Buking na may bf ang silahis na mister, gusto nang makipaghiwalay

ni Sister Isabel del Mundo - @MgaKuwentongBuhayatPag-ibig | October 10, 2022

Dear Sister Isabel,

Gusto kong magpatulong sa inyo tungkol sa asawa ko na may dalawang pagkatao. Silahis siya, kumbaga, puwede sa lalaki at puwede rin sa babae. Noong una ay hindi ko nahalata, pero nang tumagal ay napansin ko na.

Dahil d’yan, parang hindi ko na kayang tanggapin ang pagkatao niya nang nahuli ko siya na may dyowang lalaki. Nabawasan ang pagmamahal ko sa kanya kahit pa pagdating sa relasyon namin ay lalaking-lalaki naman siya.

Nanlalamig na ang pag-ibig ko sa kanya, kaya parang gusto ko nang makipaghiwalay. Parang hindi ko na kayang makisama sa lalaking may dalawang pagkatao.

Ano sa palagay n’yo ang dapat kong gawin? Hihintayin ko ang inyong kasagutan.

Nagpapasalamat,

Evelyn ng Tarlac

Sa iyo, Evelyn,

Kung sa palagay mo ay hindi mo na talaga kayang makisama sa kanya, hiwalayan mo na siya. Mahirap naman kung napipilitan ka na lang na tanggapin ang pagkatao niya, gayung ang sabi mo ay nanlalamig ka na sa kanya. Marahil ay mauunawaan naman niya ang dahilan kung sasabihin mo na gusto mo nang hiwalayan siya.

Gayunman, mahirap din kasing baguhin ang natural. Kung ganyan ang pagkatao ng asawa mo, hindi na ‘yan magbabago, kaya dapat lamang na kausapin mo siya nang masinsinan at ipagtapat ang nasa kalooban mo.

Umaasa akong magkakaintindihan kayo. Uunawain ka niya at bibigyan ng kalayaan.

Sumasaiyo,

Sister Isabel del Mundo

Asar sa 55-anyos na utol dahil laging galit

ni Sister Isabel del Mundo - @MgaKuwentongBuhayatPag-ibig | September 28, 2022

Dear Sister Isabel,

Ang problema ko ay tungkol sa kapatid kong 55-anyos na dati ay sobrang bait sa akin, pero ngayon ay bigla na lang naging masungit at sigaw nang sigaw kapag kinakausap ko. Palagi siyang pagalit kung magsalita at hindi ko alam ang dahilan. Hindi ko naman maitanong kung bakit siya ganu’n.

Ano ang gagawin kong approach para maibalik sa dati ang ugali ng kapatid ko? Nawa’y mabigyan n’yo ako ng kaukulang payo.

Nagpapasalamat,

Lourdes ng Davao

Sa iyo, Lourdes,

Ang sabi mo ay 55-anyos na ang kapatid mo. Unawain mo na lang siya dahil sa edad niya ngayon, baka nagme-menopause o andropause na siya. Sa edad niya na ‘yan, posibleng maging masungit at palasigaw siya, natural ‘yan sa tumatanda na.

Hindi mo rin alam kung may dinaramdam siya sa katawan. Pang-unawa ang kailangan mong gawin at ipagdasal mo ang kapatid mo. Sa Diyos ka dumulog at makikita mo, magbabago na ang pagtingin niya sa iyo.

Lahat ng bagay ay malulutas sa pamamagitan ng taimtim na pagdarasal.

Sumasaiyo,

Sister Isabel del Mundo

Suko na sa tamad at duwag na mister kaya gusto nang mag-abroad

ni Sister Isabel del Mundo - @MgaKuwentongBuhayatPag-ibig | September 26, 2022

Dear Sister Isabel,

Hindi ko alam kung bakit hindi na ako nilayuan ng mga problema. Hindi pa tapos ang isa, mayroon na namang bago. Mabuti na lang, nand’yan kayo para magbigay ng nararapat na payo sa mga suliranin ng tao. Kayo ang aking sandigan, kaya magaan ko na ring nalulutas ang aking mga problema. Agad akong sumasangguni sa inyo para hindi na magtagal ang problema ko. Maraming salamat sa inyo, Sister, dahil kung wala kayo, marahil ay winakasan ko na ang aking buhay ko.

Ang isasangguni ko sa inyo ngayon ay ang problema ko sa aking pamilya. Gusto ko kasing magtrabaho sa abroad para umasenso naman ang buhay namin, pero ayaw akong payagan ng mister ko, gayundin ang dalawa naming anak.

Hindi na kami makaahon sa hirap dahil mahina ang loob at tamad ang mister ko. Takot siyang makipagsapalaran sa anumang pagkakakitaan, kaya naisip ko na ako na lang ang kikilos para umunlad naman kami sa buhay.

Sister, ano ang gagawin kong pagkumbinsi sa asawa at mga anak ko para pumayag sila na magtrabaho ako sa abroad? Mayroon na akong employer sa Japan at hinihintay na lang ang pagdating ko.

Nagpapasalamat,

Lerma ng Bataan

Sa iyo, Lerma,

Hindi ko maiaalis sa iyo kung gusto mong magtrabaho sa abroad para umunlad ang buhay ng iyong pamilya, lalo pa’t ang sabi mo ay tamad at mahina ang loob ng asawa mo para makipagsapalaran sa buhay. Ipinapayo ko na mag-isip ka muna nang mabuti. Maraming nag-abroad ang hindi naman yumaman, bagkus ay nawasak pa ang pamilya dahil nagkaroon ng third party — nangaliwa ‘yung asawang iniwan o ‘yung nag-abroad ang kumaliwa dahil hindi nakatiis sa pangangailangang sekswal, gayung ang sabi mo ay sa Japan ka pupunta.

Marami akong kilala na pagdating ng Japan, hindi ‘yung trabahong inaasam-asam ang naging trabaho kundi naging sex slave ng mga Hapon at iba pang banyaga ru’n. Wala na silang magawa dahil hindi na puwedeng umatras at tinatakot silang papatayin ‘pag hindi pumayag sa ipagagawa sa kanila. Gusto mo bang mangyari ‘yan sa buhay mo? Sa palagay ko ay hindi.

Dahil d’yan, makabubuting dito ka na lang sa Pilipinas dahil puwede ka pa ring umunlad at yumaman dito, basta madiskarte, masipag at matiyaga ka. Subukan mong magnegosyo kahit maliit, manghiram ka ng puhunan sa coop o anumang lending sa inyo na maliit ang interes. Makikita mo na makakaraos ka rin. ‘Yung iba nga, sari-sari store lang ang negosyo, pero ngayon ay grocery na at puwede ring maging supermarket kung matututunan ang tamang diskarte.

Isa pang halimbawa ng negosyong madaling kumita ay street food gaya ng tusok-tusok o ihaw. Tiyak na ubos agad ‘yan at tatangkilikin ng mga tao. Hindi mo na rin kailangang umupa ng puwesto dahil d’yan sa harap ng bahay n’yo ay puwede mo nang umpisahan. Oh, ‘di ba?

Huwag kang mag-alala, yayaman at uunlad ka rin, matutupad ang pangarap mo, basta pursigido kang makamit ang mga ito sa tulong na rin ng Diyos.

Sumasaiyo,

Sister Isabel del Mundo