Gustong bumalik sa biological mom dahil may sakit

ni Sister Isabel del Mundo - @MgaKuwentongBuhayatPag-ibig | July 13, 2022

Dear Sister Isabel,

Isa akong ampon at uhaw na uhaw ako sa pagmamahal ng tunay kong ina. Lumaki ako sa pangangalaga ng umampon sa akin, pero nagkita na kami ng tunay kong ina at napakabait niya. Dama ko ang lukso ng dugo at mahal ko rin siya. Gayundin, ipinaliwanag niya kung bakit kami nagkalayo at naunawaan ko ang lahat nang walang bahid ng pagkamuhi sa kanya. Hindi ako galit sa kanya dahil naging ampon ako.

May malubhang sakit ako ngayon, pero hindi ko maramdaman ang pag-aasikaso ng umampon sa akin. Gusto ko nang tumira sa tunay kong ina, pero ayaw akong payagan ng umampon sa akin.

Willing naman ang tunay kong ina na magkasama kami at tuwang-tuwa siya kahit sinabi ko na may malubha akong sakit.

Ano ang gagawin ko sa mga umampon sa akin para payagan na akong makapiling ang tunay kong ina hanggang sa huling sandali ng aking buhay?

Nagpapasalamat,

Gloria ng Bataan

Sa iyo, Gloria,

Masakit din naman sa kalooban ng umampon sa iyo na iiwan mo na sila at du’n ka na mamamalagi sa tunay mong ina. Sa palagay ko ay iniisip nila na tuluyan kang mawawala sa piling nila matapos ang mahabang panahon ng pagpapalaki sa iyo. Gayunman, kausapin mo sila nang maayos at ipaliwanag na hindi ka naman totally mawawala sa buhay nila.

Ipangako mo na dadalawin mo sila nang madalas at ganu’n pa rin ang magiging pakikitungo mo sa kanila.

Sa palagay ko naman ay maiintindihan nila ang damdamin mo, gayundin ang pananabik na makapiling nang tuluyan at makasama habambuhay ang tunay mong ina.

Lahat ng bagay ay malulutas sa mahinahon at maayos na pakikipag-usap.

Sumasaiyo,

Sister Isabel del Mundo

‘Di maibenta ang minanang bahay dahil tutol ang kapatid sa labas

ni Sister Isabel del Mundo - @MgaKuwentongBuhayatPag-ibig | July 11, 2022

Dear Sister Isabel,

Sumangguni ako sa inyo dahil batid kong kayo lang ang maaaring magbigay sa akin ng payo tungkol sa problemang kinakaharap ko ngayon. Labis akong nasisiyahan at ang sarap sa pakiramdam ‘pag nababasa ko ang mga payo n’yo sa inyong mga tagasubaybay.

Ang problema ko ay tungkol sa bahay ng namayapa kong ama. Ako, ang isa ko pang kapatid at ang aming ina ang legal na tagapagmana, pero may isa siyang anak sa labas na binata na.

May sakit ang mama ko at kailangan namin siyang ipagamot, kaya gusto naming ibenta ang bahay. Nandito ako ngayon sa bahay ng ama ko para ayusin ang pagbebenta ng bahay. May buyer na kami na pinsan ng mama ko. Naawa kasi siya sa mama ko dahil nakita niyang hirap na hirap na siya sa kanyang karamdaman.

Ang problema, ayaw pumayag ng kapatid namin sa labas na ibenta ang bahay. Pinagpipilitan niya na may share rin siya sa bahay at hindi niya kailangan ang pera.

Ano ang dapat kong gawin para makumbinsi siya na ibenta ang bahay, tutal ay bibigyan din namin siya ng share kapag nabili na ito?

Sinabi ko na rin sa kanya na may sakit ang mama ko at kailangan namin ang malaking halaga, pero ayaw niya talagang pumayag. Ayaw ko ng away, pero hindi ko makumbinsi sa magandang salita ang kapatid kong ito. Kaya sana ay matulungan n’yo ako. Hihintayin ko ang sagot n’yo.

Nagpapasalamat,

Danilo ng Pangasinan

Sa iyo, Danilo,

Makabubuting lumapit ka sa barangay at du’n mo sabihin ang problema mo. Kung sa pag-uusap n’yo ay ‘di pa rin makumbinsi ang kapatid mong ‘yan na ibenta ang minana n’yong bahay, lumapit ka sa kaanak n’yo na iginagalang niya at hindi niya puwedeng tanggihan. Sila ang kakausap sa kanya at kung hindi pa rin siya pumayag, kausapin n’yo na lang ‘yung buyer na ‘yung maliit na share ng kapatid mo ay hindi kasali sa ibinebenta n’yo.

Sa palagay ko ay papayag naman ‘yung buyer n’yo, lalo pa’t hindi naman siya iba sa inyo. Sa awa at tulong ng Diyos, makukumbinsi mo rin ang buyer na bilhin ang bahay na pamana sa inyo.

Ipagdasal mo lang nang taimtim sa Diyos ang problema mo. Prayer can move mountains. Tutugunan ng Diyos ang iyong dasal at maibebenta n’yo rin ang naturang bahay.

Sumasaiyo,

Sister Isabel del Mundo

Takot umaming may anak sa pagkadalaga; problemado pa dahil itinago ang bata

ni Sister Isabel del Mundo - @MgaKuwentongBuhayatPag-ibig | July 6, 2022

Dear Sister Isabel,

Matagal ko nang gustong humingi ng payo sa iyo, pero nahihiya akong malaman n’yo ang aking sikreto. Ngunit dahil kailangan ko ang payo n’yo, naglakas-loob akong sumangguni sa inyo.

Tungkol ito sa anak ko na nasa piling ng kanyang ama. Nabuntis ako ng kasamahan ko sa trabaho noon sa Dubai. Nagkaibigan kami hanggang sa nagbunga ito ng anak na lalaki. Tuwang-tuwa siya dahil puro babae ang anak niya sa kanyang legal wife at pangatlo ‘yung anak namin.

Parehas kaming umuwi sa Pilipinas nang walang kamalay-malay ang mga pamilya namin at nagtago kami sa Mindanao kung saan ako nanganak.

After one year, kinailangan kong ipaubaya sa kanya ang bata dahil kailangan ko na ring umuwi sa sarili kong pamilya. Ginagalang ang angkan namin sa aming lugar, kaya hindi ko masabi sa mga magulang ko ang nangyari sa akin. Nag-aalala ako dahil baka itakwil o saktan at palayasin ako ng tatay ko. Parehong strict ang parents ko, kaya hindi ko alam kung paano ipagtatapat sa kanila ang aking lihim.

Ang isa ko pang problema ay nasa ama ang bata kasama ang tunay niyang pamilya at tinanggap naman ito. Noong una ay dinadalaw ko siya nang palihim, pero itinago na siya sa akin at hindi ko na alam kung saan siya hahanapin.

Ano ang dapat kong gawin, Sister Isabel? Sobrang kalungkutan na ang dinaranas ko at hirap na hirap na ako. Umaasa ako na mabibigyan n’yo ako ng magandang payo.

Nagpapasalamat,

Marilyn ng Tanay, Rizal

Sa iyo, Marilyn,

‘Ika nga, walang lihim na hindi nabubunyag. Makabubuting ipagtapat mo na sa mga magulang mo ang nangyari sa iyo. Sabihin mo muna ito sa iyong ina at siya na ang magsasabi sa iyong ama. Itaon mo na nasa maganda siyang mood. Walang magulang na nakakatiis sa kanyang anak, kaya huwag kang mag-alala dahil natitiyak kong uunawain ka ng iyong ina. Sa umpisa, asahan mong mabibigla siya, pero kalaunan ay iiral pa rin ang kanyang pagiging ina at mailalagay din sa ayos ang lahat.

Tungkol naman sa anak mong nawalay, ipinaubaya mo na sa siya sa kanyang ama at inilayo na sa iyo. Hayaan mo muna, tiyak namang hindi siya pababayaan ng ama niya. Bagkus, palalakihin siya nang maayos at itataguyod ang pag-aaral niya hanggang makatapos siya ng kolehiyo.

Ipagdasal mo na lang na balang-araw ay magkita at magkaayos kayo, gayundin, maunawaan niya na ang buhay ay hindi natin kontrolado. Biktima lang kayo ng mapagbirong tadhana, pero sa tulong ng Diyos at sa takdang panahon, magkikita rin kayo ng anak mo nang wala siyang sama ng loob sa iyo. Ipagdasal mo ‘yan at Diyos na ang bahalang kumilos sa problema mo. Siya ang may likha sa ating lahat at Siya rin ang nakakaalam ng mga susunod na magaganap.

Everything will be fine in accordance with God’s master plan.

Sumasaiyo,

Sister Isabel del Mundo