Kaya wa' paki sa mga may ayaw sa relasyon nila…ELLEN AT DEREK, TANGGAP NA NG PAMILYA NG ISA'T ISA

ni Melba R. Llanera - @Insider | February 27, 2021

Hangga't maaari ay ayaw nang kumpirmahin ni Derek Ramsay kung ano ang tunay na estado ng relasyon nila ni Ellen Adarna, pero kung tatanungin kung may espesyal silang damdamin para sa isa't isa, 'di naman itatanggi ng Kapuso hunk actor.

Aminado rin si Derek na isa si Ellen sa mga dahilan kung bakit gumigising at natutulog siya na inspirado at masaya.

Ayon nga kay Derek, sa kabila ng kabi-kabilang pambabatikos na tinatanggap nila mula sa napakaraming bashers ay malinis ang kunsensiya nila ni Ellen dahil alam nila na pareho silang malaya at walang nasasaktang ibang tao.

Aniya pa, nangyari ang lahat nang 'di pinlano kundi kusa na lang.

Puring-puri rin ni Derek ang pagiging hands-on na ina ni Ellen at kung gaano ito kaasikaso sa anak na si Elias na 'di nakikita ng marami. 'Pag gising na raw si Elias ay gising na rin si Ellen para asikasuhin ang anak.

Sa tanong namin kung wife material ba ang aktres, agad naman kaming sinagot ni Derek na sa nakikita niyang pagmamahal at pag-aaruga ni Ellen sa anak ay magiging isa itong mabuting asawa.

Malapit din sa loob ng aktor si Elias dahil bukod sa mahilig talaga siya sa bata ay natutuwa si Derek sa pagiging bibo, ismarte at mabait ng anak ni Ellen.

Maganda rin ang pagtanggap ng pamilya at mga kaibigan ni Derek kay Ellen. Nakilala na rin ni Derek ang ina ng aktres sa pamamagitan ng video call at sa sandaling matapos lang ang pandemya ay balak nilang magbiyahe pa-Cebu para personal na makilala ang pamilya ng aktres.

Sa huli ay nagpasalamat si Derek sa mga taong nagmamahal at sumusuporta sa kanila ni Ellen.

Mapapanood ang kabuuan ng eksklusibong interview namin kay Derek sa Cinema News At Home Edition sa darating na March 5 sa Cinema One.

Dahil sa pag-amin ni Rica na ex ang aktor… NAKARAAN NI PIOLO KINA POPS AT ANGEL, NABUHAY ULI

ni Melba R. Llanera - @Insider | February 22, 2021

Inamin ni Rica Peralejo sa kanyang YouTube vlog nu’ng nakaraang Pebrero 19 na nagkaroon sila ng "no label relationship" ni Piolo Pascual.

Kahit hindi malinaw ang kanilang relasyon ay umabot din sila sa puntong pinag-usapan nila ang tungkol sa kasal.

May ilang netizens naman na nagbigay ng negatibong reaksiyon sa rebelasyon ng aktres sa kanyang vlog. May ilang nagsabi na may balak daw kayang magbalik-showbiz si Rica at gumagawa ulit ito ng ingay at ayon naman sa iba ay nag-iilusyon lang daw ang namahingang aktres.

Baguhan pa lang kami sa showbiz nang masaksihan namin ang closeness nina Piolo at Rica. May isang event nu’n na dumalo ang dalawa at nasaksihan din namin kung paano pinagbawalan at kinuha ng aktor ang sisindihan sanang sigarilyo ni Rica.

Magkatabi sila nu’n ni Piolo sa isang lamesa at nag-uusap nang ilabas ni Rica ang isang sigarilyo para sindihan pero kinuha ito ng aktor.

‘Di lang pumutok ang balita noon sa pagkakamabutihan nina Piolo at Rica, pero may bulung-bulungan na tungkol dito.

Ilan din sa mga sinasabing nagkaroon ng espesyal na relasyon noon kay Piolo ay sina Pops Fernandez at Angel Jacob.

Nakasama ng aktor si Pops sa A.S.A.P. samantalang si Angel naman ay sa ilang pelikula.

Depressed, tamad na tamad daw… RYZA, NAKATULALA LANG HABANG IYAK NANG IYAK ANG ANAK

ni Melba R. Llanera - @Insider | February 9, 2021

Sa kabila ng maraming netizens ang nakikisimpatya kay Ryza Cenon sa hirap na pinagdaraanan nito ngayon bilang ina, may ilan pa ring negatibo ang reaksiyon sa sitwasyon ngayon ng Kapamilya actress.

Nanganak nu'ng Oktubre 31, 2020 si Ryza courtesy of her non-showbiz partner na si Miguel Antonio Cruz. Aminado si Ryza na naranasan niya ang magkaroon ng post-partum depression kung saan pakiramdam niya noon ay tinatamad na siya sa buhay, nakatulala lang habang hinahayaan ang anak na si Night na umiyak nang umiyak.

Bukod sa hirap na dinanas sa pagle-labor ay kulang sa pahinga at tulog si Ryza dahil sa pagbabantay sa anak. Pero sa ngayon daw, medyo okay na siya.

Sa negatibong komento ng ibang netizens na mahirap talagang maging ina kapag hindi pa handa sa pisikal, emosyonal at pinansiyal na aspeto ang isang babae, bukod pa sa ilang nagsabi na may attitude problem diumano si Ryza, mas mabuti na 'wag na lang magbasa ng mga komento ang aktres. Baka makaapekto pa sa kanya ito lalo't sensitibo ang isang babae 'pag naging ina na.

Sa kabila ng pagkakaroon na nila ng anak ng live-in partner ay wala pa ring balak ang dalawa na magpakasal. Para kasi kay Ryza ay mas maganda na siguradung-sigurado na sila ng kapareha sa lahat dahil sila ng anak ang pinakamaaapektuhan kapag nauwi lang sa hiwalayan ang relasyon nila sa huli.