Pagdagsa ng mga tao sa QC Hall, dahil sa fake news — Belmonte

ni Jasmin Joy Evangelista | October 30, 2021

Dumagsa sa Quezon City Hall nitong Biyernes ng madaling araw ang daan-daang katao matapos umanong kumalat ang impormasyong may ipamimigay na pera ang lungsod.

Ayon sa ilang pumunta, may balitang may bigayan daw ng P10,000 ayuda ang QC local government unit.

Ang ilan sa kanila ay nakita naman ang social media post tungkol sa "Pangkabuhayan QC," habang ang iba ay basta na lang daw pumunta.

Ayon kay QC Mayor Joy Belmonte, walang katotohanan na namimigay ng P10,000 ayuda ang lungsod dahil ang talagang pinapipila ay ang mga magbibigay ng requirements para sa programang "Pangkabuhayan QC."

"Around 85 percent ng pumunta, P10,000 ayuda ang hinahanap," sabi ni Belmonte.

Ang Pangkabuhayan QC ay pagbibigay ng P5,000 hanggang P20,000 para sa mga nawalan ng trabaho o nagsara ang negosyo dahil sa pandemya.

Ayon pa kay Belmonte, posibleng may nagpakalat ng fake news kaya't dinagsa ang labas ng city hall.

Nakikiusap ang alkalde sa mga nagpapakalat nito na tumigil na dahil kawawa naman ang mga umasa.

"Sa mga nagpapakalat ng fake news tigilan niyo na, nawalan na nga ng trabaho niloko niyo pa," aniya.

Mayor Joy Belmonte, sinampahan ng kaso dahil umano sa biniling overpriced food packs

ni Jasmin Joy Evangelista | October 19, 2021

Sinampahan ng reklamong plunder at graft si Quezon City Mayor Joy Belmonte kaugnay ng pagbili umano ng overpriced food items na ipi­namigay sa mga residente ng lungsod na naapek­tuhan ng COVID-19 pandemic noong nakaraang taon.

Ito ay inihain ni John Chiong, isang anti-corruption advocate, founder at national commander ng Task Force Kasanag.

Bukod kay Belmonte, kasama sa reklamo sina Ruby Manangu, officer-in-charge ng Accounting Department ng Quezon City government, Angelica Solis, kinatawan ng LXS Trading at iba pang hindi pa batid ang pagkakakilanlan.

Bumili umano ang Quezon City government ng 250,000 food packs sa halagang P1,149.90 bawat isa o kabuuang P287 milyon sa LXS Trading at hindi raw inilagay sa Purchase Order (PO) ang presyo ng bawat item.

Kung bibilhin daw ang mga ito sa retail store ay lumalabas na P715 lamang bawat food pack.

Ayon naman sa kampo ng alkalde, isa lamang umano itong black propaganda.

“We are confident that in a proper court of law, these cases will be exposed for exactly what they are: tools for distraction and black propaganda. The QC government strictly adheres to all the provisions of Republic Act 9184 or the Procurement Act, and in fact received the highest Commission on Audit rating for the year 2020. We are positive that this complaint will be dismissed, and our names vindicated,” ani City legal officer Orlando Casimiro.

1,518 pamilya magmamay-ari na ng lupa sa Payatas, Quezon City

ni Lolet Abania | September 26, 2021

Nasa kabuuang 1,518 pamilya sa Barangay Payatas sa Quezon City ang magmamay-ari na ng lupa kung saan sila nanirahan ng 40 taon.

Sa pahayag ng city government, natupad na ni Mayor Joy Belmonte ang kanyang naging pangako sa mga residente ng Ramawil 9.6 Homeowners Association Inc., dalawang taon na ang nakararaan.

Nitong weekend, nilagdaan ni Belmonte ang deed of conditional sale bilang pormal na pag-acquire ng 157 parcels ng mga lupa na dating pagmamay-ari ng Landbank.

Nagpasalamat naman ang presidente ng Ramawil 9.6 Homeowners Association Inc. na si Razul Janoras sa city government sa pagbibigay nito ng oportunidad na makakuha ng security of tenure sa mga naturang lupa na kanilang tinirhan sa loob ng apat na dekada.

Sina City Administrator Michael Alimurung, head ng Housing Community Development and Resettlement Department, at ang City Appraisal Committee, ang siyang nagkumbinse sa Landbank upang mai-settle ang mga property sa halagang P209,244,000.

Matapos na ma-acquire ito ng lokal na gobyerno ng Quezon City, ang mga benepisyaryo ay maaaring magbayad sa LGU para sa lupa na kanilang inookupa sa pamamagitan ng direct sale program na P3,000 per sq. meter.