Todo-tago at layo… Bebot, ‘di gustong makasira ng pamilya at maging kabit

ni Sis. Isabel del Mundo @Mga Kuwento ng Buhay at Pag-ibig | June 16, 2024

Dear Sister Isabel,

Gusto kong ibahagi sa inyo ang kuwento ng buhay ko, at hihingi na rin ako ng payo tungkol sa love life ko. 

Ex-OFW ako, pero ngayon for good na ko rito sa Pilipinas.

Nagkaroon ako ng karelasyon sa abroad, at nagkaanak kami. Akala ko single siya kaya pinatulan ko, pero may asawa na pala at may dalawang anak. 

Buntis na ako nang malaman ko ‘yung totoo. Kaya mula noon, umiwas at nagtago ako sa kanya hanggang sa maisilang ko ang anak namin. 

Ayokong makasira ng pamilya at maging isang kabit, kaya ako na mismo ang lumayo. 

Hindi nagtagal, isinilang ko na rin ang anak namin. Hindi siya tumigil kakahanap sa akin at halos masiraan na ng bait hanggang sa natunton niya ang kinaroroonan namin. 

Naawa ako sa kanya, ang laki ng pinayat niya at para bang may sakit. Nagmakaawa siya sa akin upang tanggapin ko siya sa buhay ko. Magsama na umano kami kasama ang anak namin. Nangako siya sa akin na magiging mabuting ama at responsableng asawa siya. 

Isa pa, wala umanong problema ‘yun sa una niyang kinasama, dahil pumayag na raw ito na dalawa kaming babae sa buhay niya. Tanggap daw ng asawa niya ang sitwasyon, at hindi raw kami guguluhin nito. 

Inamin niya rin sa akin na hindi siya kasal at handa niya umano akong pakasalan. 

Sa totoo lang, mahal ko rin naman siya at ayokong lumaki ang anak ko na walang kinikilalang ama. 

Ano ba ang dapat kong gawin? Dapat ba akong pumayag sa gusto niya na magsama kami sa iisang bubong bilang mag-asawa tutal hindi naman tumututol ang babaeng una niyang kinasama?

Sister Isabel, puwede rin kaya kaming magpakasal? Hihintayin ko ang payo n’yo.

Nagpapasalamat, 

Marita ng Tacloban

---

Sa iyo, Marita,

Sa biglang tingin, maling tanggapin mo ang lalaking nakabuntis sa iyo dahil may asawa na pala siya, pero kung payag naman ang una niyang kinasama, at nangakong hindi kayo guguluhin, sa palagay ko ay puwede ka nang pumayag sa gustong mangyari ng ama ng iyong anak, kaysa lumaking walang ama ang anak n’yo.

Kung kasal naman ang pag-uusapan, tutal puwede ka pala niyang pakasalan dahil hindi siya kasal sa una niyang kinasama at handa naman siyang gawin ito. 

Ang mahalaga nagmamahalan kayo, at with consent ng kinakasama niya. Nasa iyo ang desisyon, kung ano ang maluwag sa loob mo, ‘yun ang gawin mo.

Sumasaiyo,

Sister Isabel del Mundo

Bebot, ‘di matanggap na may taning na ang buhay

ni Sis. Isabel del Mundo @Mga Kuwento ng Buhay at Pag-ibig | June 16, 2024

Dear Sister Isabel,

Gusto ko sanang humingi ng payo tungkol sa nalalabi ko pang panahon dito sa mundong ibabaw. 

May cervical cancer ako. Ang sabi ng doktor, isang buwan na lang ang itatagal ko. Dumaan na ako sa kung anu-ano’ng proseso para gumaling ang sakit ko, pero lalo lang akong nanghina. Ayoko pang mamatay, Sister Isabel. Pero, tanggap na ng magulang at mga kapatid ko na papanaw din ako, at binibigay na nila lahat ng bagay na makakapagpasaya sa akin, ngunit hindi ko pa rin ito matanggap. 

Ano ba ang dapat kong gawin upang buong tapang kong harapin ang katotohanan na hindi na ako magtatagal dito? At paano ko po ito matatanggap? 

Nawa’y mapalubag n’yo ang kalooban ko. Hihintayin ko ang sagot n’yo sa lalong madaling panahon.

Nagpapasalamat,

Mathew ng Tarlac

---

Sa iyo, Mathew,

Ganu’n talaga, may hangganan lahat dito sa mundo. Walang permanente rito, dahil nakikitira lang tayo rito sa daigdig na ito. 

Kaya habang nandito ka pa, gumawa ka ng mga bagay na kalugud-lugod sa Diyos upang sa langit ka mapunta. Tanggapin mo na kung tinaningan ka na ng doktor, pagsisihan mo lahat ng nagawa mong kasalanan, at humingi ka ng tawad sa mga taong nagawan mo ng kamalian. 

Sa langit, wala kang gutom, uhaw, at lungkot na madarama, dahil doon ay puro kaligayahan. Lahat ‘yan ay mararanasan mo sa kabilang buhay kung namumuhay ka ng naaayon sa kalooban ng Diyos. 

Una-unahan lang ang buhay sa mundo. Lahat ng tao ay papanaw sa takdang panahon.

Harapin mo ito ng buong katatagan, magpasalamat ka rin sa Diyos, dahil ‘yung iba ay namamatay nang biglaan, at hindi man lang nakakahingi ng tawad sa mga taong nagawan nila ng kasamaan. Dahil doon, tiyak na sa purgatoryo o impiyerno ang kanilang hantungan. 

Pinapaalala ko rin sa iyo, physical body mo lang ang mamamatay, dahil buhay na buhay pa rin ang iyong kaluluwa na nakatunghay sa mga mahal mo sa buhay na maiiwanan mo. Puwedeng-puwede ka nilang maging anghel. Ganyan ang magiging role mo kung ikaw man ay pumanaw na sa mundo.

Sumasaiyo,

Sister Isabel del Mundo

Iniputan sa ulo ang mga asawa… OFW na nakabuntis, gustong ipalaglag ang beybi

ni Sis. Isabel del Mundo @Mga Kuwento ng Buhay at Pag-ibig | June 13, 2024

Dear Sister Isabel,

Limang taon na akong Overseas Filipino Worker (OFW) dito sa Hong Kong, at 3 taon na rin ang nakakalipas mula nang magbakasyon ako sa ‘Pinas. 

Ang problema ko ngayon ay nakabuntis ako ng ibang babae rito sa Hong Kong. Pareho kaming pamilyado, at hindi alam ng mga asawa namin ang lihim naming relasyon. 

Aware naman ako na walang lihim na hindi nabubunyag, kaya sinabihan ko ang babaeng nadale ko na ipalaglag na lang niya ang batang nasa sinapupunan niya, pero ang problema ay ayaw niyang pumayag. 

Tiyak na magdaramdam ang asawa ko kapag nalaman niya ang ganitong sitwasyon.

Baka ‘di niya kayanin at mag-suicide.

Ang isa ko pang pinoproblema ay ‘yung mister ng babaeng nadali ko, baka ipa-salvage niya ako. 

Gulung-gulo na ang isip ko. Ano ba ang dapat kong gawin?

Nagpapasalamat,

Dondon ng Hong Kong

---

Sa iyo, Dondon,

Makabubuting huwag n’yo munang ipaalam sa mga asawa n’yo ang nangyari. Ilihim n’yo muna ito sa abot ng inyong makakaya. Umiba kayo ng tirahan d’yan sa Hong Kong upang makaiwas sa tsismis. Pero, huwag na huwag n’yong ipapalaglag ang bata, kasalanang mortal iyan sa mata ng Diyos, ang batang iyan ay anak ng Diyos. Bawat batang nabubuo sa sinapupunan ng isang ina ay Children of God. May plano ang Diyos sa batang iyan. Kayo ang napili niyang magulang, dugo mo at dugo ng nabuntis mo ang gusto ng Diyos na manalaytay sa bata. 

Sa tamang panahon, saka n’yo sabihin sa asawa n’yo ang nangyari. Kapwa kayo manalangin at humingi ng tulong sa Diyos na sana gabayan kayo sa tamang desisyon. 

Samantala, alalayan mo muna ang babaeng nabuntis mo para maipanganak niya nang maayos ang batang kanyang isisilang.

Malalampasan n’yo rin ang pagsubok na iyan. Bawat tao ay may pagsubok pero kung mananatili kayong nakakapit sa Diyos, malalampasan n’yo rin ang matinding pagsubok na kasalukuyan n’yong nararanasan. 

Sana hindi na ito maulit o masundan pa. Tandaan mo, kapwa kayo may asawa kaya umayos ka. Sustentuhan mo ang bata, at putulin n’yo na ang relasyon n’yo. 

Bumalik ka sa pamilya mo at umiwas ka na sa mga babae. Mamuhay ka sa tamang landas kasama ang tunay mong pamilya at gampanan ang role mo bilang ulirang asawa at ama. Maunawaan mo sana at sundin ang payo ko.

Sumasaiyo,

Sister Isabel del Mundo