Asar sa kapitbahay na super-ingay at wa’ paki sa iba

ni Sister Isabel del Mundo - @MgaKuwentongBuhayatPag-ibig | December 19, 2022

Dear Sister Isabel,

Ang problemang isasangguni ko sa inyo ay tungkol sa mga kapitbahay ko.

Sobrang ingay nila, ang lakas-lakas ng boses kung mag-usap at madalas ay nagsisigawan pa. Magkalapit lang ang bintana namin sa kanila, kaya rinig na rinig namin ang ingay nila. Malakas din silang magpatugtog ng radyo at TV. Para silang manhid at walang pakialam sa damdamin ng kanilang mga kapitbahay.

Ano ang dapat naming gawin? Hindi naman namin sila masita dahil baka lalong mag-ingay at mang-away pa. Tahimik kaming tao at walang kaaway, lahat dito sa barangay ay kasundo namin at ayaw namin ng gulo. Sana ay mabigyan n’yo kami ng kaukulang payo.

Nagpapasalamat,

Dexter ng Caloocan City

Sa iyo, Dexter,

Daanin mo sa diplomasya, ibig sabihin, huwag mong awayin o sitahin. Bagkus, kausapin mo nang malumanay. Sabihin mo na kung maaari ay hinaan ang pagpapatugtog dahil may kasama ka sa bahay na nangangailangan ng ganap na katahimikan dahil may iniindang sakit at kailangang makatulog nang maayos. Siguro naman ay mahihiya sila kapag kinausap mo nang malumanay.

Sa ganyang paraan, pati pag-uusap nila ay gagawin na rin nilang hindi pasigaw at mag-iingat na silang mabulahaw kayo. Kung hindi sila magbabago at patuloy pa rin sa ugali nila, isumbong mo na sa barangay at sila ang bahalang makipag-usap sa kanila.

Sumasaiyo,

Sister Isabel del Mundo

Todo-alala dahil ‘di makontak ang bf na nasa Korea

ni Sister Isabel del Mundo - @MgaKuwentongBuhayatPag-ibig | December 14, 2022

Dear Sister Isabel,

Kumusta kayo? Sana ay palagi kayong nasa mabuting kalagayan, gayundin ang mga mahal n’yo sa buhay. Gusto kong humingi ng payo tungkol sa boyfriend kong nasa Korea.

Halos isang buwan na kaming walang komunikasyon, pero bago siya umalis, nangako siyang magpapakasal kami pagkatapos ng dalawang taon na kontrata niya.

Sa umpisa ay palagi kaming magkachat, pero bigla akong nawalan contact sa kanya. Gayundin, walang makapagsabi sa akin kung nasaan na siya ngayon. Nagtanong na ako sa agency niya, pero hinahanap pa rin daw nila ang boyfriend ko dahil hindi nila matukoy kung nasaan siya.

Ano ang dapat kong gawin? Nag-aalala na ako sa kanya, gayundin ang pamilya niya.

Nagpapasalamat,

Thelma ng Lucban, Quezon

Sa iyo, Thelma,

Makabubuting ireport n’yo na sa Philippine Embassy sa Korea ang pagkawala ng boyfriend mo. Malaki ang maitutulong nito upang matukoy nila kung nasaan siya. Huwag ka rin masyadong mag-alala dahil baka maapektuhan ang kalusugan mo at magkasakit ka pa.

Sa aking karanasan noong ako ay nasa abroad, karamihan du’n ay nakikipag-live-in nang palihim. Kakuntsaba nila ang mga kaibigang Pinoy na hindi makakarating sa Pilipinas ang pakikipag-live-in sa kapwa nila Pilipino. May asawa man o wala, ang usapan ay hanggang du’n lang, tapos pagdating sa Pilipinas ay dedma na. Siyempre, mahusay namang magtago ng lihim ang mga Pinoy, kaya may posibilidad na ganyan ang nangyari sa boyfriend mo.

Ang dapat mong gawin ay magdasal nang taimtim na kayo pa rin ang magkatuluyan at pakasalan ka niya sa kanyang pag-uwi kung matatanggap mo pa siya at ganu’n pa rin ang pagmamahal niya sa iyo sa kabila ng inyong pagkakalayo.

Kung may ibang dahilan bukod sa sinabi ko sa iyo, dasal pa rin ang makakatulong upang maligtas siya sa anumang panganib at kapahamakan.

Tumawag ka sa Diyos, magdasal ka nang buong taimtim at tiyak na diringgin Niya ang iyong panalangin.

Sumasaiyo,

Sister Isabel del Mundo

Misis na hirap mag-ipon, problemado dahil laging inaaway ng asawa

ni Sister Isabel del Mundo - @MgaKuwentongBuhayatPag-ibig | December 12, 2022

Dear Sister Isabel,

Gusto kong humingi ng payo sa inyo tungkol sa asawa kong OFW. Palagi niya akong pinagsasabihan na hindi ako marunong mag-ipon, gayung malaki raw ang padala niya. Hindi tuloy kami makapagpagawa ng sariling bahay at hanggang ngayon ay umuupa lang kami.

Sa totoo lang, eksakto lang ang padala niya at minsan ay kapos pa dahil sa hindi inaasahang pagkakasakit ng apat naming anak. Gayundin, lahat sila ay nag-aaral sa elementarya, at mag-isa akong nag-aaruga sa kanila, kaya hirap na hirap na ako.

Umuwi na siya rito sa Pilipinas at dito inabutan ng pandemic, kaya hanggang ngayon ay hindi pa siya makaalis at palaging sinasabi na hindi ako marunong humawak ng pera kaya hirap kami ngayon.

Pero ang totoo, sobrang matulungin siya sa mga kaibigan at kapag may nangutang ay nagbibigay siya agad, sa halip na huwag munang magpautang dahil balak naming magpagawa ng bahay.

Sa ngayon, sinuwerte kami dahil ‘yung house and lot ng kapatid kong nagtatrabaho sa abroad ay ipinaubaya na sa amin kaya may tinutuluyan kami, kaya wala rin siyang masabi.

Ano ang dapat kong gawin para tigilan na niya ang panunumbat sa akin na hindi ako marunong maghawak ng perang ipinadadala niya? Hanggang ngayon ay ako ang sinisisi niya sa aming kakapusan sa pang-araw-araw na gastusin.

Sister, sobrang sakit sa kalooban dahil palagi na lang ako ang mali. Nawa’y mapayuhan n’yo ako upang tigilan na ng asawa ko ang halos araw-araw niyang panunumbat. Hihintayin ko ang payo n’yo.

Nagpapasalamat,

Lourdes ng Camarines Sur

Sa iyo, Lourdes,

Huwag mo nang pansinin ang panunumbat ng asawa mo. Huwag ka ring makipagtalo dahil hahaba lang ang usapan at lalala ang mga pangyayari. Bagkus, lalo ka pang maging malambing sa kanya hanggang makaalis siyang muli at sa pabirong paraan, sabihin mo na suwerte siya sa iyo dahil hindi ka man nakaipon, may maayos kayong tinitirahan ngayon. Kapatid mo ang nagpahintulot at ipinaubaya ang bahay niya sa inyo. Higit pa sa sinusumbat niya sa iyong dahilan kaya hindi kayo makapagpatayo ng sarili n’yong bahay. Sa ganyang diskarte, maiisip niya na mali siya sa paninisi sa iyo tungkol sa maling paghawak mo ng perang ipinadadala niya.

Sa kabilang dako, matuto kang mag-ipon kahit P50 kada araw at maghulog ka sa alkansya. Sa isang buwan, may P1,500 ka na i-multiply mo sa isang taon na hindi pa siya umuuwi. Oh, ‘di ba, may maipapakita ka nang ipon sa kanya. Maliit na bagay lang ang problema mo na kayang-kaya mong gawin kung talagang gugustuhin mo. Iwasan mong makipagtalo dahil lalayo ang grasya sa mag-asawang hindi magkasundo. Panatilihin mo ang harmony sa inyong tahanan upang dumaloy ang mga biyaya at pagpapala.

Sumasaiyo,

Sister Isabel del Mundo