Asar sa BFF dahil ginawang utusan, super-bossy at pasikat sa socmed

ni Sister Isabel del Mundo - @Mga kuwento ng buhay at pag-ibig | July 05, 2021

Dear Sister Isabel,

Masasabi kong isa ako sa masuwerte sa buhay. Nakakapag-abroad ako nang walang gastos dahil may mga kaibigan ako na magaan ang loob sa akin. Nililibre nila ako kapag sila ay namamasyal sa abroad. Isa sa kania si Lourdes, nasa America siya pero may boyfriend sa Singapore at balak na nilang magpakasal. Ako ang kaisa-isa niyang magiging abay kaya pumunta kami roon at siya ang gumastos. Nag-stay kami sa isang hotel habang hindi pa naaayos ang lahat ng kakailanganin sa kasal. Ayos naman ang naging kalagayan namin doon, ipinakilala niya ako sa mga kaibigan niya na may matataas na katungkulan sa Singapore. Pero napansin ko na gusto niya ay sunod-sunuran ako sa kanya, siguro dahil siya ang gumastos. Sumunod na lang ako nang sumunod sa anumang gusto niya kahit labag sa kalooban ko, pero hindi natuloy ang kasal dahil nagkasakit ang father nu’ng boyfriend niya at ipinagpaliban nila ang pagpapakasal. Pinabalik muna siya ng boyfriend niya sa America at ako naman ay bumalik sa Pilipinas.

Mula noon ay palagi niya akong ginagambala, maya’t maya ay tumatawag kahit alanganing oras. Kapag hindi sinagot ay masama ang loob niya at pati FB friends na hindi niya na kasundo at friends ko rin naman ay gusto niyang i-block ko rin. Inuutusan din niya akong mag-post sa FB ng pabor sa kanya at masisiyahan ang babasa. Dinidiktahan niya ako sa lahat ng dapat kong gawin at ‘pag ‘di ko sinunod ay magtatampo siya. Naiinis ako dahil labag sa kalooban ko na sundin ang pinagagawa niya, pero dahil naalala ko na may utang na loob ako sa kanya, napipilitan akong sundin siya. Hanggang isang araw, may pinagagawa na naman siya na hindi naman totoo para lang maging sikat siya sa FB friends niya.

Sa inis ko, hindi ko siya sinunod dahil pati ako ay matututong magsinungaling at madadagdagan ang kasalanan. Nagalit siya at sinita ako sa videocall namin at sa buwisit ko ay binlock ko siya. Wala na kaming contact at balak niyang ilibre ako ulit pagbalik sa Singapore kung matutuloy ang kasal niya. Paminsan-minsan ay nakokonsensiya rin ako dahil mahaba ang pinagsamahan namin bilang magkaibigan at wala siyang hingahan ng mga problema kundi ako lang.

Mag-isa siyang namumuhay sa America. May mga anak siya pero may kani-kanya na ring pamilya. Ano ang dapat kong gawin, i-unblock ko na ba siya at muling makipagkasundo sa kanya?

Nagpapasalamat,

Dorothy ng Quezon City

Sa iyo, Dorothy,

Tama ang ginawa mo, dapat lang na i-block mo siya dahil mali ang ginagawa niya sa iyo. Hindi ka dapat maging sunud-sunuran sa kanya dahil lang nilibre ka niya sa lahat ng gastos nang kayo ay mag-abroad. Dapat niyang maunawaan na hindi lahat ng bagay ay kayang bilhin ng pera. May sarili kang pagpapasya at dignidad. Hindi ka pulubi na humingi ng limos sa kanya o hinango niya sa hirap para bigyan ng magandang buhay. Hindi ganu’n ang sitwasyon n’yo at wala kang utang na loob na dapat tanawin sa kanya para sumunod sa bawat sasabihin niya. Kung tutuusin, siya pa ang may utang na loob sa iyo dahil pumayag kang makasama sa Singapore para maging abay niya kahit hindi naman natuloy ang kasal. Huwag kang makonsensiya sa pag-block sa kanya dahil tinuruan mo lang siya ng leksiyon na hindi porke mayaman siya ay hahawakan na niya sa leeg ang isang tao at gagawing sunud-sunuran. Sa nangyari sa inyong dalawa, maiisip niya sa kanyang pag-iisa na hindi lahat ay kayang bilhin ng pera. Ipanatag mo ang iyong kalooban ngayon at ipagdasal mo na lang na huwag siyang magtanim ng galit o sama ng loob sa iyo. Mauunawaan niya kung bakit mo nagawang i-block siya.

Nawa’y magsilbing paalala rin sa iyo na piliin mo lamang ang kaibigan. Makiramdam kang mabuti kung sino lang ang may magandang kalooban. Hindi dahil mayaman, ‘yun na ang iyong pipiliin. Hanggang dito na lang. Sumaiyo nawa ang pagpapala ng Maykapal.

Sumasaiyo,

Sister Isabel del Mundo

Gustong mabawi ang anak sa bagets na kabit

ni Sister Isabel del Mundo - @Mga kuwento ng buhay at pag-ibig | June 24, 2021

Dear Sister Isabel,

Ako ay manager ng isang Korean Firm at ipinadadala ako sa iba’t ibang lugar upang i-promote ang aming produkto kung saan nag-i-stay ako sa lugar na ‘yun more or less than 3 months. Dahil d’yan, nagawa kong kaliwain ang asawa ko. Nakipagrelasyon ako sa isang babae na halos kalahati ang agwat ng edad sa akin at naanakan ko siya. Noong una ay naawa lang ako sa kanya dahil pagala-gala sa daan at bitbit ang dalawa pa niyang anak. Hiwalay siya sa una niyang asawa.

Maganda at bata pa siya kaya sa awa ko ay tinulungan ko siyang makatapos ng pag-aaral. Ibinahay ko siya at binigyan ng maayos na buhay. Nagmahalan kami kahit minsan ay halos ibig ko na siyang iwan dahil sa pagiging isip-bata niya. Tumagal ang relasyon namin hanggang noong third year high school siya at napansin ko na parang nawawala siya sa kanyang sarili. Kinausap ko ang mga magulang niya na kupkupin muli ang anak nila at ako na ang bahala sa gastos. Pumayag naman ang magulang niya.

Habang nanatili ako sa aking pamilya, nagulat na ako nang sinundan niya ako rito sa probinsiya namin. Hindi ko na nailihim sa asawa ko ang lahat at nagalit siya. Pinalayas niya ako hanggang tuluyan na kaming magkahiwalay. Nagsama kaming muli ng kabit ko. Natuwa ako dahil kamukha ko ang anak namin, pero napansin ko na sinasaktan ng asawa ko ang bata tuwing maiinis siya sa akin. Kinuha ko ang bata upang iligtas sa pananakit ng ina niya at pinatira ko sa tiyahin ko. Nag-away kami nang todo at kahit isinangguni ko sa barangay ang problema namin, pinaboran ng barangay ang nanay ng bata. Muli silang pinabalik sa probinsiya nila at tuluyan nang inilayo sa akin ang bata. Nag-aalala ako sa anak namin dahil baka saktan na naman ng nanay niya tuwing maiinis. Ano ang dapat kong gawin? Nawa’y mabigyan n’yo ako ng kaukulang payo na magpapalubag sa loob ko.

Nagpapasalamat,

Jetro ng Batangas

Sa iyo, Jetro,

Lubhang masalimuot ang problema mo, gayunman, payapain mo ang iyong loob at tumawag sa Diyos. Tanggapin mo nang maluwag sa iyong kalooban ang nangyayari ngayon sa buhay mo. Hayaan mo na ang anak mo sa sarili niyang ina. Mamumulat din siya sa katotohanan na hindi niya dapat ibunton sa bata ang galit niya sa iyo. Makabubuting kausapin mo ang magulang ng kabit mo at sabihing kumonsulta sa mga eksperto upang maagapan at mailagay sa tama ang kanyang isipan, gayundin upang hindi na niya saktan ang anak n’yo.

Gayunman, ipagpatuloy mo ang pagpapadala ng sustento sa kanya at palaging kumustahin. Sa kabilang dako, humingi ka ng tawad sa asawa mo at magbagong buhay kayong muli. Natitiyak kong mapapatawad ka niya at bibigyan ng isa pang pagkakataon.

Ipagpatuloy mo ang taimtim na panalangin sa Diyos Amang makapangyarihan sa lahat na tulungan ka muling isaayos ang iyong buhay at mangakong hindi na muling matutuksong pumatol sa ibang babae upang hindi na maulit pa ang mabigat na problemang kinakaharap mo ngayon. Ang Diyos ay makatarungan. Kung nawalay man ang iyong anak, sa takdang panahon ay magkikita kayong muli at mauunawaan niya ang mga pangyayari.

Ang buhay ay sadyang ganyan, kani-kanyang problema ngunit alalahanin na may solusyon sa bawat suliranin. Magpakatatag ka at huwag mawalan ng pag-asa. Hanggang dito na lang, hangad ko ang kapayapaan ng iyong isipan. Ang pagpapala ng Dakilang Lumikha ay sumaiyo nawa.

Matapat na sumasaiyo,

Sister Isabel del Mundo

Pamilya at mga kaibigan, tutol sa pagpapakasal ng 67-anyos na biyuda

ni Sister Isabel del Mundo - @Mga kuwento ng buhay at pag-ibig | June 17, 2021

Dear Sister Isabel,

Sa edad na 67, ako ay biyuda na pero sa totoo lang, mukha akong bata pa at marami pang na-a-attract sa akin na mas bata at halos ka-edad lang ng anak ko. Ang problema ay nararamdaman ko na umiibig na naman ako at halos kalahati ng edad ko ang lalaking iniibig ko. Gayunman, kapwa kami nagmamahalan at balak na niya akong pakasalan. Pero tutol ang mga anak ko at halos lahat ng mga kaibigan at kamag-anak ko ay ganundin at hindi sang-ayon na mag-asawa pa akong muli.

Isa pa, nagbanta ang mga anak ko na tuluyan na nila kong itatakwil bilang ina kapag nagpakasal ako sa lalaking napupusuan ko dahil masyadong bata at halos anak ko na. Nakakahiya raw sa aming mga kaanak at hindi sila naniniwala na mahal talaga ako ng lalaking ‘yun. Sinasabi nilang luluha lang ako at siguradong hindi magtatagal ay papalitan ako ng mas bata, sexy at mahusay sa kama. Bakit kaya ganu’n na lang kung manghusga ang mga tao?

Ano ang dapat kong gawin? Nakatakda na ang kasal namin, pero magulong-magulo ang isip ko at hindi malaman ang gagawin. Sana ay mabigyan n’yo ako ng nararapat na payo para sa kalutasan ng problema kong ito.

Gumagalang,

Donita ng Pasig

Sa iyo, Donita,

Nasa hustong edad ka na para magpasya sa sarili mo, kaya kung ano makapagpapasaya sa iyo, gawin mo. Huwag mong intindihin ang mga nakapaligid sa iyo na hindi nakauunawa sa iyong nararamdaman. Kailanman ay hindi nila maibibigay ang kaligayahan ng dalawang pusong nagmamahalan at wala silang karapatan na hadlangan ka sa nalalapit mong pag-aasawa. Maging ang mga anak mo ay walang karapatan kung ano ang gusto mong gawin sa kasalukuyan.

Nagampanan mo na ang iyong tungkulin bilang ina sa kanila at maayos mo silang napalaki. Nagsumikap ka para mabigyan sila ng magandang kinabukasan, kaya panahon na para hanapin mo naman ang sarili mong kaligayahan. Sundin mo tinitibok ng puso mo at pakasalan ang lalaking nagmamahal sa iyo at maghahatid sa iyo sa altar nang walang pasubali.

Gayundin, huwag mong pansinin ang sasabihin ng mga tumututol sa pag-iibigan n’yo. Humayo ka at harapin ang masagana, mapayapa at maligayang buhay sa piling ng lalaking pakakasalan mo. Natitiyak ko na sa pagdaan ng mga araw ay maliliwanagan din ang isip ng mga anak mo at ng iba pang tao na tumututol sa muli mong pag-aasawa. Ipanatag mo ang iyong isipan at magpasalamat sa Diyos dahil sa kabila ng edad mo ay mayroon pang lalaking inilaan sa iyo ang tadhana na handang pakasalan ka at samahan sa hirap at ginhawa.

Sumasaiyo,

Sister Isabel del Mundo