Asar sa mga ka-church na chismosa at inggitera

ni Sister Isabel del Mundo - @MgaKuwentongBuhayatPag-ibig | October 24, 2022

Dear Sister Isabel,

Nawa’y nasa mabuti kayong kalagayan sa sandaling mabasa n’yo ang problemang isasangguni ko.

Gusto ko sanang manahimik sa bahay at umiwas sa magulong mundo, pero ang hirap gawin. Nagse-serve ako sa simbahan, pero napapansin ko na karamihan sa taong simbahan ay plastik, mapagkunwari, astang maka-Diyos, pero paglabas ng simbahan ay puro ‘Marites’ naman at puro tsismisan ang ginagawa at parang hindi galing sa simbahan. Ang mahirap pa, karamihan ay pinupuna ang kamalian ng iba pero, ang sarili niyang pagkakamali ay hindi niya nakikita.

Bakit kaya hindi na lang siya magpokus sa kanyang sarili at pag-ukulan ng pansin kung ano pa ba ang dapat ituwid sa pagkatao niya — may dapat bang baguhin para sa ikabubuti ng kapwa, may nasasagasaan ba siyang ibang tao, may nasasaktan bang damdamin nang hindi niya alam?

Nasabi ko ito dahil madalas akong mabiktima ng ganitong klase ng sitwasyon. Madalas akong pagtsismisan at kainggitan ng kapwa ko. Gayundin, muntik ko nang masapak ang taong ‘yun, pero nanaig ang pagiging maka-Diyos ko at hindi ko siya pinatulan, sa halip, tinalikuran ko at umuwi na lang ako. Ipinagdasal ko na lang din sa Diyos na hawakan ang puso ng mga tsimosang ito, tumigil na sa pagtsitsismisan at paninira sa kapwa nang wala namang basehan.

Kahit sobra akong nasasaktan na pinagtsitsismisan at kinaiinggitan ako, hinding-hindi ko sila papatulan. Bagkus, ipapaubaya ko na lang sa Diyos ang lahat, tama ba ako, Sister Isabel?

Nagpapasalamat,

Lerma ng Iba, Zambales

Sa iyo, Lerma,

Hanga ako sa iyo dahil nagawa mong magtimpi sa paninira at pagkainggit ng iyong kapwa sa pagkatao mo, gayung taong simbahan pa naman sila. Sa palagay ko ay tama ka, hindi mo dapat patulan ang mga ‘yan at hindi ka dapat bumaba sa level nila. Mas nakakaunawa ka at hindi basta pumapatol sa mga taong tsismosa at mapanira.

Gayunman, ipagdasal mo na lang sila na magbago na, tumahak sa landas ng pagpapakabanal, walang nasasagasaang kapwa, at walang nasasaktan na damdamin.

Diyos na ang bahala sa kanila dahil Siya ay makatarungan at alam Niya kung sino ang tama at mali. Dinidinig Niya ang dasal ng bawat lumalapit sa Kanya at nagpapakabanal.

Sabi nga, God hears, God listens and God cares, ituloy mo lang ang pagiging maka-Diyos mo. Patuloy kang umunawa sa mga kahinaan ng kapwa mo at ipagdasal na sila ay magbago, maliwanagan ang isipan at sa tamang landas dumaan.

Lakip nito ang dalangin na patuloy kang pagpalain ng Diyos sa iyong buhay. Ang walang hanggang pagpapala at mga biyaya ng Dakilang Lumikha ay sumaiyo nawa.

Sumasaiyo,

Sister Isabel del Mundo

Single mom na ubos ang mana at nahaharap pa sa demanda

ni Sister Isabel del Mundo - @MgaKuwentongBuhayatPag-ibig | October 17, 2022

Dear Sister Isabel,

Kakamatay lang ng tatay ko at ang sabi ng mga kapatid ko, ako na ang mag-asikaso ng death benefits na makukuha naming magkakapatid. Pero dahil pahirapan, hindi ko ma-claim at nagpresinta ang kapatid ko siya na ang mag-aasikaso. Bagama’t may nakuha kami, napakaliit ng ibinigay sa akin dahil binawas niya raw ang dati kong mga utang sa kanya.

Nagulat ako dahil ang alam ko ay bukal sa loob na tulong ‘yung ibinibigay niya sa akin nu’ng panahong gipit ako, pero hindi, bagkus, utang pala ‘yun. Sa liit ng namana ko, naubos din ito agad.

Samantala, may isa akong anak, pero malayo sa ama niya dahil may asawa ang tatay ng anak ko. Paminsan-minsan lang siya kung tumulong sa amin. Nadagdagan pa ang problema ko dahil nag-away kami ng katulong ko nang sinaktan niya ang anak ko. Special child ang anak ko, kaya sa tindi ng galit ko, siya naman ang sinaktan ko.

Hinawakan ko siya sa braso, pero nagkapasa pala, kaya idinemanda niya ako. Matagal ko na rin siyang pinapaalis, pero ayaw niya namang umalis.

Hindi ko na alam ang gagawin, kaya sana ay mabigyan n’yo ako ng kaukulang payo.

Nagpapasalamat,

Divina ng Camarines Sur

Sa iyo, Divina,

Lakasan mo ang iyong loob at maging matatag ka sa kalagayan mo ngayon dahil lahat ng problema ay may kalutasan. Lahat ng bagay ay dadaan at lilipas, kaya tiyak na matatapos din ang problemang dinaranas mo sa kasalukuyan.

Sa palagay ko, malaki ang pag-asa mong manalo sa kaso dahil ang sabi mo ay matagal mo nang pinapaalis ang katulong mo, pero ayaw namang umalis, samakatuwid, mabait kang amo, kaya ayaw niyang umalis sa poder mo.

Natural lang naman na sa tindi ng galit mo ay nasaktan mo siya. Kahit sino’ng ina ay magagalit at makakagawa ng hindi kanais-nais kung makikitang minamaltrato ang anak niya na may special needs. Ang sabi mo ay hindi naman matindi ang paghawak mo sa braso niya. Naniniwala akong malulusutan mo ang demanda sa iyo ng katulong mo at aayon sa iyo ang hatol ng hukom.

Kaya huwag ka nang mag-aalala, ipanatag mo ang iyong isipan at taimtim na magdasal sa Diyos na kataas-taasan. Siya ang makapangyarihan sa lahat at alam Niya kung sino ang tama at mali.

Manalangin ka sa Kanya nang buong taimtim at tiyak na ikaw ay Kanyang diringgin.

Sumasaiyo,

Sister Isabel del Mundo

Bf na anak ng Koreanong boss, inilayo dahil tutol ang parents

ni Sister Isabel del Mundo - @MgaKuwentongBuhayatPag-ibig | October 12, 2022

Dear Sister Isabel,

Dati akong overseas Filipino worker sa Korea. Na-in love ako sa anak ng boss ko at in love rin siya sa akin, tapos nalaman ng amo ko na may relasyon kami at tutol siya dahil binata ang anak niya, habang ako ay biyuda at may isang anak.

Dahil d’yan, inilayo ng boss ko ang anak niya at ipinadala sa China upang mag-manage ng business nila ru’n. Bawal pala sa mga Koreano ang mag-asawa ng biyuda ang isang binata, kaya sa kabila ng pagtutol niya, walang nagawa ang boyfriend ko kundi sundin ang mga magulang niya.

Labis akong nalungkot at para akong masisiraan ng bait. Hindi ko alam ang gagawin dahil nasesante ako sa trabaho at pinauwi na rito sa Pilipinas.

Nawa’y matulungan n’yo akong hilumin ang sugat sa aking puso. Kailangang-kailangan ko ang payo n’yo, gayundin ang mabubuting salita para makayanan ang sinapit ko.

Nagpapasalamat,

Badette ng Caloocan City

Sa iyo, Badette,

Kung hindi ukol, hindi bubukol, ibig sabihin, kung hindi siya ang nakatakda sa iyo, tanggapin mo ito nang maluwag sa kalooban mo. Darating din sa takdang panahon ang katapat mo at kahit hindi mo hanapin, kusang darating ang itinakda sa iyo ng kapalaran.

Dahil d’yan, huwag ka nang malungkot, bagkus, harapin mo nang may buong tatag at buong tapang ang pagsubok na ‘yan sa iyong buhay. Liligaya ka rin sa takdang panahon, gayundin, natitiyak ko na matatagpuan mo ang katapat ng iyong puso na siyang magiging kaagapay mo habambuhay.

Pagpalain ka nawa ng Dakilang Kataas-taasan.

Sumasaiyo,

Sister Isabel del Mundo