‘di makaalis sa work kahit inaabuso ng amo

ni Sister Isabel del Mundo - @MgaKuwentongBuhayatPag-ibig | July 4, 2022

Dear Sister Isabel,

Ulila na kaming magkakapatid. Ako ang panganay, kaya ako ang tumatayong ama at ina ng mga kapatid kong edad 7 at13. Sa kagustuhan kong mapag-aral at makatapos sila kahit hanggang high school lamang, namasukan akong katulong. Stay-out ako, kaya nasusubaybayan ko pa rin sila at sama-sama kami sa iisang bubong, lalo na sa gabi.

Ang problema ko ay ang amo kong lalaki dahil kapag umaalis ang misis niya ay minomolestiya niya ako. Dumating pa sa punto na nakuha niya ang virginity ko, pero hindi ako makapagsumbong dahil tinakot niya ako na may masamang mangyayari sa akin kapag ginawa ko ‘yun.

Isa pa, wala naman akong mapapasukan na malaki ang suweldo dahil elementary lang ang natapos ko at ayaw ko ring mag-away sila nang todo ng amo kong babae dahil napakabait sa akin ng misis niya. Nahihirapan na ang kalooban ko, pero wala akong magagawa kundi hayaan na lang ang mga nangyayari.

Ano ang dapat kong gawin para makawala sa ganitong sitwasyon? Naguguluhan na talaga ako, kaya sana ay matulungan n’yo ako.

Umaasa,

Melinda ng Novaliches

Sa iyo, Melinda,

Huwag mo nang hayaang lumala pa ang mga pangyayari at mabuntis ka ng amo mo. Umalis ka na ngayon din sa bahay na ‘yan at huwag mo nang ipagpatuloy ang pagtatrabaho r’yan. Sa aking palagay ay makakatagpo ka naman agad ng ipapalit sa iiwan mong trabaho kaysa naman mapariwara ang pagkababae mo at babuyin ka ng amo mong ‘yan. Huwag mong ikatwiran na malaki ang sahod at baka hindi ka na makatagpo ng kagaya nu’n dahil maling katwiran ‘yan.

Lumagay ka sa tama. Magdasal ka nang taimtim sa Diyos na alalayan ka sa buhay na sinapit mo. Pagkalooban ka Niya nawa ng magandang pagkakakitaan upang magampanan mo ang pagiging ama at ina sa iyong mga kapatid. Mahal ng Diyos ang mga ulila at kasama ka ru’n.

Natitiyak ko na makakatagpo ka ng trabaho na higit pa r’yan sa iiwan mo. Gayudin, ingatan mo ang iyong pagkababae, huwag mong hayaang bastusin o gamitin ka ng sinumang lalaki na hindi mo naman mahal. Sagrado ang pag-ibig, kaya ibigay mo lang ang iyong sarili sa taong mahal mo.

Hanggang dito na lang, lakip nito ang dalangin ko na makatagpo ka agad ng bagong trabaho alang-alang sa mga kapatid mo. Makatapos nawa sila ng pag-aaral gaya ng pinapangarap mo.

Sumasaiyo,

Sister Isabel del Mundo

Baon sa utang dahil wa’ sustento ang mister na nambabae

ni Sister Isabel del Mundo - @MgaKuwentongBuhayatPag-ibig | June 27, 2022

Dear Sister Isabel,

Isa akong tindera ng gulay sa palengke. Hirap na hirap na ako dahil iniwan ako ng asawa kong nambabae at ako ang nangangalaga sa apat naming anak. Baon na ako sa utang at wala naman akong pambayad dahil maliit lang ang kita ko sa pagtitinda ng gulay.

Mabuti na lang, tumama ako sa jueteng, kaya medyo nabawasan ang utang ko. Kailan kaya aasenso ang buhay ko? Masipag naman ako at lahat ay kinakaya ko, alang-alang sa aming mga anak. Gusto kong humingi ng sustento sa asawa ko, pero hindi niya ako pinansin nang minsang magkita kami.

Ano ang dapat kong gawin? Hihintayin ko ang payo n’yo.

Nagpapasalamat,

Beda ng Antipolo

Sa iyo, Beda,

Kung hindi ka masyadong kumikita sa pagtitinda ng gulay, baka panahon na para magpalit ka ng paninda. Mas okay siguro kung magtinda ka na lang ng merienda o street food tulad ng tusok-tusok o fishball, kikiam, kwek-kwek, ihaw atbp. Sa nakikita ko, maraming bumibili ng mga ‘yan at mas may tsansa kang kumita.

Gayundin, iwasan mong tumaya sa jueteng. Sa tingin ko ay panay ang pagtaya mo r’yan dahil nagbabaka-sakali kang tumama ulit. Hindi ‘yan ang solusyon para makaahon ka sa hirap dahil lalo ka lang maghihirap ‘pag nalulong ka r’yan.

Tungkol naman sa asawa mong nangaliwa, may karapatan kang humingi ng sustento, gayung naiwan sa iyo ang apat n’yong anak. Kaya lang, may trabaho o pera ba ang asawa mo o baka naman palamunin din siya ng kabit niya? Kung may hanapbuhay siya, lumapit ka sa women’s desk at magpatulong kang humingi ng sustento. Tiyak na tutulungan ka nila, subalit mangyayari lamang ‘yan kung kasal kayo ng asawa mo at kung hindi ka naman legal wife, mahihirapan kang humingi ng sustento.

Gayunman, sipag, tiyaga at pananalig sa Diyos ang tanging solusyon sa huhay mo ngayon. Huwag kang mawawalan ng pag-asa. ‘Ika nga, habang may buhay, may pag-asa. Giginhawa ka rin at makakaahon sa kalagayan mo ngayon.

Walang permanente sa mundo. Lahat ng bagay ay dadaan at lilipas. Hanggang dito na lang. Sumaiyo nawa ang pagpapala ng Dakilang Lumikha.

Sumasaiyo,

Sister Isabel del Mundo

Problemado dahil iniwan ng kabit at anak, gusto nang bumalik sa tunay na pamilya

ni Sister Isabel del Mundo - @MgaKuwentongBuhayatPag-ibig | June 15, 2022

Dear Sister Isabel,

Wala na yatang katapusan ang mga problema ko. Pilit ko mang ilagay sa tama ang buhay ko, palagi namang may aberya. Isinumpa kaya ako?

May asawa ako at tatlong anak na nasa tamang edad na. Nagsimula ang problema ko dahil sa asawa kong mama’s girl at gusto na palaging nakadikit sa pundya ng nanay niya. Hirap na hirap na akong makisama sa pamilya niya, kaya naman kumuha ako ng bahay sa isang subdivision para bumukod na kami, pero ayaw ng asawa ko.

Natukso akong umibig sa iba at nagkaanak kami, at galit na galit ang asawa ko. Tuluyan ko siyang iniwan at nagsama kami ng babaeng ipinalit ko sa kanya, ngunit natuklasan ko na hiwalay siya sa una niyang asawa at may problema siya nang kaunti sa pag-iisip. Sinasaktan din niya ang 2-anyos na anak namin ‘pag sinusumpong siya.

Noon ko pa kinukuha ang bata, pero ayaw niyang ibigay hanggang sa nagharap kami sa barangay para makuha ko ang custody dahil alam kong delikado ‘pag nasa kanya, ngunit mas pinaboran siya ng barangay.

Matino kasi siyang kausap nang araw na ‘yun at tuluyan na siyang humiwalay sa akin habang dala ang bata sa Cebu. Nabuhay akong mag-isa at sinikap kumita ng malaki para may maipadala sa bata.

Sa ngayon, nag-iisa na lang ako sa buhay dahil hindi pa ako mapatawad ng tunay kong pamilya. Gusto ko na sanang bumalik sa kanila at buuing muli ang pamilya namin.

Sa palagay n’yo, ano ang dapat kong gawin? Umaasa akong matutulungan n’yo ako sa problemang gumugulo sa isip ko ngayon. Hihintayin ko ang inyong kasagutan.

Nagpapasalamat,

Jerome ng Naic, Cavite

Sa iyo, Jerome,

Sa palagay ko ay nakapag-isip-isip na ang asawa mo na kaya mo nagawang humanap ng ibang babae ay dahil na rin sa kanya. May asawa na siyang tao pero ayaw pa ring iwan ang pamilya niya para sumama sa iyo at mabuhay kayong mag-anak nang payapa, panatag at magkakasama sa iisang bubong. Mabuti nga at nakatagal ka hanggang nasa wastong edad na ang mga anak mo. Gayunman, ligawan mong muli ang asawa mo. Walang matimtimang birhen sa matiyagang manalangin, ‘ika nga.

Natitiyak kong mabubuo muli ang pamilya n’yo at marahil, naka-move on na siya, gayundin ang mga bata at nauunawaan na nila ang naging pagkakasala mo.

Puntahan at kausapin mo na ang asawa mo. Kung paano mo siya niligawan noon, ganu’n ulit ang gawin mo at higit sa lahat, lumapit ka sa Diyos.

Magdasal ka nang taimtim na muling buuin ang pamilya mo. Hindi natutulog ang Diyos, diringgin Niya ang dasal mo. Lakip nito ang aking dalangin na maging panatag, masaya at mabiyaya ang muli mong pagbabalik sa tunay mong pamilya.

Sumasaiyo,

Sister Isabel del Mundo