Super-hirap dahil sa mister na wa’ pangarap kaya balak mag-abroad

ni Sister Isabel del Mundo - @MgaKuwentongBuhayatPag-ibig | September 5, 2022

Dear Sister Isabel,

Plano kong mag-abroad para guminhawa ang pamumuhay namin ng mga anak ko. May asawa naman ako, pero kuntento na siya sa pagiging tricycle driver at wala siyang ambisyon sa buhay. Gayunman, mahal ko pa rin siya at ganundin siya sa akin, pero ang problema, tiyak na hindi papayag ang asawa ko sa aking plano dahil hindi niya kakayaning umalis ako para magtrabaho nang malayo sa kanila ng dalawang anak namin na pawang nasa elementary at parehong babae.

Sister, ano ang magandang diskarte para pumayag ang mister ko na mag-abroad ako? May employer na ako, naghihintay na lang siya ng go signal ko para ma-process na aking ang mga papeles. Hihintayin ko ang payo n’yo.

Nagpapasalamat,

Yolanda ng Batangas

Sa iyo, Yolanda,

Mag-isip-isip ka nang mabuti bago tuluyang magpasya kung itutuloy mo ang pagtatrabaho sa ibang bansa. Sa aking palagay, huwag mong iwanan ang iyong pamilya kapalit ng dollar dahil marami nang nawasak na pamilya dahil d’yan. Akala kasi nila, kaginhawahan ang dulot ng dolyar sa pamilya, ‘yun pala ay pagkakawatak-watak at pagkakapariwara ng anak sa kamay mismo ng tatay niya o sa ibang tao.

Bukod pa r’yan, hindi mo mararamdaman ang pagmamahal ng mga anak mo dahil mawawalan kayo ng bonding, gayung nasa malayo ka at sa bandang huli, ikaw pa ang sisisihin at ituturo na masama. Pati ang asawa mo na ang sabi mo ay mahal na mahal ka, tiyak paglayo mo ay mawawala ang lahat ng pagmamahal na ‘yan dahil malayo ka na. Wala na kayong physical contact at ikaw ay tao lamang na may pangangailangang seksuwal. Baka ikaw mismo ay hindi makatiis at humanap ng kaligayahan sa piling ng ibang lalaki.

Ipinapayo ko na mag-isip-isip ka muna. Rito sa Pilipinas, ‘pag masipag at madiskarte ka, hindi ka magugutom at mararating mo ang mga pangarap mo sa buhay. Ang mag-asawang nagkakasundo at nagmamahalan ay papatnubayan ng Diyos at magiging maayos ang pamumuhay.

Manatili ka rito sa Pilipinas, gamitin mo ang iyong talino at kakayahan, lakipan mo ng sipag at tiyaga, at tiyak na uunlad at papalarin ang iyong pamilya.

Huwag ka ring makakalimot na tumawag sa Diyos dahil Siya ang kasagutan sa iyong mga pangarap.

Sumasaiyo,

Sister Isabel del Mundo

Super-lungkot dahil ‘di na masaya ang pamilya, takot na maghiwalay ang mga magulang

ni Sister Isabel del Mundo - @MgaKuwentongBuhayatPag-ibig | August 22, 2022

Dear Sister Isabel,

Sumaiyo nawa ang pagpapala ng Diyos na dakila. Ang problema ko ay tungkol sa mga magulang ko. Napapansin ko na matabang na ang pagtingin nila sa isa’t isa at kunwari na lang ang ipinakikita sa aming magkakapatid kapag kaharap kami. Labis akong nag-aalala na isang araw ay maghiwalay na sila. Para bang may malalim silang problema na hindi masabi-sabi sa amin.

Ako ang bunso at next year pa ako magtatapos sa kolehiyo, habang ang dalawa kong kapatid ay graduate na at may mga trabaho na.

Ano ang gagawin ko para bumalik ang dating sigla sa tahanan namin? Hindi na kami masaya gaya ng dati at hinahanap-hanap ko ang family bonding namin. ‘Yun bang, sama-sama kaming namamasyal at kumakain sa labas. Ngayon ay hindi na kami ganu’n, at ang masaklap pa ay matabang na pagtitinginan ng mga magulang ko at bihira nang magkibuan. Masyado akong naaapektuhan, kaya sana ay matulungan n’yo ako.

Nagpapasalamat,

Robert ng Subic Zambales

Sa iyo, Robert,

Bilang bunsong anak, nauunawaan ko ang nararamdaman mo, subalit kailangan mong tanggapin ang katotohanan na walang perpektong pamilya. Minsan, magugulat ka na lang dahil biglang nagbago ang lahat, gaya ng nangyari sa inyo na dati ay masayang pamilya, ngunit ngayon ay hindi na.

Gayunman, tanggapin mo ito nang maluwag sa kalooban. Ang pagtuunan mo ng pansin ay ang iyong pag-aaral, gayung malapit ka nang magtapos. May kani-kanyang dahilan ang mga magulang mo sa nangyayari ngayon, kaya hayaan mong lutasin nila ito sa sarili nilang pamamaraan. Gayundin, ipagdasal mo na sana ay huwag lumala ang mga pangyayari, hindi ito matuloy sa hiwalayan at bumalik ang dating tamis ng kanilang pagtitinginan. ‘Yan lang ang dapat mong gawin.

Magpasalamat ka dahil suportado pa rin nila ang pag-aaral mo at mabuti rin naman na nakatapos na ng pag-aaral ang iyong mga kapatid at may kani-kanya nang trabaho. Enjoy-in mo lang ang buhay at huwag kang masyadong seryoso dahil baka atakihin ka ng depresyon at lalong hindi magiging mabuti ang kalagayan mo.

Ang buhay ay sadyang ganyan, kani-kanya ng drama at mga pagsubok sa buhay. Malalagpasan n’yo rin ‘yan sa awa at tulong ng Maykapal. Ugaliin mong magdasal at Diyos ang gawin mong sandigan. Makikita mo na isang araw ay muling babalik ang kaligayahan sa tahanan n’yo.

Sumasaiyo,

Sister Isabel del Mundo

78-anyos na ermat, laging tumatakas para mamasyal mag-isa

ni Sister Isabel del Mundo - @MgaKuwentongBuhayatPag-ibig | August 22, 2022

Dear Sister Isabel,

Nawa’y palagi kayong nasa mabuting kalagayan. Ang problema ko ay ang aking nanay na 78-anyos. Malakas pa siya, kaya nagagawa niyang tumakas sa bahay at namamasyal kung saan niya gusto. Nag-aalala kami dahil baka kung ano’ng mangyari sa labas ‘pag umaalis siya. Hindi talaga siya nagpapaalam at basta na lang umaalis, buti na lang, nakakabalik pa siya.

Ang problema, ayaw niyang makinig sa amin ‘pag sinasabihan siya na delikadong lumabas siya mag-isa dahil baka madisgrasya siya. Minsan ay naligaw na siya, buti na lang, may nakakilalang kapitbahay at hinatid siya rito sa amin.

Ano ang gagawin namin sa nanay ko? Ayaw naman niyang may kasama ‘pag lumalabas siya at talagang tumatakas siya para hindi namin siya samahan.

Sana ay mapayuhan n’yo ako dahil palagi kaming kinakabahan kapag bigla siyang nawawala para mamasyal.

Nagpapasalamat,

Imelda ng Pampanga

Sa iyo, Imelda,

Hindi mo binanggit kung malakas pa pangangatawan at matino pa ang isipan ng nanay mo kahit matanda na siya. Sa edad niyang 78, siguro naman ayos pa ang pakiramdam niya kaya siya ganu’n. Kumbaga, wala pa siyang nararamdaman sa katawan, kaya ayaw niyang nakakulong lang sa bahay, bagkus ay gusto niyang mamasyal at maglibang. ‘Yun nga lang, mag-aalala kayo. Kausapin n’yo siya nang maayos at ipaliwanag na dapat ay may kasama siya sa pamamasyal. Ipangako n’yo na hindi kayo magiging kill joy at kung ano ang gusto niya, hindi n’yo siya pipigilan. Sabihin n’yo na labis kayong nag-aalala para sa kanyang kaligtasan dahil baka hindi na siya makabalik.

Sa palagay ko naman ay maiintindihan niya ang side n’yo kung matino pa pag-iisip niya. Kung ulyanin na siya, delikadong pabayaan n’yo siyang lumabas nang mag-isa. Ipinapayo ko na kumain kayo sa labas, ipasyal na rin siya kung saan niya gusto kahit isang beses sa isang linggo. Palagi n’yong gawin ‘yan para hindi siya mainip sa bahay at hindi na magtangka pang umalis. Pagtiyagaan n’yo na at unawain ang ugali niya dahil ganyan talaga ‘pag tumatanda. Tatanda ka rin at ganundin ang posibleng gawin mo ‘pag hindi ibinigay ng anak mo ang iyong kalayaan.

Pang-unawa, pagmamahal at pag-aaruga nang buong tiyaga ang dapat mong gawin sa iyong nanay habang nandito pa siya sa mundo. Masakit mawalan ng ina, kaya hanggang kasama n’yo pa siya, ibigay mo ang lahat ng magpapaligaya sa kanya.

Alalahanin mo rin na mapalad ang mga anak na nagmamahal sa magulang, pagpapalain sila habambuhay at walang mabigat na problemang daranasin.

Sumasaiyo,

Sister Isabel del Mundo