Bebot, ‘di na ma-take ang panghuhusga at pambibintang ng utol

ni Sis. Isabel del Mundo @Mga Kuwento ng Buhay at Pag-ibig | August 12, 2024

Dear Sister Isabel,

Ang isasangguni ko ay tungkol sa minana naming lupa mula sa aming magulang. 

Inangkin ng panganay kong kapatid ang malaking bahagi nito sa kadahilang siya umano ang nag-alaga sa aming magulang noong panahong pareho silang may malubhang karamdaman. Kaunti lang ang napunta sa amin ng bunso kong kapatid. Tatlo lang kaming magkakapatid na naghati, at 1/4  lang ang nakuha namin ng bunso kong kapatid. 

Gayunman, pumayag na lang kami at nagsawalang kibo hanggang sa natagpuan kong wala ng buhay ang asawa ng panganay kong kapatid sa cr nila. 

Nagbigti ito, pero ang masaklap kaming dalawa ng kapatid ko ang pinagbintangan niya. Hindi raw nagbigti ang asawa niya, kundi pinatay daw namin. Pinalabas lang umano namin na nagbigti ito, pero hindi naman talaga. Napakasakit mapagbintangan, ‘di siya nagsampa ng nagdemanda, pero hindi namin matanggap ang pambibintang niya. Pati mga kapitbahay at ibang tao ay naging masama ang tingin sa amin. Nalagay kami sa kahihiyan, at nahusgahan pa kami.

Ano kaya ang dapat kong gawin? Grabe na ang dinaranas ko sa panganay kong kapatid na ewan ko nga ba bakit ganu’n ang naging ugali. 

Nawa’y mapayuhan n’yo ko kung paano makakayanan, at malalampasan ang problema kong ito sa kapatid kong ganid at suwapang.

Nagpapasalamat,

Dolores ng Eastern Samar

---

Sa iyo, Dolores,

Heto na naman, kapatid na naman ang sanhi ng problema. Ang masaklap nito ay napagbintangan pa kayo ng bunso mong kapatid, at pati tuloy kapitbahay n’yo ay napaniwala niya. 

Lalabas at lalabas din ang katotohanan, kaya huwag mong masyadong dibdibin ang mga pangyayari. Kung talagang hindi totoo ang binibintang niya sa inyo, wala kang dapat ikabahala para ‘di ka na rin gaanong makunsumi sa ugali ng panganay mong kapatid. 

Lumipat ka na lang din ng tirahan. ‘Yun bang malayo sa kanya, at huwag kang magtanim ng sama ng loob sa kanya. Sa halip, ipagdasal mo na lang siya. Idulog mo sa Diyos na baguhin nawa ang pangit niyang pag-uugali. Patawarin mo siya sa mga masama niyang nagawa sa inyo. 

Ang mga taong mapagpatawad ay pinagpapala ng Diyos. Huwag kang magdamdam kung mas maliit ang parte mo sa lupang minana mo sa magulang n’yo, dahil higit pa riyan ang ibibigay sa iyo ng Diyos basta’t manatili kang mapagkumbaba at mapagpatawad.

Makikita mo balang araw, mas yayaman ka pa sa kapatid mo na nang-aapi sa iyo at pinagbintangan ka pa sa krimeng kailanma’y hindi mo kayang gawin. Ipaubaya mo na lang sa Diyos ang lahat. Ang Diyos ay makatarungan, kaya nasisiguro ko na may gantimpalang nakalaan para sa iyo. 

Sumasaiyo,

Sister Isabel del Mundo

Bawal na pagmamahal… Madre at padre na nahulog ang loob sa isa’t isa, dapat nang tumigil

ni Sis. Isabel del Mundo @Mga Kuwento ng Buhay at Pag-ibig | July 22, 2024

Dear Sister Isabel,

Isa akong madre, pero may aaminin ako sa inyo. May dyowa ako ngayon na isang pari. Katabi lang ng kumbento namin ang kanilang kumbento, at lihim kaming umibig sa isa't isa. 

Mahusay naming itinatago ang aming sikreto, kaya naman wala pang nakakaalam ng tungkol sa relasyon namin.

Noong una ay maayos naman ang aming relasyon. Pareho kaming masaya, kahit paminsan-minsan lang ang mga nakaw na sandali sa amin. Kaya lang, parang inuusig ako ng aking konsensya. Patindi nang patindi ang konsensya na nararamdaman ng aking isip at damdamin. Hindi rin ako makatulog nang maayos, at gusto ko nang bumitaw sa aming relasyon. 

Ano ba ang dapat kong gawin? Nag-aalala rin ako na baka ‘di pumayag ang nobyo kong pari. 

Baka sa kalungkutan niya, bigla na lang niyang kitilin ang kanyang buhay. Sa aking palagay, hindi niya kayang tanggapin ang binabalak ko para sa ikapapayapa ng aming sitwasyon.

Hangad ko ang inyong payo sa kung ano ang dapat kong gawin. Hihintayin ko ang payo n’yo.

Nagpapasalamat, 

Bernadeth ng Baguio

---

Sa iyo, Bernadeth, 

Natural lamang sa isang babae na katulad mong walang asawa na umibig at magmahal. Bilang isang madre na nasa loob ng isang kumbento, hindi ka dapat nagkakaroon ng pagtingin sa isang pari na nasa loob din ng isang kumbento. 

Alam kong alam mo na kasalanang maituturing ang inyong ginagawa. Gayunman, Hindi pa huli ang lahat. Hangga’t maaga pa, mag-usap na kayo, putulin n’yo na agad ang namamagitan sa inyong dalawa. 

Sa aking palagay, kapwa lamang kayong naghahanap ng pagmamahal na may kasamang pananabik at saya. Magsimula ka na magdesisyon upang iwasan na ang pakikipagkita sa nobyo mo. Sa ganyang paraan, mawawala na ang kanyang nararamdaman sa iyo. Maiisip din niya na maling ipagpatuloy ang inyong relasyon.

Bago ka matulog, magdasal ka muna, at humingi ng tulong sa ganyang mga scenario. Humingi ka rin ng tawad at gabay sa Panginoong Hesukristo, at ipangako mo rin na iiwasan mo na ang mga mali at bawal bilang isang madre. 

Iyong pangatawanan ang bokasyong pinasok mo. Malalampasan mo rin lahat ng pagsubok, ikaw ang tinawag ng Panginoon sa isang banal na misyon sa daigdig.

Mapalad ka sa lahat ng mapalad, sapagkat napili kang maging isang ganap na madre. Kapag ito ay inilagay mo sa iyong isipan, hindi magtatagumpay ang demonyo na tuksuhin kang muli upang magkasala.

Sumasaiyo,

Sister Isabel del Mundo

Gusto lang naman tumulong… Lalaking nag-guarantor para sa tropa, naiipit

ni Sis. Isabel del Mundo @Mga Kuwento ng Buhay at Pag-ibig | July 10, 2024

Dear Sister Isabel,

Magulo ang isip ko ngayon dahil sa problemang bumabagabag sa akin. Napilitan akong maging guarantor ng best friend ko dahil awang-awa ako sa kalagayan niya, dahil kapos na kapos sila sa pera. 

Ang masaklap lang, Sister Isabel, hindi niya hinuhulugan ang inutang niyang malaking halaga kahit mayroon naman siyang negosyong binubuksan. 

Ako tuloy ang naiipit at sinisingil ng lending company na inutangan niya, dahil ako umano ang nag-guarantor. Hindi ko rin kayang bayaran ang inutang niya dahil sapat lang ang sinusuweldo ko para sa amin. 

Ano kaya ang dapat kong gawin? Binigyan na ako ng due date ng lending company, pero hanggang ngayon wala pa rin akong maibayad. Nawa’y mapayuhan n’yo kung paano ko malulutas ang problema ko. Hihintayin ko ang sagot n’yo.

Nagpapasalamat, 

Herbert ng Oriental Mindoro

---

Sa iyo, Herbert,

Ang pinakamaganda mong gawin ay makiusap ka sa lending company na kung puwede gawing installment ang perang inutang ng bestfriend mo. Ipaunawa mo sa kanila na naawa ka lang sa bestfriend mo, at hindi naman talaga ikaw ang may utang. 

Sa palagay ko naman pagbibigyan ka rin ng lending company na nagpautang sa kaibigan mo. 

Sa kabilang dako, maging leksiyon nawa sa iyo ang nangyari. Huwag ka na agad papayag na maging guarator. Mas maawa ka sa sarili mo na siyang mananagot sa kanilang obligasyon. Hanggang dito na lang, malalampasan mo rin ang problemang gumugulo sa isip mo. Sundin mo lang ang sinabi ko, dahil tiyak na pagbibigyan ka rin ng lending company kung makikiusap ka sa kanila.

Sumasaiyo,

Sister Isabel del Mundo