Worried sa utol na nilayasan ng misis

ni Sister Isabel del Mundo - @MgaKuwentongBuhayatPag-ibig | November 2, 2022

Dear Sister Isabel,

Ang problemang isasangguni ko sa inyo ay tungkol sa kuya ko at misis niya dahil dumadaan sila sa matinding pagsubok bilang mag-asawa. Nag-away sila dahil sa matinding selos ng kuya ko dahil may ibang lalaki raw ang misis niya, kaya lumayas ang hipag ko at hanggang ngayon ay hinahanap pa rin namin. Nag-aalala kami dahil baka may nangyari nang masama sa kanya. Gayundin, naaawa na ako sa kuya ko at sa dalawa nilang anak.

Sa katunayan, isang taon na lang ay ga-graduate na sa pagkapari ang kuya ko, pero hindi siya nakapasa sa huling pagsubok sa kanya. Nag-asawa siya at nagpakasal sila ng hipag ko.

Ano ang gagawin namin para makatulong sa problemang sinapit ng kuya ko at misis niya?

Sa palagay n’yo ba ay babalik pa ang hipag ko? Sana ay mabigyan n’yo ako ng nararapat na payo sa problemang idinulog ko sa inyo. Isang compound lang ang tinitirahan namin, kaya apektado kami sa problema ng kuya ko. Hihintayin ko ang payo n’yo.

Nagpapasalamat,

Gina ng Mandaluyong City

Sa iyo, Gina,

Sa palagay ko ay hindi n’yo talaga makikita ang hipag mo at hindi niya na gugustuhin pang bumalik sa kuya mo kung pinagbibintangan siyang may ibang lalaki. Natural lang na awayin siya ng kuya mo dahil marahil ay napatunayan niyang totoo ang hinala niya.

Sa ganyang sitwasyon, minabuti ng hipag mo na umalis at tuluyan na siyang iwan. Sa palagay ko ay pumunta siya sa lugar na hindi mahahanap ng kuya mo. Hindi siya missing gaya ng inaakala n’yo, kaya ipanatag n’yo na ang inyong loob.

Ang pinakamabuti n’yong magagawa ngayon ay ipagdasal na kumalma ang puso ng bawat isa. Huwag talunin ng galit at selos ang isipan ng kuya mo. Habang ang hipag mo, nawa’y ‘wag siyang maghangad ng material desire o kayamanan sa pamamagitan ng pagpatol sa ibang lalaki. Alalahanin nila ang sinumpaan sa simbahan nang sila’y ikinasal na magsasama sa hirap at ginhawa.

Sabi nga, lahat ng problema ay may kalutasan dahil walang permanente sa mundo. Naniniwala ako na sa pamamagitan ng sama-sama n’yong pagdarasal para sa kuya mo, hindi magtatagal ay magkakaroon ng kalutasan ang inyong problema. Magiging maayos na muli ang pagsasama nilang mag-asawa.

Tandaan, strong faith in God is the solution. Magtiwala kayo sa Diyos dahil Siya ang kikilos upang liwanagin ang isipan nilang dalawa. Magtiyaga lang kayo sa pagdarasal dahil babalik din sa normal ang lahat.

Sumasaiyo,

Sister Isabel del Mundo

Bff na nag-suicide, nagpaparamdam

ni Sister Isabel del Mundo - @MgaKuwentongBuhayatPag-ibig | October 31, 2022

Dear Sister Isabel,

Ang isasangguni ko sa inyo ay tungkol sa best friend ko. Nag-suicide siya, isang linggo na ang nakakalipas. Hindi niya kinaya ang mga dagok ng buhay dahil 17-anyos pa lang siya at may asawa at anak na isang taon pa lang. Sobra siyang na-depress dahil masyado pa siyang bata para pasukin ang buhay may asawa. Marahil ay hindi niya alam na ang pag-aasawa ay para lamang sa mga nasa hustong gulang at wastong kaisipan na para sagupain ang mga pagsubok sa buhay. Gayundin, hindi niya naisip na ang pag-aasawa ay hindi parang kanin na isusubo na iluluwa ‘pag napaso.

Sa ngayon ay pinaglalamayan pa siya at nagparamdam ang kaluluwa niya sa akin. Nasabi ko ito dahil amoy gumamela ang kuwarto ko at ramdam ko na nasa paligid lamang siya, kaya kinilabutan at natakot ako, pero nilakasan ko ang aking loob at kinausap ko siya. Sinabi ko na hanapin na niya ang kaliwanagan dahil wala na siya sa mundo at nasa kabilang daigdig na siya. Sinabi ko rin na mas mabuti ru’n dahil walang gutom, uhaw at problema. Gayunman, patuloy siyang nagpaparamdam.

Ano ang dapat kong gawin para tuluyan nang matahimik at makarating ang kaluluwa niya sa langit sa piling ng mga anghel at makapangyarihang Diyos?

Nagpapasalamat,

Joanne ng Davao

Sa iyo, Joanne,

Tama ang ginawa mo na kinausap siya. Ipinapayo ko na ipagdasal mo ang kaluluwa niya at magpamisa ka para sa katahimikan niya. Magtirik ka rin ng kandila sa iyong altar at ipagdasal ang kanyang kaluluwa. Makakatulong ito upang hanapin na niya ang daan patungo sa kaliwanagan at huwag siyang manatili sa mundo kung saan puwede siyang maging kaluluwang ligaw o lost soul na pagala-gala sa mundong ibabaw at hindi alam ang patutunguhan habang patuloy na ginagambala ang mga naiwan niyang mahal sa buhay.

Ang pagdarasal tungkol sa kanyang kaluluwa ay hindi lamang para sa ikatatahimik niya. Makakatulong din ito upang marating niya nang mas magaan at walang sagabal ang landas patungo sa langit. Sabihin mo rin sa naiwan niyang pamilya na sunugin ang lahat ng mga gamit, damit at ang lahat ng bagay na konektado o masyadong attached sa kanya noong nabubuhay pa siya dahil maaaring sumanib pa siya sa mga bagay na nabanggit. Hindi niya magi-give up ang mga ‘yan, lalo na ang mga damit na gustong-gusto niyang isuot noong buhay pa siya. Gayundin, huwag n’yong ipamigay o ibenta sa ukay-ukay ang mga damit dahil kapag isinuot ito ng nakabili, magpaparamdam siya. Posibleng hilain niya ang manggas o laylayan ng damit. ‘Yan ang hiwaga ng kaluluwa na ayaw pang umalis sa mundo.

Muli, prayer is the key. Ipagdasal mo ang katahimikan ng kanyang kaluluwa at magpamisa ka. Magtirik ka ng kandila habang nagdarasal. Sabihin mo rin sa pamilya niya na magdasal nang siyam na araw para sa kanyang kaluluwa at pagdating ng ika-40 araw, magpadasal pa rin at maghanda ng kaunting salo-salo. ‘Pag mas maraming nagdarasal para sa kanya, mas makakatulong upang magaan niyang tahakin ang landas tungo sa kalangitan sa piling ng Kataas-taasang Diyos at muli ring babalik sa kanya sa takdang panahon.

Sumasaiyo,

Sister Isabel del Mundo

Pang-aabuso ng ampon na kuya, gusto nang matigil

ni Sister Isabel del Mundo - @MgaKuwentongBuhayatPag-ibig | October 26, 2022

Dear Sister Isabel,

Gusto kong humingi ng payo sa inyo tungkol sa kuya ko. Hindi ko siya tunay na kapatid dahil inampon lamang siya ng mga magulang ko.

Ang problema, may pagnanasa siya sa akin at kapag kami lang ang naiiwan sa bahay, hinihipuan niya ako sa maselang parte ng aking katawan, ngunit hindi ako makapalag dahil tinatakot niya ako na may masamang mangyayari sa akin ‘pag nagsumbong ako sa mga magulang namin. Sinasabi niya na papatayin niya ako at magpapakamatay din siya.

Minsan ay sinasadya kong hindi umuwi sa amin at nagdadahilan ako sa parents ko na may group project kami, kaya ru’n muna ako natutulog sa bahay ng kaklase ko, pero sa totoo lang ay natatakot ako na baka hindi lang panghihipo ang gawin niya at mabuntis ako nang hindi inaasahan.

Sister, walang nakakaalam ng sitwasyon ko kundi kami lang ng kuya ko. Natatakot akong magsumbong dahil sa banta niya na may masamang mangyayari sa akin kung magsusumbong ako. Tulungan n’yo ako, Sister Isabel, dahil hindi ko na talaga alam ang gagawin.

Nagpapasalamat,

Digna ng Pampanga

Sa iyo, Digna,

Nakikisimpatya ako sa problema mo dahil napakahirap at napakadelikado ng sitwasyon mo ngayon. Ipinapayo ko na sabihin mo sa teacher mo ang nangyayari sa iyo dahil siya ang bahalang kumausap sa mga magulang mo para mailagay sa tama ang lahat at matulungan ka sa dinaranas mo ngayon bago pa mahuli ang lahat.

Naniniwala ako na mauunawaan ng mga magulang mo ang iyong problema at sa lalong madaling panahon ay ilalayo nila sa iyo ang kuya mo. Gayunman, ihanda mo ang iyong sarili sa susunod na mangyayari. Hingin mo rin ang tulong ng Diyos at magdasal ka nang taimtim na palagi ka Niyang protektahan at iligtas sa lahat ng panganib at kapahamakan.

‘Ika nga, lahat ng problema ay may kalutasan. Natitiyak ko na matatapos na ang problema mo at mailalagay na sa tama ang lahat.

Sumasaiyo,

Sister Isabel del Mundo