Todo-alala para sa anak na may taning ang buhay dahil sa cancer

ni Sister Isabel del Mundo @Mga Kuwento ng Buhay at Pag-ibig | January 16, 2023

Dear Sister Isabel,

Gusto kong magpasalamat sa inyo at muling humingi ng payo sa iba pang problema na dinaranas ko. Kung natatandaan n’yo, ako ‘yung nagtanong kung may alam kayong orasyon sa nawawalang bagay. Sinunod ko ‘yung orasyong ibinigay n’yo at bago matapos ang siyam na araw ay nakita namin ‘yung mga nawawalang OR. Maraming salamat dahil kung hindi namin nakita ‘yun, siguradong masususpinde kami ng kasama ko. Sa awa ng Diyos at sa tulong ng dasal sa Mahal na Poong Nazareno, mahimalang nakita namin ang mga nawawalang OR.

Samantala, gusto kong humingi ulit ng payo sa inyo tungkol sa anak ko na may cancer sa pancreas. May taning na ang buhay niya, pero hindi niya alam. Hirap na hirap na ang kalooban ko sa paglilihim sa kanya sa tunay niyang kalagayan. Patuloy din siyang namamayat at halos wala nang ganang kumain.

Sa palagay n’yo, tama ba ang aking ginagawang paglilihim tungkol sa kanyang kalagayan o mas makabubuting ipagtapat sa kanya ang katotohanan?

Sana ay mapayuhan n’yo ako kung ano ang dapat kong gawin.

Nagpapasalamat,

Lourdes ng Sampaloc, Manila

Sa iyo, Lourdes,

Mabuti naman at nakita na ‘yung hinahanap n’yong OR at sa awa ng Diyos ay tumalab ‘yung dasal na ibinigay ko sa iyo.

Tungkol naman sa problema mo sa anak mo, hindi mo nabanggit kung ilang taon na siya. Kung hindi na siya bata o nasa hustong gulang na, makabubuting sabihin mo sa kanya ang tunay niyang kalagayan. Sabihin mo sa ito sa malumanay na pananalita na may halong pagmamahal at pang-unawa. Sa palagay ko ay matatanggap niya, anuman ang kanyang marinig sa iyo.

Marami na ngayong cancer survivors kaya hindi siya dapat nawalan ng pag-asa. Huwag kang magsasawa sa pagdarasal at tiyak na malalagpasan niya ang taning sa kanya ng doktor. Ipaunawa mo sa kanya ‘yan. Hindi lahat ng may cancer ay namamatay sa takdang panahon dahil may nakakaligtas din at humahaba pa ang buhay nang higit sa inaasahan.

Sa kabilang dako, alagaan mo ang iyong sarili. Pag-ukulan mo ng pansin ang iyong kalusugan dahil baka ikaw naman ang magkasakit at lalo pang lumala ang mga pangyayari. Umasa kang ipagdarasal din kita at ang iyong anak na maysakit. Gagaling siya at magiging cancer free na.

Sumasaiyo,

Sister Isabel del Mundo

Dapat gawin para suwertehin sa bahay na may mga duwende

ni Sister Isabel del Mundo @MgaKuwentongBuhayatPag-ibig | January 9, 2023

Dear Sister Isabel,

Gusto kong malaman bakit ganito ang buhay ko? Kapag hinahanap ko ang isang bagay, nawawala sa paningin ko, gayung sigurado ako na nandito lang naman sa paligid ko ang bagay na ‘yun. Kapag hindi ko naman kailangan, kitang-kita ko at nakakalat lang dito. Bakit kaya ganu’n? Parang may hindi nakikitang nilalang dito sa kuwarto ko.

Sabi ng kapitbahay namin, siguro ay may duwende sa kuwarto ko. Naniniwala ba kayo sa duwende? Hihintayin ko ang sagot n’yo.

Nagpapasalamat,

Alfred ng Batangas

Sa iyo, Alfred,

Maraming salamat sa pagsangguni tungkol sa problema mo. Sa tanong mo kung naniniwala ako sa duwende, oo, naniniwala ako. Dahil dito mismo sa bahay ko may mga duwende at dahil may third eye ako, kitang-kita ko sila at iba’t ibang kulay nila. May puti, itim, berde, pula at brown.

‘Yung itim ay nananakit at kinukurot ang balat ko, kaya parang may pasa paminsan-minsan. ‘Yung pula naman ay may dual personality, minsan ay mabait at may pagkakataong salbahe. ‘Yung brown at berde ay nagtatago sa mga halaman o bato na kakulay nila, kaya hindi gaanong napapansin. ‘Yung puti ay mabait at nagbibigay ng suwerte.

Gaya mo, nakakatuwaan nila ako. Tinatago nila ‘yung mga bagay na mahalaga sa akin, pero nilalabas din naman agad, kumbaga, binibiro lang ako. Ang gawin mo, kaibiganin mo ang duwendeng nasa loob ng kuwarto mo. Maglagay ka ng pitong matamis na kendi na iba’t ibang kulay sa kuwarto, lalo sa lugar kung saan naglalagi ‘yung duwende. Puwede ring mabangong bulaklak dahil gustong-gusto nila ‘yan, kaya hindi ka na nila gagambalain kapag nagawa mo ‘yan. Bagkus, bibigyan ka pa nila ng suwerte at makikita mo na susuwertehin ka na sa buhay kapag nagawa mo ang mga nabanggit ko.

Gayundin, huwag mong aawayin o sisigawan ang duwende upang hindi magalit dahil kusa rin namang aalis ‘yan sa takdang panahon. Tumatagal sila sa isang lugar sa loob ng maraming taon. Pagkatapos nu’n ay kusa namang mawawala at lilipat sa panibagong lugar na gusto nilang tirahan.

Nawa’y naliwanagan ka sa mga sinabi ko tungkol sa duwende. Mapanatag nawa ang kalooban mo at magkaroon na ng kapayapaan ang iyong isipan.

Sumasaiyo,

Sister Isabel del Mundo

Orasyon para sa mga nawawalang bagay

ni Sister Isabel del Mundo @MgaKuwentongBuhayatPag-ibig | January 4, 2023

Dear Sister Isabel,

Magandang araw sa inyo. Gusto kong magpatulong tungkol sa problemang napasukan ko. Nadamay ako sa problema ng officemate ko dahil dalawa kaming na-assign sa mga official receipts (OR) ng kumpanyang pinapasukan namin. Ang problema ay nawawala ‘yung 5 ORs at hindi namin malaman kung bakit nawala, gayung kami lang ang nakakapasok sa opisina namin.

Isang linggo lang ang ibinigay sa amin para hanapin yung 5 ORs, at kapag hindi namin nakita ay ite-terminate kami.

May alam ba kayong orasyon para sa nawawalang bagay? Sana ay matulungan n’yo ako.

Nagpapasalamat,

David ng Bulacan

Sa iyo, David,

Sa aking pakiramdam ay nar’yan lang sa paligid n’yo ang kumuha ng mga ORs na nawawala. Anuman ang motibo niya ay hindi siya magtatagumpay sa masama niyang balak dahil parurusahan siya ng tadhana. Makabubuting makiramdam ka nang husto sa mga taong nakapaligid sa iyo.

Tungkol naman sa tanong mo kung may alam akong orasyon para makita ang nawawalang bagay, may alam akong dasal para makita ang nawawalang bagay. Nagdarasal ako nang taimtim sa Mahal na Poong Nazareno.

Ganito ang dasal ko, isang Ama Namin, Sumasampalataya; pagdating sa “Pinako”, huminto ka at idugtong mo, “Mahal na Poong Nazareno, makita ko nawa ang 5 OR na nawawala. Ibalik nawa ng kumuha,” nang tatlong beses, isang Ama Namin, Aba Ginoong Maria, Luwalhati sa Ama. Dasalin mo ‘yan nang siyam na araw at hindi lalagpas ang siyam na araw at makikita mo ang mga nawawalang OR dahil ibabalik na nu’ng kumuha.

Mabisa ang dasal na ‘yan, kaya subukan mo. Lakip nito ang dalangin na maibalik na ang mga hinahanap n’yo.

Sumasaiyo,

Sister Isabel del Mundo