Duda sa malaking sustento ng mister, buking na sangkot sa ilegal na gawain

ni Sister Isabel del Mundo - @MgaKuwentongBuhayatPag-ibig | August 15, 2022

Dear Sister Isabel,

Nasisiyahan akong basahin ang kolum n’yo. Hangang-hanga ako sa mga payo n’yo sa sumasangguni sa inyo. Akala ko ay magiging tagabasa na lang ako ng kolum n’yo dahil wala naman akong mabigat na problema, ‘yun pala ay isa rin ako sa hihingi ng payo sa inyo.

Kamakailan ay may natuklasan ako sa asawa ko. May ilegal na transaksyon pala siyang pinasukan, kaya palaging malaki ang perang ibinibigay niya sa akin, gayung hindi naman kalakihan ang kita sa negosyo namin.

Natatakot at nag-aalala ako dahil baka mahuli sila ng awtoridad at makulong siya kasama ng mga boss niya. Tinanong ko siya tungkol sa natuklasan ko, pero hindi siya umamin.

Hindi talaga mapanatag ang isip ko at naghihirap ang damdamin ko mula nang matuklasan ko ang ilegal na gawain ng asawa ko. Tulungan n’yo ako at payuhan kung ano ang nararapat kong gawin para tuluyan nang itigil ng asawa ko ginagawa niya bago mahuli ang lahat.

Nagpapasalamat,

Brenda ng Malabon City

Sa iyo, Brenda,

Mabigat at mahirap nga sa kalooban ang problema mo. Sa palagay ko ay kailangan mong kausapin nang masinsinan ang asawa mo at ipaunawa mo sa kanya na hindi lamang siya ang magdurusa kung matutuklasan ng mga awtoridad ang illegal transactions na kinasasangkutan niya kundi pati na rin kayong mahal niya sa buhay.

Hindi pa kamo huli ang lahat, kaya humiwalay na siya sa grupo. Kung sasabihin niyang hindi niya kayang gawin dahil baka ipapatay siya dahil iisipin ng mga kasamahan niya na madadamay sila, lumipat na kayo ng tirahan na malayo r’yan o kung puwede, magtrabaho muna sa abroad ang asawa mo. Mag-apply siya ru’n para tuluyan nang makaiwas sa ilegal na gawain dito sa Pilipinas. Kailangan niya itong gawin sa lalong madaling panahon nang hindi nalalaman ng mga kasamahan niya. Ipaunawa mo rin sa kanya na lahat ng bagay na masama ay may kaparusahan, habang ang lahat ng bagay na mabuti ay may gantimpalang nakalaan.

Lakip nito ang dalangin ko na sana’y maunawaan ka ng asawa mo at sundin ang ipapayo mo.

Sumasaiyo,

Sister Isabel del Mundo

Gusto nang mawala sa mundo dahil puro problema

ni Sister Isabel del Mundo - @MgaKuwentongBuhayatPag-ibig | August 10, 2022

Dear Sister Isabel,

Bakit puro nalang pagtitiis ang buhay sa mundo? Hindi na matapos-tapos ang problema, sasaya ka lang sandali, tapos may kalungkutang darating. Mabuti pa sa kabilang buhay, walang gutom at uhaw, wala ring pagod na mararamdaman. Puro maganda ang iyong matatanaw kasama na ang mg anghel sa kapaligiran.

Sister, gusto ko nang wakasan ang buhay ko para matapos na ang paghihirap ko. Simula’t sapul, puro na lang kalungkutan ang buhay ko dahil sa mga problema. Ayaw ko na talaga, suko na ako sa mundo.

Nawa’y mapalubag n’yo ang kalooban ko. Malaki ang tiwala ko na ikaw lamang ang magpapalubag sa aking kakooban para hindi mag-isip na wakasan na ang buhay ko rito sa daigdig.

Nagpapasalamat,

Gloria ng Batangas

Sa iyo, Gloria,

Isang mapagpala at magandang araw sa iyo. Think positive, ‘yan ang dapat mong gawin. Always think the good sides of life no matter what. Kapag palagi kang negative, puro kalungkutan ang darating sa buhay mo. Sa kabilang dako, kapag masaya ka, sasaya rin ang kapalaran mo. Kumbaga, kung ano ang iniisip mo, ‘yun din ang masasagap ng stimulus mo.

Nakasalalay sa mga kamay natin ang ating buhay at kaakibat nito ang pagdarasal. Sa awa at tulong ng Diyos, makakamit natin ang mga pagpapala at tagumpay. Everything you do, put God in it and He will crown your effort with success.

Huwag kang makakalimot na mag-ukol ng panahon sa Diyos dahil hindi ka Niya pababayaan. Siya ang bukal ng pag-asa, tagumpay at kaligayahan.

Gayunman, marahil, kaya walang patid ang problema mo ay dahil hindi ka na nakakapagsimba. Kung gayun, magsimba ka tuwing Linggo o pistang pinangingilinan. Mag-novena ka sa paborito mong Santo, kay Jesus o sa Mahal na Birheng Maria, at makikita mo na gagaan ang iyong buhay, gayundin, bihira lang ang kalungkutang daranasin mo. Ganyan ang buhay sa mundo, dapat mag-ukol ng kahit kaunting panahon sa Diyos.

Sa kabilang dako, hindi solusyon ang iniisip mong wakasan ang iyong buhay para matapos ang kalungkutan mo. Physical body mo lang ang mawawala, habang buhay na buhay pa rin ang kaluluwa mo. Nakatunghay ka sa mga mahal mo sa buhay na iniwan mo sa mundo, pero hindi mo na sila puwedeng hawakan, yakapin at halikan dahil wala ka nang physical body, bagkus ay kaluluwa ka na lang.

Dahil d’yan, huwag mong ituloy ang iniisip mo na wakasan ang iyong buhay. Isa pa, lahat ng problema ay may solusyon at walang permanente sa mundo. ‘Ika nga, kung may lungkot, may ligaya.

Sumasaiyo,

Sister Isabel del Mundo

Masama ang loob sa anak na OFW dahil puro sumbat

ni Sister Isabel del Mundo - @MgaKuwentongBuhayatPag-ibig | August 8, 2022

Dear Sister Isabel,

Biyuda ako at may apat na anak, maliliit pa sila nang namatay ang kanilang ama. Sinikap kong bigyan sila ng magandang buhay at makatapos ng pag-aaral, at sawa ang Diyos, nalagpasan ko ang lahat ng matitinding pagsubok ng isang single parent.

Naging domestic helper ako sa abroad at maging ang trabahong lalaki ay pinasok ko na. Ang masakit, hindi ako iginagalang ng anak ko, napakasakit niyang magsalita at para bang hindi niya ako ina. Narating na niya ang tagumpay at kasalukuyan siyang nagtatrabaho sa abroad.

Masama pala ang loob niya tuwing nagpapadala sa akin dahil mula raw nang magkatrabaho siya ay kailangan niya akong bigyan, samantalang hindi naman daw ako gumastos sa huling taon ng pag-aaral niya, gayundin, siya raw ang tumulong sa bunsong kapatid niya para makapagtapos ng pag-aaral.

Napakasakit niyang magsalita kahit wala naman akong masamang nagawa sa kanya at lumalabas na hindi niya pinahalagahan ang lahat ng sakripisyo ko para sa kanila.

Inaamin ko na hindi ko na kinayang mag-abroad, pinilit ko kasing makauwi dahil sa takot na mag-asawa sila ng ate niya nang bata pa, habang ang bunso ay baka maging adik. At noong kinapos ako ng pagpapaaral sa kanila, tinulungan ako ng mga kapatid ko.

Gayunman, ‘yun ang palaging isinusumbat niya at masamang-masama ang loob niya ‘pag nagpapadala siya ng maliit na halaga. Ang hindi ko matanggap ay ang masasakit na salitang binibitawan niya dahil tuwing malungkot siya ay ako ang pinagdidiskitahan niya. Wala pa siyang asawa sa edad na 35 at may pagka-tomboy siya.

Ano ang dapat kong gawin para bumait siya sa akin? Nawa’y mapayuhan n’yo ako para lumuwag ang damdamin ko.

Nagpapasalamat,

Thelma ng Cavite

Sa iyo, Thelma,

Ganyan ang uso ngayon sa mga anak na pinaghirapang palakihin, pag-aralin at tinulungang marating kung ano sila ngayon, at sila pa ang magsasalita ng masasakit sa mga magulang na nagtiis para mabigyan sila ng magandang bukas. Isa na r’yan ang anak mo na nagbibigay sa iyo ng sama ng loob sa kasalukuyan.

Ang maipapayo ko ay ipagdasal mo na lang at humingi ka ng tulong sa Diyos. Buong taimtim mong ipagdasal na hawakan Niya ang puso at isip ng anak mo para igalang at mahalin ka. Kung kokomprontahin mo kasi siya, tiyak na hindi siya magpapatalo at hahaba lang ang usapan n’yo at lalo kang masasaktan.

Tanging Diyos ang makakatulong sa iyo. Tumawag ka at ikaw ay pakikinggan. Kumatok ka at ikaw ay pagbubuksan, ‘ika nga sa banal na kasulatan. Speaking of Bible, subukan mo itong buksan at magugulat ka. Ang problemang dinadala mo ngayon ay agad na tutugunin at magkakaroon ng kasagutan kapag nagbasa ka ng Biblia.

Sa pahina na binuksan mo, saktong tungkol ito sa iyong problema, kaya kumuha ka agad ng Bible. Tiyak kong gagaan ang iyong kalooban sa sandaling mabasa ang pahinang binuksan mo. Hindi natutulog ang Diyos, bagkus, gagabayan ka Niya sa pamamagitan ng Biblia.

Sumasaiyo,

Sister Isabel del Mundo