‘Di ma-take na crush ng bff na tibo, todo-iwas na

ni Sister Isabel del Mundo - @MgaKuwentongBuhayatPag-ibig | December 7, 2022

Dear Sister Isabel,

Isa ako sa mga tagasubaybay ng kolum n’yo at gusto kong humingi ng payo sa inyo ang tungkol sa kaibigan ko.

Mag-best friend kami mula pagkabata, kaya batid kong babaeng-babae siya, pero nagtaka ako nang bigla siyang nagbago at parang naging tomboy. Palagi siyang nakadikit sa akin at parang tsinatsansingan ako, kaya tinanong ko kung tomboy ba siya, tahasan siyang sumagot ng “Oo” at in love raw siya sa akin. Nagulat at nabigla ako sa tugon niya. Mula noon ay umiwas na ako sa kanya dahil nandidiri ako sa pagiging tomboy niya, ngunit labis siyang nalungkot. Kinausap niya ako at nagbantang magpapakamatay kung tuluyan ko na siyang lalayuan.

Natatakot ako na ituloy niya ang sinabi niya na magpapakamatay siya kung tuluyan ko na siyang lalayuan. Ano ang dapat kong gawin? Sana ay mapayuhan n’yo ako bago mahuli ang lahat.

Nagpapasalamat,

Brenda ng Bataan

Sa iyo, Brenda,

Sa biglang tingin ay napakabigat ng problema mo, subalit kung talagang gagawan mo ng paraan upang malunasan ay tiyak na malulusutan mo ang problemang ‘yan tungkol sa kaibigan mo na noon ay babaeng-babae, pero naging tomboy kalaunan.

Ganito ang gawin mo, magpaalam ka na magtatrabaho ka sa abroad, pero sa totoo lang ay lilipat ka ng tirahan. Umalis ka muna sa lugar n’yo, magbakasyon ka muna sa malayong probinsya na hindi ka niya masusundan. Sabihin mo rin sa mga magulang mo ang tungkol sa best friend mong ‘yan kaya lalayo ka muna. Batid kong mauunawaan ka nila.

Sa ganyang paraan, tiyak na ibabaling ng best friend mo ang atensyon niya sa iba dahil wala ka na. Kumbaga, maghahanap siya ng kapalit mo hanggang sa tuluyan ka na niyang makalimutan. Pagbalik mo sa lugar n’yo, may mahal na siyang iba. Ganyan lang naman ‘yan, hahanap at hahanap siya ng ibang mapagbabalingan ng kanyang nararamdaman, at dahil hindi ka na niya makita, ibabaling na niya sa iba ang damdamin niya.

Hanggang dito na lang. Sumaiyo nawa ang pagpapala ng Dakilang Lumikha.

Sumasaiyo,

Sister Isabel del Mundo

70-anyos, takot magpakasal sa foreigner bf

ni Sister Isabel del Mundo - @MgaKuwentongBuhayatPag-ibig | December 5, 2022

Dear Sister Isabel,

Isa akong biyuda. May foreigner akong nakilala sa Facebook, 72-anyos na siya at isang Muslim. Mabilis ang mga pangyayari dahil dalawang buwan lang kaming magkakilala, pero ramdam namin na mahal namin ang isa’t isa. Dahil d’yan, gusto niya akong puntahan dito sa Pilipinas. Nagpahanap din siya ng bahay at nakakita naman ako agad. Maganda ang nakita kong bahay dahil fully furnished at nasa isang exclusive subdivision pa. Balak niya akong pakasalan pagdating dito at du’n na kami titira sa bahay na nakita ko.

Ang problema ko, tiyak na hindi papayag ang mga anak ko dahil 70-anyos na ako, gayundin, kahit pa mas bata akong tingnan kaysa sa edad ko. Isa pa, naisip ko na permanenteng relasyon ‘yun at hindi biro kung mag-aasawa ako ulit. Kahit pa nanghihinayang ako sa bahay na binili niya, parang gusto kong umatras sa napagkasunduan namin na magpapakasal dito at magsama sa iisang bubong.

Natatakot kasi ako na baka hindi siya maging mabuting asawa. Ano ang dapat kong gawin?

Nagpapasalamat,

Donita ng Tarlac

Sa iyo, Donita,

Nasa iyo na ‘yan, kung inaakala mong kaya mo pa ang buhay may asawa, bakit hindi? Ang sabi mo ay ramdam ng bawat isa sa inyo na umiibig kayo sa isa’t isa, hindi naman siguro masama na sundin n’yo ang tibok ng inyong puso. ‘Ika nga, age doesn’t matter when it comes to love. Hindi tumatanda ang puso, kaya bakit mo ipagkakait sa iyong sarili ang lumigaya kang muli sa pag-ibig?

Sa palagay ko ay mahal na mahal ka ng lalaking ‘yun dahil binilhan ka agad ng house and lot at pakakasalan ka pa. Para ka nang tumama sa lotto niyan, hindi ba? Huwag mo nang palampasin ang magandang kapalaran na dumating sa buhay mo nang hindi inaasahan. Huwag kang matakot na sundin ang tibok ng puso mo. Sumige ka at taos-pusong dumalangin sa Diyos na patnubayan ang muli mong pag-aasawa sa piling ng isang foreigner.

Sumaiyo nawa ang basbas ng Dakilang Lumikha.

Sumasaiyo,

Sister Isabel del Mundo

Minamanyak ng bayaw pero takot magsumbong sa mister

ni Sister Isabel del Mundo - @MgaKuwentongBuhayatPag-ibig | November 28, 2022

Dear Sister Isabel,

Isang mapagpalang araw ang bati ko sa inyong lahat d’yan sa BULGAR.

Ang problemang idudulog ko sa inyo ay tungkol sa bayaw ko na nakikitira sa amin.

Nagtatrabaho siya malapit sa lugar namin, kaya pinatira ng kuya niya sa aming bahay.

Napapansin ko na kapag hindi nakikita ng asawa ko ay kakaiba ang tingin niya sa akin at pakiramdam ko ay para akong hinuhubaran dahil grabe siya kung makatingin. Nang minsang pareho kaming nasa kusina, dinikitan niya ako at halos matsansingan na ako sa maselang bahagi ng pagkababae ko. Umiiwas na ako, pero dumadalas ang ginagawa niyang ito at kunwari ay hindi niya sinasadya.

Hindi ko naman siya maisumbong sa asawa ko dahil mainitin ang ulo niya at baka kung ano pang masama ang gawin sa kanya.

Ano ang dapat kong gawin, Sister Isabel? Sana ay mapayuhan n’yo ako.

Nagpapasalamat,

Jenny ng Malabon City

Sa iyo, Jenny,

Makabubuting kausapin mo ang bayaw mo at sabihin na igalang niya ang pagkababae mo bilang hipag niya at kung hindi ay mapipilitan kang magsumbong sa kuya niya.

Sabihin mo na hindi porke hindi ka nagre-react ay gusto mo siya. Iparamdam mo rin na ayaw mo ng ginagawa niya at kung hindi pa rin siya titigil, sabihin mo na sa asawa mo ang ginagawa niya.

Pero sa palagay ko naman ay titigilan na niya ang ginagawa niya sa iyo sa sandaling kausapin mo siya nang masinsinan. Sa tingin ko ay sinusubukan niya kung gusto mo rin siya. Kaya kung papalag ka, malamang na titigil na rin siya. Hindi natin nilalahat, pero may mga ganyang lalaki.

Gayunman, kung maaari ay ikaw na lang ang gumawa ng paraan para hindi sya ma-attract sa iyo. Alalahanin mo na lalaki ang kasama n’yo sa bahay at bayaw mo pa. Nasa iyo ang ibayong pag-iingat upang hindi mawasak ang pagsasama n’yong mag-asawa.

Sumasaiyo,

Sister Isabel del Mundo