Presyo ng manok, tumaas

ni BRT | March 30, 2023

Tumaas ang presyo ng manok sa mga merkado, dahil umano sa mahal na patuka.

Batay ito sa datos na farmgate price mula sa United Broiler Raisers Association.

Mula sa P93 noong Pebrero, nasa P112 na ang farmgate price nitong Marso na nakaapekto sa retail price sa palengke na nasa P150 hanggang P200 kada kilo.

Kung tatanungin ang Department of Agriculture, ito ay dahil sa taas-presyo ng patuka.

Ayon pa sa DA, kakaiba ang pagtaas ng presyo ng manok dahil karaniwang bumababa ito sa unang quarter ng taon lalo na pagkatapos ng holiday season.

Umaasa naman na mag-stabilize ang presyo nito pagkatapos ng Semana Santa lalo't stable ang supply nito sa bansa.

DA at DTI, sanib-puwersa para sa presyo ng baboy

ni Lolet Abania | May 8, 2021

Inaasahang ilalabas ang suggested retail price (SRP) ng mga imported na baboy sa susunod na linggo, ayon sa Department of Agriculture (DA).

Sinabi ni DA Chief William Dar, kabilang ang mga senador, susuriin at susumahin nila ang presyo nito ayon sa napagkasunduang taripa.

Aniya, nakikipag-ugnayan na rin ang ahensiya sa Department of Trade and Industry (DTI) hinggil dito. “Well, ang presyo po base dito sa pinal na ibinaba na taripa, we are now making the calculations and we are doing this in tandem, in partnership with the DTI so, baka next week i-announce namin ang suggested retail price,” ani Dar.

Matatandaang nag-isyu si Pangulong Rodrigo Duterte ng executive order hinggil sa taripa ng mga imported na baboy. Subalit, ilang kongresista ang pormal na nagpasa ng resolusyon upang ipabawi ito kay Pangulong Duterte.

Gayunman, nagkasundo na ang DA at mga mambabatas sa ipinatupad na taripa sa dahilang maaaring makaapekto ito sa local hog industry.

Sinimulan ng pamahalaan ang pag-angkat ng imported na baboy sa kasagsagan ng pagdami ng kaso ng African swine fever (ASF) na labis na nakaapekto sa suplay nito sa bansa ng mga lokal na magbababoy.

Samantala, ayon kay Dar, posibleng bumuhos naman ang suplay sa bansa ng mga imported na isda, gulay at bigas habang sa ngayon ay sapat pa ang mga ito.