Masama ang loob sa mga kapatid na nakikihati sa benepisyo ng namatay na ama

ni Sister Isabel del Mundo - @Mga kuwento ng buhay at pag-ibig |November 16, 2021

Dear Sister Isabel,

Kasalukuyan akong nasa poder ng aking biyudong ama. Hiwalay kami ng ama ng anak ko dahil may asawa pala siya at kailan ko lang nalaman dahil bigla siyang naglaho.

Nabalitaan ko na lang na bumalik siya sa tunay niyang pamilya.

Buti na lang, inunawa ng tatay ko ang sinapit ko, kinalinga niya ako at sinuportahan sa araw-araw naming gastusin ng aking anak, ngunit namatay na siya. Bagama’t sa akin ipinaubaya ang naiwan niyang pension at iba pang financial benefits, ginigipit ako ng tatlo ko pang kapatid. Hindi ko pa nake-claim ang financial assistance ng aming ama at nakaabang na sila sa iba pang benepisyo at gusto ring makinabang ‘pag nakuha ko na. Pero ayaw naman nilang gumastos para sa mga requirements kahit alam nilang wala na akong maaasahan pa.

Sister, mayroon palang ganu’ng mga kapatid. Stable naman ang buhay nila, pero nakikihati pa sa halip na maawa sa kalagayan ko bilang solo parent na mahaba pa ang bubunuin para mapalaki at mapag-aral ang aking 5-anyos kong anak.

Isa pa, ‘pag hinati ko sa aming magkakapatid ang make-claim ko sa death benefits ng aming ama, kaunti na lang ang matitira. Ano ang dapat kong gawin sa aking mga kapatid para huwag na silang makihati sa mga benepisyo ng tatay namin at para na rin maunawaan nila na dapat ay tulungan pa nila ako sa kalagayan ko?

Masama ang loob ko at hindi ko na binabati ang mga kapatid ko. Hihintayin ko ang inyong payo para gumaan ang pakiramdam ko at matanggap na sadyang ganito ang buhay at hindi lahat ng kapatid ay may mabuting kalooban.

Nagpapasalamat,

Annabel ng Malabon

Sa iyo, Annabel,

Nakikidalamhati ako sa kalagayan mo. Ang buhay sa mundo ay sadyang iba’t iba ng kadramahan sa buhay. Lahat ay may kani-kanyang sitwasyong dapat harapin at solusyunan. Ang masasabi ko sa problema mo ay magpakatatag ka, lalo ngayong yumao na ang ama mo na siyang umako sa responsibilidad simula nang iwan ka ng ama ng iyong anak.

Isa lang naman ang anak mo, sa awa at tulong ng Diyos, tiyak na makakaraos kayo ng anak mo.

Oo, kailangan mong tumawag sa Panginoon. Magdasal at humingi ka ng gabay upang makaraos ka sa buhay. Tungkol naman sa mga kapatid mo, may parte talaga sila sa make-claim mong financial benefits na naiwan ng yumao mong ama. ‘Ika nga, lahat ng bagay ay nakukuha sa mabuting usapan, kaya kausapin mo sila nang mahinahon at ipaliwanag mong mabuti ang sitwasyon mo.

Palagay ko naman ay lalambot ang puso nila kapag naipaliwanag mo na hindi madali ang mga bagay-bagay na dapat isaayos at hindi ganu’ng kalaki ang makukuha gaya ng iniisip nila.

Natitiyak kong kapag naipaliwanag mo na sa kanila ang lahat, mauunawaan ka rin nila.

Blood is thicker than water, ‘ika nga, kaya mananaig ang pagiging magkakapatid ninyo.

Lahat ay magkakaroon ng kalutasan. Mapapanatag ka na at mawawala na ang sama ng loob na kinikimkim mo. Natitiyak ko ‘yan kung kakausapin mo sila nang may mababang kalooban at may kahinahunan. Iwasan mo ang galit at poot at tutulungan ka ng Diyos.

Sumasaiyo,

Sister Isabel Del Mundo

Seaman na imbiyerna sa misis na bungangera, nainlab ulit sa hayskul sweetheart

ni Sister Isabel del Mundo - @Mga kuwento ng buhay at pag-ibig | October 04, 2021

Dear Sister Isabel,

Dalangin ko sa Poong Maykapal na maging ligtas kayong lahat sa kapahamakan at negatibong puwersa ng kalikasan. Kasasakay ko lang ulit sa barko, at ako ay may asawa at dalawang anak. Okay naman ang buhay namin kahit minsan ay may problema dahil nalulutas naman ito agad. Mabait ang asawa ko, pero kamakailan ay parang nag-iba na siya. Mainitin ang ulo niya at palaging nakasigaw sa mga anak namin. Naririndi na ako sa lakas ng boses niya at nagagalit siya ‘pag pinagsasabihan ko. Ang isa pang ipinagtataka ko, wala siyang naiipon kahit walong taon na akong seaman. Malaki naman ang perang ipinadadala ko, pero wala siyang naitabi kahit magkano. Ayaw ko namang awayin siya dahil baka mauwi sa paghihiwalay ang pagsasama namin.

Hanggang ngayon, wala kaming naipupundar na bahay at nangungupahan pa rin kami. Sa inis ko, natukso akong pumatol sa aking high school classmate na dalaga pa. Naging girlfriend ko siya noong high school at nang nag-reunion kami bago ang pandemya ay nagkabiruan kami at muling nanariwa ang pagtitinginan namin.

Alam niyang may pamilya na ako pero okay lang daw sa kanya, kaya natukso akong pumatol ulit sa kanya. Walang kamalay-malay ang asawa ko na tuloy ang komunikasyon namin ng nasabing babae. Nahuhulog na ang loob ko sa kanya habang tumatabang na ang pagtingin ko sa aking asawa. Hindi kasi siya marunong humawak ng pera at tulad ng nasabi ko, madalas siyang nakasigaw at magalit nang walang dahilan.

Sa pakiramdam ko ay mas mahal ko ngayon ang ex ko, ano ang dapat kong gawin pagbalik ko sa Pilipinas, ituloy ko ba ang pakikipagmabutihan sa babaeng napamahal ulit sa akin? Sa nakikita ko ay mahal na mahal niya rin ako at handang maghintay na siya ang piliin ko at handa ring dalawa sila sa puso ko. Naguguluhan ako, Sister Isabel. Sana ay mapagpayuhan ninyo ako.

Nagpapasalamat,

Elmer ng Catanduanes

Sa iyo, Elmer,

Ganyan talaga ang nangyayari sa kagaya mong seaman, ang hindi kuntento sa isa. Sabagay, may kani-kanyang katwiran at isa pa, tao lang na madaling matukso, lalo na kung babae ang magpaparamdam. Sa palagay ko ay dapat mo nang tapusin ang relasyon mo sa dati mong sweetheart. Alalahanin mo, iba na ngayon dahil pamilyado ka na at sabi mo ay mabait naman ang asawa mo. Mahirap din naman ang naging role niya kapag sumasakay ka sa barko at iniiwanan mo sa kanya ang lahat ng problema sa mga anak ninyo. Talagang magastos ang buhay ‘pag may anak, lalo pa’t nag-aaral na ang mga ito dahil napakaraming projects sa school na dapat bilhin. Marami ring program na sa palagay ko ay kasali ang mga anak mo. Bukod pa r’yan ‘yung paminsan-minsan na magkakasakit sila at dadalhin sa doktor. Magastos magkasakit at kinaya lahat ‘yan ng asawa mo nang walang katuwang. Kung umuwi ka bago ang pandemya at napansin mong nag-iba siya, natural lang ‘yan dahil sa sitwasyon.

Marapat lamang na pagpasensiyahan mo siya at hindi katwiran ‘yun para magkaroon ka ulit ng bagong karelasyon. Masyadong mababaw ito kumpara sa pagtitiis ng misis mo, kaya ang maipapayo ko ay putulin mo na ang relasyon ninyo ng iyong dating karelasyon.

Samantalahin mo hangga’t nand’yan ka sa barko, tuluyan mo nang tapusin ang relasyon n’yo at iukol ang sarili at panahon sa kung paano kayo magkakaroon ng sariling bahay kaysa gugulin mo ang iyong pera sa pangalawang babae sa buhay mo dahil maling-mali ‘yan.

Pasasaan ba’t mawawala rin ang pagmamahal ng dati mong sweetheart ‘pag tumigil ka na sa pakikipag-communicate sa kanya. Magigising siya sa katotohanan na may asawa at anak ka, at kabit lang ang magiging role niya. Hanggang dito na lang, sana ay naliwanagan ang isip mo sa ipinayo ko sa iyo.

Sumasaiyo,

Sister Isabel del Mundo

Single mom na feeling malas sa buhay, gusto nang mag-suicide

ni Sister Isabel del Mundo - @Mga kuwento ng buhay at pag-ibig | September 29, 2021

Dear Sister Isabel,

Bakit puro kalungkutan na lang ang buhay ko? Wala na yatang kaligayahang nakalaan sa akin dahil simula nang isinilang ako, puro kalungkutan na ang aking naranasan. Lahat na yata ng kasawian, kalungkutan at pagdurusa ay dinanas ko na. Nawalan ako ng asawa habang maliliit pa ang mga anak ko. Limang taon lang ang panganay ko, 4-anyos ang ikalawa at ang bunso ay isang taon lang. Ginampanan ko ang papel ng ama at ina kahit napakahirap.

Napakasakit sa kalooban na mawalay sa mga anak ko pero wala akong magagawa dahil ito ang kapalaran ko. Nagsumikap ako pero nabigo at napakaraming pagsubok na halos hindi ko na kaya. Naiisip ko na minsang magpakamatay para matapos na ang lahat ng dinaranas kong pagdurusa. Mabuti pa sa kabilang buhay, walang gutom at uhaw. Gayundin, payapa, panatag, walang heart ache o head ache, lahat ay masarap sa pakiramdam. Kailan ba ako liligaya?

Umibig akong muli pero mas malala ang nangyari dahil mas grabeng sakit ang idinulot nito sa puso ko. Bakit kaya ganito? Sana ay mapalubag ninyo ang kalooban ko. Hindi ko na talaga kaya.

Nagpapasalamat,

Dolores ng Pasay City

Sa iyo, Dolores,

Sobrang lungkot naman ng kuwento mo at parang heavy drama. Alam mo, marahil ay lumaki ka sa pamilya na hindi marunong tumawag sa Diyos. ‘Ika nga, prayer is the key. Dasal ang susi para mapagtagumpayan natin ang mga dalamhati sa mundo. Ang taong madasalin, hindi kailanman pababayaan ng Diyos. Buhos-buhos ang biyaya at mga pagpapala, at kung siya man ay may pagsubok na mararanasan, dagling tatanggalin ng Diyos ‘yan kapag siya’y nagdasal nang taimtim at walang halong alinlangan. Subukan mo ito ngayon, tumigil ka sandali sa ginagawa mo, pumikit ka, damhin mo ang presensiya ng Diyos Ama sa langit. Kausapin mo Siya at humingi ng tawad sa mga kasalanang nagawa mo rito sa lupa. Makikita mo na gagaan ang pakiramdam mo at sa mga susunod na araw, isa-isang malulutas ang problema mo sa buhay kasama na ang mga dinaranas mong kapighatian. Maliliwanagan din ang isip mo na ang buhay sa mundo ay sadyang ganyan. Hindi puwedeng walang pagsubok na mararanasan at ‘pag mas mabigat ang pagsubok, mas maganda ang magiging kapalit, basta’t malagpasan, labis-labis ang kaligayahan. Kaysa naman mababaw lang ang problema, mababaw din ang kapalit na kaligayahan at walang kabuhay-buhay. Pero kapag mas mabigat ang pagsubok, mas maganda ang gantimpalang nakalaan at mas masarap damhin sa kalooban. Kaya ‘wag na ‘wag mong tangkain na wakasan ang iyong buhay dahil hindi ‘yan ang solusyon.

Physical body mo lang ang nawala, pero buhay na buhay pa rin ang isip o kaluluwa mo na nakatunghay sa mundo. Malayang nagkakatuwaan ang mga tao ‘pag may kasayahan. Malayang nagvi-videoke at nagkakantahan, kaya paano na kung mag-suicide ka? Hindi mo na mae-enjoy ang ligaya pagkatapos ng dusa. Muli, hindi ‘yan ang solusyon. Gawin mong sentro ng buhay mo ang Diyos dahil Siya ang makapangyarihan sa lahat at Siya ang lumikha sa atin. Siya rin ang lulutas ng mga pasanin natin sa mundong ating ginagalawan. Manalig, magtiwala at sumampalataya ka. Mabuhay ka rin nang naaayon sa magandang halimbawang itinuturo ng Diyos sa Banal na Kasulatan. Siguradong hindi ka maliligaw at magdurusa pa kailanman.

Sumasaiyo,

Sister Isabel del Mundo