Ospital, napupuno na sa dami ng COVID cases… Davao City, MECQ hanggang June 20

ni Mary Gutierrez Almirañez | June 4, 2021

Ilalagay ang Davao City sa modified enhanced community quarantine (MECQ) o mas mahigpit na quarantine classifications simula bukas, June 5 hanggang 20, dahil sa biglaang pagtaas ng COVID-19 cases.

Ayon sa naunang anunsiyo ng City Government of Davao sa kanilang Facebook page, “The City Government of Davao has requested the IATF-RTF to declare a Modified Enhanced Community Quarantine (MECQ) from June 5 to 30, 2021 to allow a circuit breaker in the surge of patients inside hospitals.”

Base naman kay Presidential Spokesperson Harry Roque, hanggang June 20 lamang ipatutupad ang MECQ sa Davao City, samantalang ang General Santos City nama’y ilalagay sa general community quarantine (GCQ) o mas maluwag na quarantine classifications hanggang sa katapusan ng Hunyo.

Sa ngayon ay malapit nang maging full capacity ang Southern Philippines Medical Center na pinakamalaking ospital sa Davao, dahil sa biglaang pagdami ng isinusugod na COVID-19 patients.

Base pa sa huling datos ng Department of Health (DOH), ang Mindanao ay nakapagtala ng 11,391 active cases ng COVID-19.

“All public transportation shall be permitted to operate. We need to help our frontliners by making sure that we stay home except for work or business,” dagdag naman ng City Government of Davao sa kanilang Facebook post.

May-ari ng Gubat sa Ciudad at bgy. chairman sa Caloocan, kinasuhan na

ni Ronalyn Seminiano Reonico | May 11, 2021

Pormal nang kinasuhan ang may-ari ng Gubat sa Ciudad public pool at ang chairman ng barangay sa Caloocan City na nakakasakop dito matapos mabuking ang operasyon nito sa kabila ng pagsasailalim sa NCR Plus sa modified enhanced community quarantine (MECQ).

Nagsampa sina City Health Officer Evelyn Cuevas at Business Permit and Licensing Office Head Emmanuel Emilio Vergara ng kasong administratibo laban kay Barangay 171 Chairman Romero Rivera dahil sa gross negligence of duty.

Pahayag naman ni Interior Secretary Eduardo Año, "Ang atin pong PNP at LGU ng Caloocan City ay nagsasagawa na ng pag-file ng kaso sa mga violators, kasama na po ang owner ng Gubat sa Ciudad Resort at ang pag-summon at pag-aresto sa barangay captain ng Barangay 171 sa Caloocan City sapagkat hindi niya naipatupad ang community health protocol."

Tinatayang aabot sa 300 katao ang involved sa naturang mass gathering na naganap sa resort.

Samantala, dahil sa insidente ay sinibak din sa puwesto ang commander ng Police Community Precinct Station 9 na si Maj. Harold Aaron Melgar, ayon kay Caloocan City Police Chief Col. Samuel Mina.

Si PLt. Ronald Jasmin Battala naman ang inatasan ni Mina na maging kapalit ni Melgar bilang bagong Station 9 commander.

Ipinag-utos din ni Mina sa lahat ng station commanders na magsagawa ng inspeksiyon sa mga nakatalagang areas of responsibility, maging sa mga business establishments.

TV cameraman na kinunan ang mga nag-swimming sa Gubat sa Ciudad, ginulpi

ni Lolet Abania | May 11, 2021

Nabiyak ang ilong at halos basag ang mukha ng isang television cameraman matapos na bugbugin ng tatlo umanong indibidwal na kabilang sa mga nag-swimming sa isang resort na ilegal na nagbukas sa gitna ng umiiral na modified enhanced community quarantine sa Caloocan City noong Linggo.

Agad na isinugod sa ospital ang biktimang si Arnel Tugade, cameraman ng isang television station, dahil sa tinamong matinding tama sa mukha makaraang pagtulungan umano ng tatlong lalaki.

Sa ulat, hawak ng biktima ang kanyang camera habang kinukunan ng video ang tinatayang 100 hanggang 200 katao na nag-swimming sa Gubat sa Ciudad sa Caloocan City.

Nang makita niya ang isang jeep na puno ng pasahero at marami na ring nag-uuwiang nagsipag-swimming, sinundan niya ito ng mga kuha ng video saka nangyari ang insidente.

“Nu’ng pag-zoom out ko, doon ko na nakita na pasugod na itong sumuntok sa akin. Hinawakan niya ‘yung lente ng camera ko sabay na jinab (jab) sa mukha ko,” ani Tugade.

“Wala na akong nagawa. Bale tatlo sila,” dagdag niya.

Kinilala ni Caloocan City Police Station chief Col. Samuel Mina, ang magkapatid na suspek na sina Dennis at Daniel Cawigan habang ang isa pang suspek ay agad na tumakas.

Depensa ng suspek na si Dennis, pinalo umano ni Tugade ng camera ang kapatid niya. Subalit, itinanggi ito ni Tugade.

“Puro sa mukha ‘yung puntirya nila… kaya biyak ‘yung sa ilong ko, sa mata hanggang sa baba ng ilong,” pahayag pa ni Tugade sa isang interview.

“Paglabas nila, kami ang nabungaran nila doon na may media. Kaya siguro iniisip nila, dahil sa media kaya naudlot ‘yung kanilang pagsaya doon… Actually, lahat ng nag-swimming doon, marami sila, sinisigawan kami, ‘Ayan, may media pa kasi,’” sabi pa ni Tugade.

Nakakulong na ang dalawang suspek at sumailalim sa inquest proceedings habang inihahanda ang isasampang kaso laban sa kanila.

Una rito, iniutos na ni Caloocan City Mayor Oscar Malapitan na isara ang Gubat sa Ciudad resort dahil sa ginawang pagbubukas nito kahit nasa ilalim pa ng MECQ ang Metro Manila.

Binawi na rin ng alkalde ang business permit at permit to operate ng nasabing resort habang nakatakdang sampahan ng kaso ang may-ari nito.

Samantala, iniutos ng Department of Health na i-quarantine ng 14 na araw ang mga dumagsa sa resort para mag-swimming na kinabibilangan ng mga bata at mga matatanda.