema ko ay ang aking asawa. Kakakasal lang namin, ngunit huli na bago ko matuklasan na may unang babae na pala siyang pinakasalan at may 2 anak na sila.

Ayaw niyang aminin sa akin, ngunit natunton kami ng first wife niya at pinakita sa akin ‘yung marriage contract nila. Hindi ko na alam ang gagawin ko. Naguguluhan na ako. Ano ba ang dapat kong gawin? Hihintayin ko ang payo n’yo.

Nagpapasalamat,

Vilma ng Cavite

Sa iyo, Vilma,

Hindi legal ang kasal n’yo dahil may nauna na pala siyang pinakasalan. Nasa sa iyo ‘yan kung papayag ka na dalawa kayo sa buhay ng asawa mo. Kung ayaw mo naman na maging kabit, hiwalayan mo siya. Pero, kung sadyang mahal mo siya, nasa sa iyo ‘yan.

Ikaw ang nakakaalam kung ano ang makakagaan sa kalooban mo. Malaya kang magpasya. Hangad ko na gabayan ka ng hoĺy spirit sa pagpapasya mo.

Sumasaiyo,

Sister Isabel del Mundo