Manliligaw na poor, mas bet kesa sa guy na mayaman pero gusto ng parents

ni Sister Isabel del Mundo - @Mga kuwento ng buhay at pag-ibig | September 27, 2021

Dear Sister Isabel,

Ang isasangguni ko sa inyo ay tungkol sa dalawa kong manliligaw. Ang isa ay guwapo, mayaman, matalino at halos lahat ng magandang katangian ay nasa kanya na. Siya ang gusto ng mga magulang ko na mapangasawa ko, pero ang tinitibok ng puso ko ay ‘yung manliligaw ko na mahirap, pero masaya ako ‘pag magkasama kami. Mabait siya, mahinahon, hindi marunong magalit at may sense of humor. Isa pa, walang puwang ang kalungkutan kapag magkasama kami.

Kaya lang, ayaw sa kanya ng parents ko dahil mahirap ang pamilya niya. Nasa hustong edad na ako kaya ang sabi ng parents ko ay dapat na akong mag-asawa at ang gusto nila para sa akin ay ‘yung mayaman kong manliligaw. Maging praktikal daw ako, lalo na sa panahon ngayon at hindi raw sila magiging masaya kung ang pipiliin ko ay ‘yung mahirap lang ang kalagayan sa buhay. Labis daw silang malulungkot at malamang ay magkasakit pa sa sobrang pagdaramdam. Naguguluhan ako kung sino ang dapat kong piliin dahil may katwiran din naman ang mga magulang ko. Aanhin nga naman ang pag-ibig kung kumakalam naman ang sikmura mo at halos hindi matugunan ang pang-araw-araw ninyong pangangailangan sa buhay?

Sister, ano ang dapat kong gawin, sundin ang mga magulang ko o ang tinitibok ng puso ko?

Nagpapasalamat,

Daisy ng Mabalacat, Pampanga

Sa iyo, Daisy,

Sundin mo ang tinitibok ng puso mo. Kung kanino ka liligaya, siya ang piliin mo. Ang pag-ibig ay mahiwaga at makapangyarihan. Kung pareho kayong nagmamahalan, aayon sa inyo ang tadhana dahil pagpapalain kayo at sasagana. Ganyan ang magiging kapalaran mo kung magiging totoo ka sa sarili mo.

Kung ang pipiliin mo ang ‘yung mayaman pero wala ka namang pagmamahal, hindi kayo magiging maligaya. Sa palagay ko ay mauunawaan naman ng mga magulang mo ang magiging pasya mo at makikita nila na kapag ang dalawang tao ay tapat at wagas na nagmamahalan, kasunod na niyan ang mga pagpapala at biyaya na siksik, liglig at umaapaw, ‘ika nga. Hangad ko ang katuparan ng iyong mga pangarap sa piling ng lalaking tinitibok ng puso mo.

Sumainyo nawa ang walang hanggang pagpapala at mga biyaya ng Dakilang Lumikha.

Sumasaiyo,

Sister Isabel del Mundo

Buking na may karelasyong beki ang machong asawa, gusto nang hiwalayan

ni Sister Isabel del Mundo - @Mga kuwento ng buhay at pag-ibig | September 22, 2021

Dear Sister Isabel,

Nawa’y nasa maayos kayong kalagayan, gayundin ang inyong pamilya. Ang problema ko ay tungkol sa aking asawa. Lalaking-lalaki siya, macho, romantiko at responsableng asawa at ama, subalit kamakailan ay natuklasan ko na may karelasyon siyang bakla at bisexual pala ang asawa ko. Kaya pala parang matabang na ang pagtingin niya sa akin at hindi na kagaya ng dati. Hindi ko na rin madama ang init ng kanyang pagmamahal.

Isa pa, hindi niya alam na alam ko na ang tunay niyang pagkatao, pati na ang tungkol sa kanila nu’ng karelasyon niya. Nabawasan na rin ang pagmamahal ko sa kanya at asiwa na ako sa pagsasama namin, lalo na ‘pag magkatabi kami sa kama. Wala na talagang spark ang relasyon namin, kaya gusto ko na siyang hiwalayan at sabihin sa kanya ang lahat ng natuklasan ko.

May isa kaming anak at ‘yun na rin ang inaalala ko. Baka hindi maintindihan ng anak ko kung bakit balak kong makipaghiwalay sa daddy niya. Sister, anim na taon pa lang ang anak namin, tama ba ang iniisip ko na hiwalayan na ang mister ko? Ano sa palagay ninyo ang dapat kong gawin?

Nagpapasalamat,

Elvira ng Lucena City

Sa iyo, Elvira,

Kung inaakala mong hindi ka na maligaya sa piling ng asawa mo at wala na rin ang init ng pagmamahalan ninyo, marapat lamang na hiwalayan mo siya at bigyan mo ng kalayaan ang sarili mo at pati na rin siya. Hindi maganda sa mag-asawa ang may gap sa kanilang pagsasama.

Sabihin mo ang natuklasan mo, sa palagay ko ay mauunawaan niya kung bakit gusto mo na siyang hiwalayan. Luluwag na rin ang kalooban niya dahil ang bagay na hindi niya masabi sa iyo at isinikreto niya nang mahabang panahon ay alam mo na ngayon. Tatanggapin niya nang maluwag sa kanyang kalooban ang pasya mo. Tungkol naman sa anak ninyo, sa pagdaan ng panahon ay mauunawaan niya ang lahat. Tutal bata pa naman siya sa kasalukuyan, hindi pa niya gaanong mamamalayan ang nangyayari sa inyong mag-asawa, kaya ano pa ang hinihintay mo?

Kausapin mo na ngayon din ang asawa mo at sabihin mo na hindi mo naman ipagkakait ang bata sa kanya dahil malaya pa rin niyang mabibisita at maipapasyal ang anak ninyo, basta ang mahalaga, pareho kayong nakawala sa nagpapabigat sa inyong kalooban.

Hangad ko ang kaligayahan ng bawat isa sa inyo sa buhay na kakaharapin ninyo sa piling ng inyong magiging kaagapay pagkatapos ninyong maghiwalay. Masakit din sa kalooban, subalit lilipas din ‘yan sa pagdaan ng panahon. ‘Ika nga, nabubura ng panahon ang alaala ng kahapon. Muling uusbong ang halamang nalagasan ng dahon.

Sumasaiyo,

Sister Isabel del Mundo

Nabuntis ng kapwa OFW na may asawa at ‘di na masustentuhan

ni Sister Isabel del Mundo - @Mga kuwento ng buhay at pag-ibig | September 13, 2021

Dear Sister Isabel,

Ako ay dating OFW at nagtrabaho bilang bartender sa cruise ship. Maganda at okay ang suweldo at may tip pa sa mga customer. Nag-umpisa ang problema nang mapansin ko na may kakaibang tingin sa akin ang kasamahan ko na bagama’t alam niyang hindi ko siya type ay patuloy siyang nagpaparamdam sa pamamagitan ng malagkit na tingin. Hindi ko siya pinapansin hanggang sa dumating sa sukdulan ang lahat. Pinasok niya ako sa aking accommodation at hindi ko nagawang ipagtanggol ang sarili ko dahil dinaan niya ako sa dahas.

Sinamantala niya ako at wala akong nagawa sa lakas niya kaya nagtagumpay siya sa masama niyang balak. Hindi ko siya maisumbong sa boss namin dahil tiyak na matatanggal ako sa trabaho at pauuwiin sa Pilipinas. Nanahimik na lang ako at nagpalipat ng barko para maiwasan siya. Sa awa ng Diyos, nakalipat naman ako at pinilit kong limutin ang nangyari sa akin. Nilibang ko ang aking sarili sa ibang bagay na makapagpapasaya sa akin. Okay na sana ako at unti-unti na akong nakaka-move on hanggang dumating ang mga araw na hindi na ako dinatnan ng aking buwanang dalaw at ‘yun pala, buntis na ako.

Hindi ko malaman ang gagawin hanggang may nagpayo sa akin na ipaalam ang kalagayan ko sa lalaking nanamantala sa akin upang panagutan ang ginawa niya. Kahit labag sa kalooban ko, kinontak ko siya, hindi naman siya umiwas at nangakong pananagutan ang dinadala ko.

Napagkasunduan naming mag-resign na lang ako at umuwi para rito isilang ang bata. Umuwi ako sa aking mga magulang at sinabing uuwi sa susunod na buwan ang ama ng magiging anak ko. Kampante naman kami hanggang dumating ang nasabing buwan pero hindi siya dumating hanggang isinilang ko na ang bata.

Hindi na namin siya makontak at gustuhin mang magalit ng mga magulang ko ay hindi na nila nagawa nang makita ang kanilang apo. Lumipat din kami ng tirahan upang makaiwas sa tsismis. Hanggang isang araw, tumawag ang ama ng aking anak at sinabing may asawa na pala siya sa Pilipinas, kaya hindi niya puwedeng panagutan ang bata pero nangako siyang magsusustento.

Buti na lang, maunawain ang mga magulang ko at patuloy nila kaming sinusuportahan.

Bagama’t nagpapadala ng pinansiyal na suporta ang nakabuntis sa akin, bigla itong natigil at wala na kaming kontak. Nahihiya naman ako sa parents ko na iasa na lang sa kanila ang lahat.

Ano ang dapat kong gawin, puwede bang ireklamo ko siya sa pinapasukan niya para maobliga siyang sustentuhan kaming mag-ina? Gayundin, para magising siya sa katotohanan na hindi tama na basta na lang niya kami kalimutang mag-ina, lalo na’t alam niyang anak niya ang isinilang ko.

Gusto ko ring ipaalam sa tunay niyang asawa ang nangyari sa amin at sabihin na may anak siya sa akin, tama ba ang binabalak ko? Hihintayin ko ang payo ninyo.

Nagpapasalamat,

Glenda ng Cebu

Sa iyo, Glenda,

Salamat sa pagtitiwala mo na isangguni sa akin ang problema mo. Hinahangaan kita sa katatagan ng iyong kalooban dahil nakayanan mo ang napakasakit na nangyari sa iyo at hanggang ngayon ay patuloy ka pa ring nakikibaka sa pagsubok na dumating sa buhay mo.

Tatagan mo pa ang iyong kalooban, tumawag ka sa Dakilang Kataas-taasan dahil Siya ang tutulong sa iyo upang gumaan ang mga balakid mo sa buhay. Magpasalamat ka rin sa Diyos dahil may mga magulang ka na sa halip na magalit sa iyo at ipagtabuyan ka, inunawa ka nila at patuloy na sinusuportahan. Huwag mo nang ituloy ang balak mo na ipaalam sa employer niya ang lahat dahil hindi makabubuti ito. Sa halip, lalong magiging masalimuot ang mga pangyayari. Maaari ring i-terminate siya at tuluyang mawalan ng trabaho at lalo ka lamang hindi masusuportahan sa inyong pinansiyal na pangangailangan ng anak ninyo. Huwag na huwag mo na ring balakin na ipaalam pa sa tunay niyang asawa ang nangyari sa inyo. Lalong magkakagulo at madaragdagan pa ang kalbaryo mo sa buhay dahil tiyak na hindi ka patatahimikin ng tunay niyang asawa.

Ang pinakamabuti mong gawin ay unawain ang lalaking ‘yun. May pinagdadaanan siguro siyang matinding problema, lalo na ngayong may pandemya kaya natigil ang pagpapadala ng suporta. Palagi mong ipagdasal ang ama ng iyong anak na iligtas siya sa kapahamakan, liwanagin ang kanyang isipan, makayanan ang responsibilidad sa iyo at sa tunay niyang asawa. Makikita mo na isang araw ay lutas na ang problema mo at muli kang makakatanggap ng sustento mula sa kanya.

Sumasaiyo,

Sister Isabel del Mundo