Nabuntis ng stepfather pero ayaw magpa-abort

ni Sister Isabel del Mundo - @MgaKuwentongBuhayatPag-ibig | August 1, 2022

Dear Sister Isabel,

Kakaiba ang problemang isasangguni ko sa inyo. Hindi alam ng nanay ko na may relasyon kami ng stepfather ko. Lihim kaming nagde-date at maingat kaming magtago ng aming relasyon, kaya hindi nakakahalata ang mama ko. Enjoy na enjoy kami ng stepfather ko ‘pag magkasama kami at labis na rin akong umiibig sa kanya. Madalas kaming makalimot, kaya ngayon ay naramdaman kong buntis ako. Ano ang gagawin ko?

Sa lalong madaling panahon ay matutuklasan na ng mama ko ang lihim naming ito. Ang sabi ng stepfather ko, magpa-abort ako habang hindi pa halata ang pagbubuntis ko, pero hindi naman kaya ng konsensiya ko.

Naguguluhan ako, Sister Isabel, kaya sana ay matulungan n’yo ako. Hihintayin ko ang payo n’yo.

Nagpapasalamat,

Elsa ng Mandaluyong

Sa iyo, Elsa,

Nand’yan na ‘yan at nangyari na. Wala ka nang magagawa kundi mag-isip ng tamang solusyon sa problema mo ngayon. Sa palagay ko, lumayo ka sa lugar na ‘yan at sabihin mo sa stepfather mo ihanap ka ng matitirahan na malayo sa bahay n’yo. Sabihin mo sa iyong ina na nakatagpo ka ng mas magandang trabaho na may malaking suweldo at du’n mo isilang ang batang dinadala mo sa iyong sinapupunan nang walang nakakaalam at malayo sa tsismis ng mga kapitbahay.

Huwag na huwag mong ipapalaglag ang bata dahil kasalanang mortal ‘yan at malaking kaparusahan ang daranasin mo mula sa Diyos kung ipapalaglag mo ang sanggol sa iyong sinapupunan. Anak ng Diyos ‘yan, lahat ng batang isinisilang ay children of God at may role silang gagampanan sa mundo ayon sa kagustuhan ng Diyos Ama sa langit.

Sa kabilang dako, itigil mo na ang lihim na relasyon n’yo ng stepfather mo. Idilat mo ang iyong mga mata sa katotohanan na maling-mali ang landas na pinasok mo. Hindi ka pagpapalain sa ginawa mo at habambuhay kang kakarmahin.

Pagkasilang mo sa batang ‘yan, lumayo ka nang tuluyan sa nakabuntis sa iyo at humanap ka ng tutulong sa iyo upang makaiwas na sa bawal na pag-ibig. Kung sakali namang malaman ng nanay mo ang nangyari, asahan mong sa simula ay magagalit siya, pero kalaunan ay uunawain ka niya at tutulungan, lalo pa’t magkakaapo na siya sa iyo. Walang inang nakatiis sa anak.

Batid kong mapapatawad ka niya at tutulungang tumahak ng tamang landas. Gagawa siya ng paraan upang maisaayos ang sitwasyong kinakaharap n’yo. Kasihan nawa kayo ng Maykapal.

Sumasaiyo,

Sister Isabel del Mundo

Ayaw nang mabuhay dahil puro problema

ni Sister Isabel del Mundo - @MgaKuwentongBuhayatPag-ibig | July 25, 2022

Dear Sister Isabel,

Naguguluhan na ako sa mundong ito. Gusto ko nang wakasan ang aking buhay upang doon na tumira sa permanente nating tirahan sa kabilang buhay, kung saan walang gutom at uhaw.

Suko na ako sa mga pasakit, dalamhati, pagtitiis at walang katapusang problema. Ayaw ko na at hindi ko na talaga kaya. Para bang wala nang kaligayahang naghihintay sa akin dito sa lupa dahil sa non-stop na mabibigat na problema at sabay-sabay pa.

Tulungan n’yo ako para makayanan ko ang buhay sa mundong ito.

Nagpapasalamat,

Dorothy ng Davao

Sa iyo, Dorothy,

Sadyang ganyan ang buhay dito sa lupa, hindi gaya sa langit. Acceptance ang kailangan. Nakatira ka rito sa lupa, kaya harapin mo nang buong tatag ang mga kalbaryo sa buhay.

Dapat mong isaisip na walang permanente sa mundo dahil lahat ay dadaan at lilipas.

Sabi nga, kung may lungkot, may ligaya. Kung may luha, mayroon ding galak at tuwa. Ang kailangan lang ay huwag masyadong dibdibin at alalahaning hindi ka nag-iisa. Lahat ay dumaranas ng matinding pagsubok, ngunit sa sandaling malagpasan, may gantimpalang nakalaan.

Gayundin, gamitin mo ang iyong isip at tamang diskarte sa buhay. Binigyan tayo ng talino, kaya marapat lamang na gamitin ito upang humanap ng solusyon o pamamaraan para malagpasan ang mga pasanin sa buhay. At higit sa lahat, tumawag ka sa Diyos at huwag kang makakalimot na magdasal. ‘Ika nga, tamarin ka na sa ibang bagay, huwag lamang sa pagdarasal.

Hawak tayo ng Diyos, Siya ang lumalang sa atin at kung hindi mo na kaya, nar’yan Siya para saluhin ka. Kung may pananampalataya, determinasyon at katatagan, malalagpasan mo ang lahat ng pagsubok sa buhay.

Sa kabilang banda, mali ang iniisip mo na wakasan ang iyong buhay dahil physical body lang ang mawawala. Kapag ang isang tao ay namatay, buhay pa rin ang kanyang kaluluwa o espiritu na pagala-gala hanggang hindi pa umaakyat sa langit o napupunta sa impiyerno, kung saan dadalhin ng katalagahan. Hindi ‘yun ang solusyon sa non-stop na problema mo, kaya huwag na huwag mong wawakasan ang iyong buhay.

Nawa’y naliwanagan ka sa mga inilahad ko sa iyo. Ang kalungkutan mo ngayon ay may ligayang kapalit na malapit mo nang maranasan sa mga darating na araw.

Sumasaiyo,

Sister Isabel del Mundo

Utol, gustong umulit sa pakikipag-sex, ‘di mapigilan ni girl kahit tutol

ni Sister Isabel del Mundo - @MgaKuwentongBuhayatPag-ibig | July 18, 2022

Dear Sister Isabel,

Ayaw ko na sanang malaman ng iba ang problema ko, pero mahirap pala itong kimkimin, lalo na’t hindi mo alam kung paano ito lulutasin, kaya naisip kong sumangguni sa inyo.

Nakuha ng kapatid ko ang aking virginity at biglaan ang mga pangyayari. Parang wala kami sa aming sarili nang mangyari ang lahat at walang nakakaalam sa bahay kundi kaming dalawa lang. Alam kong mali, kaya umiiwas na ako sa kanya, pero paminsan-minsan ay gusto niyang maulit ang nangyari sa amin. Pinipilit niya ako at dumating pa sa punto na nagbanta siya na may mangyayaring hindi maganda kapag hindi ako pumayag sa kanyang kagustuhan. Kaya huwag na huwag daw akong magsusumbong.

Sister, hirap na hirap na ang kalooban ko, kaya sana ay matulungan n’yo ako.

Nagpapasalamat,

Eliza ng Bohol

Sa iyo, Eliza,

Hindi mo sinabi kung ilang taon ka na, pero sa palagay ko ay kaya mo nang mag-isip kung ano ang tama at mali. Alam na alam mo na napakalaking kasalanan at maling-mali na hinayaan mong makuha ng kapatid mo ang iyong pagkababae at ngayon ay nalalagay ka sa mahirap na sitwasyon at hindi mo pa alam ang gagawin.

Ipinapayo ko na lakasan mo ang iyong loob. Ipagtapat mo ang nangyari sa tiyahin mo na makakatulong sa iyo upang tuluyan ka nang makaiwas sa kapatid mo. Huwag mo munang ipagtapat sa iyong ina o ama dahil baka sa pagkabigla ay masaktan pa nila ang kapatid mo.

Gayunman, ang tiyahin mo ang bahalang magsabi sa iyong ina. Kaya ihanda mo na ang iyong sarili at tanggapin kung ano ang dapat gawin. Huwag mo nang ipagpaliban pa, hingin mo na ang tulong ng tiyahin mo na alam mong may malawak na pang-unawa at handang tulungan ka sa problemang kinakaharap mo ngayon.

Lakip nito ang dalangin ko na gabayan ka ng Diyos sa mabigat na problemang kinakaharap mo sa kasalukuyan. Tumawag ka sa Diyos. Hingin mo ang Kanyang tulong at humingi ka rin ng tawad sa napakalaking kasalanan na nagawa n’yo ng iyong kapatid.

Sumaiyo nawa ang kapayapaan ng isipan at kalutasan ng iyong suliranin sa buhay.

Sumasaiyo,

Sister Isabel del Mundo