Galing Turkey… 2021 MS. AURA INTERNATIONAL ALEXANDRA FAITH, NAGPOSITIBO SA COVID

ni Melba R. Llanera - @Insider | November 15, 2021

Nagpositibo sa COVID-19 ang nanalong 2021 Ms. Aura International na si Alexandra Faith Garcia pagkatapos umuwi mula sa Turkey kung saan ginanap ang naturang international pageant.

Kuwento ni Faith, awtomatiko na ‘pag galing ka sa ibang bansa ay may 5-day quarantine ka.

Nu’ng ika-apat na araw ay nagpa-swab siya at nu’ng ika-limang araw ay lumabas ang resulta na positibo nga siya sa COVID-19 kaya diretso siya sa quarantine facility kung saan namalagi siya ng 10 araw.

Asymptomatic ang Ms. Aura International 2021 winner at naniniwala siya na baka false positive nga ang naging resulta niya. Pero para ‘di na makahawa sa iba ay pinili na lang niyang umiwas.

Ayon kay Faith ay mental health talaga ang tatamaan sa isang tao ‘pag nagpositibo sa COVID-19 pero itinuring niya ito na malaking hamon para higit siyang maging matatag, matibay at positibo sa buhay.

Si Faith ang kauna-unahang Filipina na nanalo bilang Ms. Aura International kung saan ‘di biro ang journey na pinagdaanan niya bago nanalo at naiuwi ang korona.

Kahit nga ang 5,000 dollars na napanalunan ay naubos na rin dahil sa mahal ng pamasahe papunta sa Turkey at pauwi ng bansa. Mabuti na lamang at ‘di materialistic na tao si Faith at sinigang ang una niyang hinanap pag-uwi ng bansa.

Labis din ang pasasalamat niya dahil ito na pala ang kahuli-hulihang pagkakataon na sumali at lumaban siya sa mga beauty contests dahil 28 yrs. old na siya ngayon at may age requirement ang mga sumasali sa beauty pageants.

Nasubukan na palang mag-extra ni Faith sa ilang pelikula gaya ng No Boyfriend Since Birth.

Nang tanungin namin kung sino kaya ang aktor na gusto niyang makapareha kung mabibigyan ng pagkakataon, agad niyang isinagot ang Kapamilya actor na si Gerald Anderson.

Nagkasama na sila noon sa isang brand ng sapatos na ineendorso ng aktor at kung saan siya naman ang ambassador. Naniniwala si Faith na magkakasundo sila dahil pareho silang triathlete bukod pa sa magkakilala na sila.

May limang taong non-showbiz boyfriend, siniguro naman ng 2021 Ms. Aura International na ‘di siya tutulad sa ibang beauty queens na nanalo lang ay nakipaghiwalay na sa mga karelasyon lalo't masaya at kuntento siya sa relasyon nila ng boyfriend.

Proud na gumanda naman… GIGI DE LANA, AMINADONG RETOKADA BYUTI!

ni Melba R. Llanera - @Insider | October 2, 2021

Isa sa mga pangalang pinag-uusapan at gumagawa ng ingay ngayon sa music industry ay si Gigi de Lana at ang banda nilang GG Vibes.

Unang pinag-usapan at nag-trending sa sariling rendition ng kantang Bakit Nga Ba Mahal Kita na unang pinasikat ni Roselle Nava, iba ang naging atake ni Gigi sa naturang kanta kung saan may bersiyon din ang ibang singers natin gaya nina Angeline Quinto, Jake Zyrus at iba pa.

Ang nakakatuwa kay Gigi, bukod sa maganda niyang boses ay ang pagiging totoo at prangka nito.

Nang tanungin ang singer kung ano ang isa sa pinakamatinding pamba-bash na natanggap na niya mula sa ilang netizens, nagkuwento ito na sinabihan siya ng isang basher na plastic na nga ang mukha niya ay plastic pa ang pagkatao at pag-uugali niya.

May nagsabi rin sa kanya na pangit siya at retokada kaya 'di na napigilang sagutin ni Gigi ang basher na gusto ba nitong magpagawa at ire-refer niya sa nagretoke sa kanya?

Kuwento ng singer ay mahusay ang doktor na gumawa sa kanya at 'di niya ikinahihiya na isa siyang produkto ng "salamat po, dok."

Kung ang iba ay ayaw umamin na nagparetoke, katulad ni Angeline Quinto ay walang pretensiyon si Gigi na aminin na may mga ipinabago siya sa mukha kung saan maganda naman talaga ang pagkakagawa at bumagay sa kanya.

Sa ganda ng boses, husay ng banda at malalim na samahan ng bawat isa sa grupo, naniniwala kami na malayo ang mararating ni Gigi at ng kanyang banda kung ipagpapatuloy at magiging pokus sila sa kanilang career at 'di magwawatak-watak na kadalasang kinauuwian ng mga sumikat na banda sa bansa.

Ex-GF, matagal na raw type ang singer... IÑIGO, SUPER-HAPI PARA KAY MARIS NA NAGING BF NA SI RICO

ni Melba R. Llanera - @Insider | June 28, 2021

"Of course I'm very, very happy for her," ang bungad na pahayag ni Iñigo Pascual nang hingin namin ang reaksiyon niya tungkol sa kumpirmado nang relasyon ngayon nina Maris Racal at Rico Blanco.

Dagdag pa ng dating kasintahan ni Maris, "Actually, alam ko kung gaano kasaya si Maris with Rico. I mean, she always love and admire Rico for a very, very long time. I am very happy for her.

"She's coming out with her music, may lalabas siyang kanta. Nakaka-proud kasi nakita ko si Maris na nag-i-struggle na hinahanap ang sarili niya or 'yung mga gusto niyang gawin.

"To see her blossoming into someone which she is now, and how she's really being herself in front of people, talagang nakakatuwa. Sobrang nakakatuwa," masayang pahayag pa ni Iñigo.

Bukod sa pagiging ex-sweethearts, nagkapareha rin sina Maris at Iñigo sa ilang proyekto kaya't nabuo ang tambalang MarÑigo, kung saan marami ang nalungkot sa kanilang mga tagahanga dahil 'di nagkatuluyan ang dalawa.

Sa tanong namin kung may komunikasyon pa ba sila sa ngayon ni Maris, inamin naman sa amin ni Iñigo na matagal na silang 'di nakakapag-usap at bilang respeto at para maiwasan na rin na maging "awkward" sila sa isa't isa ay mas mabuti na rin daw na 'wag na munang buksan ang komunikasyon sa pagitan nila.

Ayon kay Iñigo, buung-buo ang suporta niya para sa relasyon nina Maris at Rico at maligaya siya dahil alam niyang masayang-masaya ngayon si Maris.

Samantala, bukas din si Iñigo sa mga proyekto na pagtatambalan nilang muli ni Maris kung saka-sakaling may offer silang matanggap. Tiyak na ikatutuwa ito ng mga solid MarÑigo fans na hanggang ngayon ay nag-aabang pa rin sa balik-tambalan ng dalawa.

Tinanong din namin kung handa na ba siya sa pakikipagrelasyon kung saka-sakaling may dumating sa buhay niya ngayon.

Ipinaliwanag sa amin ni Iñigo na sa dami ng ginagawa niya sa kanyang career sa ngayon ay wala siyang oras para sa pakikipagrelasyon. Naniniwala rin ang singer-actor na 'pag siya ang pumasok sa isang relasyon, gusto niya ay seryosohan na at mauuwi na sa kasalan, kaya mas gusto niya na mangyari na lang ito sa tamang oras.

Kalo-launch lang ng international album ni Iñigo na may titulomg Options kung saan bukod sa mga sariling komposisyon, may mga nakapaloob ding komposisyon mula sa ilang songwriters mula sa Manila at California.

Tuwang-tuwa si Iñigo na napakinggan ang carrier single niyang Danger mula sa album na Options sa radio station na 102.7 KIIS FM sa Los Angeles, California, USA.

Kuwento sa amin ni Iñigo, sobra siyang natuwa rito dahil nu'ng nasa America pa pala siya nakatira ay ito na ang radio station na pinapakinggan niya.

Nakakabilib lang na sa kabila ng husay at talento sa pagkanta at pagsasayaw ay sumasailalim pa rin sa intensive training si Iñigo sa pagpe-perform na gaya ng training na ginagawa sa South Korea.