Medical at nursing studs, puwede nang COVID-19 vaccinators — CHED

ni Lolet Abania | November 14, 2021

Maaari nang maging bahagi ng programa ng pagbabakuna laban sa COVID-19 ang mga post-graduate o undergraduate interns, clinical clerks, 4-year medicine at nursing na mga estudyante, ayon sa Commission on Higher Education (CHED).

Sa ilalim ng Joint Memorandum Circular No. 2021-003 na inisyu ng CHED at ng Department of Health (DOH), ang mga naturang estudyante ay maaari nang mag-volunteer bilang health screeners, vaccinators, pre o post vaccination monitors sa superbisyon ng mga licensed physicians at nurses.

“The government is now fast tracking the vaccination rollout as more COVID-19 vaccines arrive in the country. As we increase the number of vaccination sites and increase daily targets, these additional vaccinators and support staff are critical to achieve herd immunity in the next two months,” ani CHED Chairperson Prospero De Vera III sa isang statement.

Una nang inanunsiyo ng gobyerno na ang National Vaccination Days ay isasagawa mula Nobyembre 29 hanggang Disyembre 1, na layong makapag-administer ng 15 milyong indibidwal.

Ayon sa CHED, itinutulak na nila ang isang school-based vaccination sa lahat ng malalaking pribado at pampublikong higher education institutions (HEIs) simula pa noong Oktubre na sa kasalukuyan ay mayroon nang 61 HEIs na nag-o-operate bilang vaccination centers.

“While more than one million college students have already been vaccinated, this is only about 30% of the target number. We need to rapidly vaccinate more students,” sabi ni De Vera.

Tiniyak naman ng commission sa mga estudyante na ang kanilang naging volunteer work at nakumpletong bilang ng oras ay naka-credit sa kanilang internship, at ito ay sertipikado ng head ng vaccination team sa partikular na vaccination site kung saan sila nagbigay ng serbisyo.

Ang boluntaryong partisipasyon ng mga naturang estudyante sa mga vaccination sites ay ipapatupad anumang risk classification ng lugar o alert level na itinakda ng Inter-Agency Task Force for the Management of Emerging Infectious Diseases (IATF).

Inatasan na rin ang lahat ng CHED regional offices na makipagtulungan sa HEIs na mayroong medicine and nursing programs para makapangalap ng mga student-volunteer vaccinators at makipag-ugnayan sa DOH at lokal na gobyerno upang mai-assign ang mga student volunteers sa iba’t ibang vaccination sites.

40 health workers ng St. Luke’s sa QC, nag-rally

ni Lolet Abania | August 30, 2021

Nagsagawa ng kilos-protesta ang maraming health workers mula sa St. Luke’s Medical Center (SLMC) sa Quezon City ngayong Lunes nang umaga dahil sa hindi pa pagbibigay ng kanilang COVID-19 benefits.

Tinatayang nasa 40 healthcare workers ang nagtipun-tipon sa labas ng SLMC sa Quezon City para hingin na ibigay na ang kanilang special risk allowance (SRA) at meal, accommodation, and transportation (MAT) allowance.

“Ang pakiusap namin sa publiko, humihingi kami ng suporta sa lahat kasi ‘yung ipinaglalaban namin dito, kapakanan din ng publiko,” ani SLMC QC Employees Association president Jao Clumia.

“‘Pag nawala na ‘yung ating mga healthcare workers, lalo na ‘yung mga nurses sa loob ng ospital… hindi kayo makakatapak diyan sa ER (emergency room), mamamatay kayo dahil wala na nga po, punuan na tayo,” dagdag niya.

Inaasahan din umano na ang mga health workers mula naman sa University of Santo Tomas (UST) Hospital at Lourdes Hospital ay magsasagawa rin ng katulad na protesta dahil sa hindi pagre-release ng kanilang benepisyo ngayong Lunes.

Higit 350 doktor at health workers sa Indonesia, nabakunahan na, nagka-COVID pa rin

ni Ronalyn Seminiano Reonico | June 18, 2021

Nagpositibo pa rin sa COVID-19 ang mahigit 350 doktor at medical workers sa Indonesia kahit nabakunahan na ang mga ito ng Sinovac.

Karamihan umano sa mga health workers ay asymptomatic at nagse-self-isolate sa bahay, ngunit ang ilan ay kinailangang i-admit sa ospital dahil sa mataas na lagnat at pagbaba ng oxygen-saturation levels, ayon kay Badai Ismoyo, head ng health office ng Kudus District sa Central Java.

Tumaas ang kaso ng COVID-19 sa Kudus dahil sa Delta variant at umabot na sa 90% ang bed occupancy rates sa mga ospital.

Noong Enero nagsimulang magbakuna ang Indonesia sa mga healthcare workers na priority group at ayon sa Indonesian Medical Association (IDI), karamihan sa mga ito ay nakatanggap ng Sinovac COVID-19 vaccine mula sa China.

Ayon sa public health experts, bumaba naman ang bilang ng mga healthcare workers na namatay sa COVID-19 noong Enero hanggang Mayo ngunit nababahala sila sa pagtaas ng kaso sa Java.

Saad ni Dicky Budiman, epidemiologist ng Australia Griffith University, "The data shows they have the Delta variant (in Kudus) so it is no surprise that the breakthrough infection is higher than before, because, as we know, the majority of healthcare workers in Indonesia got Sinovac, and we still don’t know yet how effective it is in the real world against the Delta variant.”

Samantala, nagpaalala naman sa publiko si Dr. Prijo Sidipratomo, radiologist ng Jakarta, na mag-ingat kahit pa nabakunahan na laban sa COVID-19.

Aniya pa, "It is alarming for us because we cannot rely on vaccinations only.”