Una sa kasaysayan ng 'Pinas... Kampeon ang Phl Men's Curling Team sa 2025 Asian Winter Games sa China

ni MC / Maria Ysabella L. Matito (OJT) @Sports | Feb. 15, 2025

Photo: Itatala sa unang kasaysayan ng Pilipinas ang gold medal-winning team nina playing president Benjo Delarmente, Alan Frei, Enrico Pfister, Christian Haller at Mark Pfister sa Curling sa gabay nina Pilipinas secretary-general Jarryd Bello, Jessica Pfister at coach Miguel Gutierrez sa Ninth Asian Winter Games sa Harbin, China. (pocpix)

Kauna-unahan sa Pilipinas na makapag-uwi ng medalyang ginto mula sa Asian Winter Games nang ang pambato na PHL men's curling team ay nagkampeon kahapon, Valentine's Day.

Tinalo ng PHL team ang South Korea sa 5-3 puntos sa finals ng Harbin 2025 Asian Winter Games sa China. Binubuo ng magkapatid na Marc Pfister, Enrico Pfister, Alan Frei, at Christian Haller ang Curling Pilipinas na kasalukuyang World’s Rank 51 sa Men’s Curling.

“Gold medal for Team Philippines, and we expected ourselves to win. It is a great game, and we never doubt ourselves,” ayon sa 35-anyos na Filipino-Swiss Pfister na 26 na taon nang player ng curling.

“It’s not just only a medal, bronze or silver, but a gold.” Ang Curling Pilipinas ay dating kilala sa tawag na Curling Winter Sports Association of the Philippines, binubuo ang organisasyon na ito ng mga Pinoy na nakatira sa mga bansang United States, Canada at Switzerland.

Nangunguna ang Pilipinas sa puntos na 3-1 sa pang-apat na yugto ng laro ngunit naka-2 puntos ang South Korea dahilan para mag-tie ang dalawang koponan.

Umabante ang Curling Pilipinas matapos makuha ang 7-6 na pagkapanalo laban sa bansang Tsina sa semifinals ng laban. Kasunod nito ang pagkanalo ng grupo laban sa Japan sa 10-4 puntos sa semis qualifier.

Pangalawa ang Curling Pilipinas sa Group A na natapos sa round robin kung saan sila ay nakapuntos ng 3 panalo at isang talo. Matapos ang isang talo sa South Korea, nagsunod-sunod na ang pagkapanalo ng grupo laban sa Kazakhstan (4-1), Kyrgyzstan (12-2) at Chinese Taipei (11-3) dahilan para masungkit nila ang gold medal.

Nagwagi ng silver medal ang South Korea at bronze ang China. “This is too good to be true,” papuri ni Philippine Olympic Committee (POC) president Abraham “Bambol” Tolentino.

“Shocking, that’s the least I can say. Now, the path is clearer toward our first medal in the Winter Olympics.” Samantala, 4th place sina Isabella Gamez at naturalized Filipino-Russian Aleksandr Korovin sa mixed pair free skating competition (figure skating) sa HIC Multifunctional Hall.

One Silay pasok sa PNVF U-21 semifinals

ni MC @Sports News | Feb. 1, 2025

Photo: Umatake ng matinding spike si Carlo Laforteza ng Lingayen laban sa defenders na sina Vinmark Canoy at Anthony Munez ng ONE Silay sa laban nilang ito sa Philippine National Volleyball Federation (PNVF) Under-21 Championship National Men’s Division sa Ninoy Aquino Stadium. (pnvfpix)

Pormal nang pumasok ang One Silay sa semifinals nang talunin ang Lingayen sa isang makapigil-hiningang five-setter win, 21-25, 20-25, 25-17, 25-13, 15-12 kahapon sa Philippine National Volleyball Federation (PNVF) Under-21 Championship National Men’s Division sa Ninoy Aquino Stadium.

Makaraan ang mga pagkatalo sa opening at second set, sinikap ng volleyball players mula sa Negros Occidental na doblehin ang gawing pag-atake at higpitan pa ang kanilang depensa sa huling tatlong sets para umiskor ng kumpletong pagbawi sa Group A.

Tinapos ng One Silay ang preliminary round sa bisa ng 2-1 win-loss record sa torneo na suportado ng Akari, Philippine Sports Commission, Philippine Olympic Committee, Cignal, OneSports, OneSports+ at Pilipinas Live. Ang Lingayen sa kabilang banda na tumalo sa Volleyball Never Stop (VNS), 25-21, 20-25, 25-23, 25-23 ay tinapos ang preliminary round sa 1-2 record.

Ang tanging pagkatalo ng One Silay ay mula sa mga kamay ng top team ng Mindanao na Zamboanga City, 22-25, 21-25, 21-25 noong Huwebes. Ang Zamboanga City na kasalukuyang undefeated sa dalawang laro ay tiyak na rin sa kanilang silya sa semifinals.

Kuwalipikado na rin ang University of the East (UE), sa semifinal spot at wala ring talo sa Group B hawak ang 2-0 slate sa torneo na inorganisa ni PNVF President Ramon “Tats” Suzara, na siya ring Asian Volleyball Confederation (AVC) president at FIVB executive vice president.

Ang classification phase (No. 5 to  ay nakatakdang idaos ang laro ngayong Sabado simula ng 9 a.m., at 11:30 a.m. bago ang semifinal matches ng 2 p.m. at 4:30 p.m.

Olympic Committee hindi magpapahinga ngayong 2025

ni MC @Sports News | Jan. 9, 2025

Photo: Mula ngayong Enero 2025 hindi magpapahinga ang buong miyembro ng Philippine Olympic Committee (POC) Executive Board members na sina Atty. Wharton Chan, Dr. Jose Raul Canlas, Alvin Aguilar, Donaldo Caringal, Alexander Sulit, Ferdinand Agustin and Jessie Lacuna, Leah Gonzales, Al Panlilio, Mikee Cojuangco-Jaworski at Leonora Escollante sa pamumuno ni POC prexy Abraham “Bambol” Tolentino dahil sa sunud-sunod na international competition na lalahukan ng national athletes. (pocpix)

Inisa-isa na ni Philippine Olypic Committee (POC) president Abraham "Bambol" Tolentino ang mga aatupaging trabaho para sa mga nalalapit na kompetisyon na unang nakatakda ang Harbin Winter Games sa Pebrero hanggang sa Chengdu sa Agosto at Bahrain sa Oktubre bago ang pinal na SEA Games sa Thailand sa Disyembre.

“It’s a busy year marked with major international competitions,” ayon kay Tolentino na pinakaabalang taon ito para sa mga atleta matapos pulungin ang bagong Executive Board sa unang major POC function sa Makati City kahapon.

Sasabak sa bungad ng 2025 ang Ninth Asian Winter Games sa Harbin, China sa Peb. 7 -14, 12th World Games sa Chengdu at sa China mula August 7 -17, ang Third Asian Youth Olympics Games mula Okt. 22 -31 sa Bahrain at ang 33rd Southeast Asian Games sa Chonburi, Songkhla at Thailand mula Dis. 9 -20.

“We’re aiming to send as many capable and qualified athletes as possible to these games and we’re targeting the best possible results,” dagdag ni Tolentino, kung saan ang Harbin Games ang magbibigay-lakas para sa kampanya sa first Winter Olympics medal.

Naroon sa pulong sina first vice president Al Panlilio (basketball), treasurer Dr. Jose Raul Canlas (surfing) at auditor Donaldo Caringal (volleyball) at board members Leonora Escollante (canoe-kayak), Alvin Aguilar (wrestling), Ferdinand Agustin (jiu-jitsu,), Alexander Sulit (judo), Leah Gonzales (fencing) at Jessie Lacuna (Athletes Commission).

Dumalo rin sina International Olympic Committee Representative to the Philippines Mikee Cojuangco-Jaworski habang di nakadalo si vice president Richard Gomez (modern pentathlon) na hindi nakabiyahe mula Ormoc City kaya muling idaraos ang POC first General Assembly sa susunod na linggo.

Ang Asian Indoor and Martial Arts Games, ayon kay Tolentino na kagagaling lang mula sa trangkaso ay iniskedyul ng early 2026 ng host Riyadh. Bago ang pulong, nanalangin muna ang board para sa kaluluwa ni dating secretary-general Atty. Edwin Gastanes na namayapa nitong nakaraang buwan.